Eklezyas 6:1-12
6 Mon’n vwar en lot keksoz mal* lo later* e sa i arive avek en kantite dimoun:
2 Sa vre Bondye i donn en dimoun larises, bann keksoz materyel ek laglwar, koumsa sa dimoun i ganny tou sa ki i anvi. Me sa vre Bondye pa les li servi sa bann keksoz menm si en etranze i kapab servi sa bann keksoz. Sa osi pa fer sans e sa i fer li soufer en kantite.
3 Si en zonm i ganny 100 zanfan, i viv pour en kantite lannen e i vin vye, me i pa servi son bann bon keksoz avan ki i al dan latonm,* mon bezwen dir ki en pti baba ki ne mor i pli bon ki sa zonm.
4 Parski i pa fer sans ki sa pti baba in ne, i’n ale dan fernwanr e fernwanr in kouver son non.
5 Menm si i pa’n zanmen vwar soley oubyen i pa’n konn nanryen, i pli bon* ki sa zonm.
6 Ki byenfe en dimoun i gannyen si i viv pour de mil an me i pa zwaye? Eski pa tou dimoun i al dan menm landrwa?
7 En dimoun i travay dir pour li ganny son manze, me son vant pa zanmen plen.
8 Parski ki en dimoun ki saz i annan an plis ki en dimoun ki bet? Ki byenfe en dimoun ki pov i gannyen ler i konnen ki i bezwen fer pour li viv?*
9 I pli bon pour apresye bann keksoz ki lizye i vwar dan plas tay deryer bann keksoz ki ou anvi. Sa osi pa fer sans, i parey tay deryer divan.
10 Tou keksoz ki egziste i annan en non e nou konnen kisisa en dimoun. I pa kapab dispit* avek en dimoun ki pli for ki li.
11 Pli en dimoun i koz bokou,* pli i pa fer sans. Ki byenfe sa i anmennen pour en dimoun?
12 Lekel ki konnen kwa ki pli bon pour en dimoun fer pandan sa ptigin letan ki i viv son lavi ki pa fer sans, ki parey en lonbraz? Parski lekel ki kapab dir en dimoun sa ki pou arive lo later* apre ki i’n mor?
Bann not
^ Oubyen “lot maler.”
^ Literalman, “anba soley.”
^ Oubyen “i pa ni’n menm ganny latonm.”
^ Literalman, “i repoz plis.”
^ Literalman, “pour mars devan bann dimoun ki vivan.”
^ Oubyen “defann son lekor.”
^ Oubyen posibleman, “i annan en kantite keksoz.”
^ Literalman, “anba soley.”
