Eklezyas 10:1-20
10 Parey bann mous ki’n mor i fer delwil parfimen vin pi e i fer li kimen, ler en dimoun ki ganny konsidere konman saz e ki lezot dimoun i respekte li i fer en pti keksoz ki bet, sa i gat son repitasyon.
2 Leker en dimoun ki saz i fer li al dan sa bon semen,* me leker en dimoun ki bet i fer li al dan sa move semen.*
3 Nenport semen ki en dimoun ki bet i mars lo la, i napa bon zizman* e i fer tou dimoun konnen ki i bet.
4 Si en sef i ankoler* avek ou, reste kot ou ete, parski ler en dimoun i reste kalm sa i fer ki napa en kantite gro pese.
5 Mon’n vwar en keksoz ki fer bann dimoun soufer lo later,* en fot ki bann dimoun ki annan lotorite i fer:
6 Bann dimoun ki bet i ganny bann o pozisyon me bann dimoun ki ris* i reste dan bann pozisyon ki pli ba.
7 Mon’n vwar bann serviter lo seval, me bann prens pe mars apye parey bann serviter.
8 En dimoun ki fouy en trou i kapab tonm ladan e en dimoun ki kas en miray an ros i kapab ganny morde avek en serpan.
9 En dimoun ki kas ros i kapab ganny blese avek sa bann ros e en dimoun ki koup dibwa, sa i kapab vin en danze pour li.*
10 Si en zouti an fer pa koupe e en dimoun pa fit li, sa dimoun ki servi li pou bezwen fer en kantite zefor. Me en dimoun ki annan lasazes pou reisi.
11 Si en serpan i morde avan ki i ganny kontrole, i pa fer sans ki sa dimoun i annan sa abilite pour kontrol en serpan.*
12 Bann keksoz ki en dimoun ki saz i dir i fer lezot dimoun apresye li, me bann keksoz ki en dimoun ki bet i dir i fer li ganny problenm.
13 Premye keksoz ki i dir i bann keksoz ki bet e bann dernyen keksoz ki i dir i bann keksoz ki fou.
14 Me en dimoun ki bet i kontinyen koze.
En dimoun pa konnen ki pou arive. Alor lekel ki kapab dir li sa ki pou arive apre ki i’n mor?
15 Ler en dimoun ki bet i travay dir sa i fer li fatige, parski i pa ni menm konnen ki mannyer i pou trouv son semen pour li al kot lavil.
16 I en problenm pour en pei ler son lerwa i en garson e ler son bann prens i konmans fer lafet depi bomaten.
17 I en lazwa pour sa pei ler son lerwa i garson bann dimoun enportan e ler bann prens i manz dan sa bon moman pour zot ganny lafors e zot pa bwar pour sou.
18 Ler bann dimoun i vreman pares, plafon i tonbe e ler bann dimoun i nanryen fer, lakaz i koule.
19 Dipen* i fer dimoun kontan* e diven i fer lavi gou, me larzan i fer en dimoun ganny tou sa ki i bezwen.
20 Pa bezwen modi* lerwa dan ou leker* e pa bezwen modi en dimoun ki ris ler ou dan ou lasanm, parski en zwazo* i kapab dir sa ki ou’n dir* oubyen en zannimo ki annan lezel i kapab repet sa ki ou’n dir.
Bann not
^ Literalman, “i kot son lanmen drwat.”
^ Literalman, “i kot son lanmen gos.”
^ Literalman, “i napa leker.”
^ Literalman, “souf lavi.”
^ Literalman, “anba soley.”
^ Oubyen “konpetan.”
^ Oubyen posibleman, “i devret fer atansyon avek sa bann dibwa.”
^ Literalman, “sef lalang.”
^ Oubyen “Manze.”
^ Literalman, “riye.”
^ Oubyen “mal koz.”
^ Oubyen posibleman, “lo ou lili.”
^ Literalman, “zannimo ki anvole dan lesyel.”
^ Oubyen “sa mesaz.”