Ezekyel 13:1-23
13 Zeova ti koz avek mwan ankor enn fwa e i ti dir:
2 “Garson zonm, profetiz kont bann profet Izrael e dir sa bann ki pe envant zot prop profesi,* ‘Ekout sa ki Zeova i dir.
3 La sa ki Souvren Senyer Zeova i dir: “Maler pour sa bann profet bet, ki swiv zot prop nide kan zot pa’n vwar nanryen!
4 Pep Izrael, ou bann profet in vin parey bann renar parmi bann debri.
5 Zot pa pou al dan sa bann landrwa kot bann miray ros in kase pour zot rekonstri sa bann miray pour pep Izrael, pour ki pep Izrael i kapab reste debout dan sa lager pandan zour Zeova.”
6 “Sa bann ki pe dir ‘Zeova i dir,’ i sanmenm sa bann ki’n ganny bann vizyon ki pa vre e zot in predir en mansonz, me Zeova li menm pa’n anvoy zot e zot in espere ki sa ki zot in dir i vin vre.
7 Pa sa vizyon ki zot in gannyen i pa vre e sa ki zot ti predir i en mansonz ler zot dir ‘Zeova i dir,’ kan mon menm mwan mon pa’n dir nanryen?”’
8 “‘Alor la sa ki Souvren Senyer Zeova i dir: “‘Mon pou pran aksyon kont zot parski sa ki zot in dir i pa vre e zot bann vizyon i en mansonz.’ La sa ki Souvren Senyer Zeova in dir.”
9 Mon pou pini bann profet ki dir bann vizyon ki pa vre e ki predir en mansonz. Zot pa pou parmi bann dimoun ki mon annan konfyans ladan. Zot non pa pou ganny ekrir dan liv lalis pep Izrael e zot pa pou retourn dan pei Izrael. Zot pou bezwen konnen ki mwan, mon Souvren Senyer Zeova.
10 Tousala i akoz zot in anbet mon pep par dir, “I annan lape!” kan i napa lape. Ler zot fer en miray fay ki separ lasanm, zot krepi li avek laso.’*
11 “Dir sa bann ki pe krepi avek laso ki sa miray pou tonbe. En gro lapli pou vini, lagrel* pou tonbe e en gro tanpet divan pou kas sa miray.
12 Ler sa miray pou tonbe, zot pou ganny demande, ‘Oli zot laso ki zot ti krepi li avek?’
13 “Alor la sa ki Souvren Senyer Zeova i dir: ‘Dan mon lakoler, mon pou fer en gro tanpet divan for soufle e en gro lapli tonbe. Mon pou fer lagrel tonbe pour detri sa miray akoz mon vreman ankoler.
14 Mon pou kas sa miray ki zot in krepi avek laso e zet li ater e zot pou vwar son fondasyon. Ler sa lavil pou tonbe, zot pou mor dan sa lavil. Zot pou bezwen konnen ki mwan, mon Zeova.’
15 “‘Ler mon pou tir tou mon lakoler lo sa miray e lo sa bann ki’n krepi li avek laso, mon pou dir zot: “Sa miray i nepli la e sa bann ki ti krepi li i nepli la.
16 Bann profet Izrael, sa bann ki ti profetize konsernan Zerizalenm e ki ti vwar bann vizyon kot Zerizalenm i anpe kan ti napa lape, zot nepli la.”’ La sa ki Souvren Senyer Zeova in dir.
17 “Me ou garson zonm, get bann fiy parmi ou pep ki envant zot prop profesi e profetiz kont zot.
18 Dir zot, ‘La sa ki Souvren Senyer Zeova i dir: “Maler pour sa bann madanm ki koud bann riban pour met dan lebra* e ki fer bann vwal pour tou groser latet pour met en latrap pour pran lavi* bann dimoun! Eski zot pe esey detri lavi* mon pep e an menm tan zot pe esey prezerv zot prop lavi?*
19 Eski zot pou mank respe pour mwan parmi mon pep pour detrwa ponnyen lorz* ek bann bout dipen? Zot in koz manti avek mon pep e mon pep in ekout zot, alor zot in touy bann dimoun ki pa devret mor e gard vivan sa bann ki pa devret viv.”’
20 “Alor la sa ki Souvren Senyer Zeova i dir: ‘Zot bann madanm, mon pou pran aksyon kont zot bann riban ki zot servi pour tyonbo bann dimoun dan latrap konmsi zot bann zwazo. Mon pou tir sa bann riban dan zot lebra e larg sa bann ki zot pe esey detri konmsi zot bann zwazo.
21 Mon pou desir zot bann vwal e sov mon pep dan zot lanmen. Mon pep pou nepli en keksoz ki zot pou tyonbo dan zot latrap e zot pou bezwen konnen ki mwan, mon Zeova.
22 Anfet, zot in fer sa enn ki drwat perdi kouraz avek zot mansonz kan mon pa ti pe fer li soufer e zot in ankouraz sa enn ki move pour kontinyen fer sa ki mal e ki i pa reste vivan.
23 Alor, zot bann madanm, zot pou nepli ganny bann vizyon ki pa vre e zot pou aret predir lavenir. Mon pou sov mon pep dan zot lanmen e zot pou bezwen konnen ki mwan, mon Zeova.’”
Bann not
^ Oubyen “ki dir bann profesi dapre sa ki dan zot leker.”
^ Setadir, fer en miray fay ki separ lasanm e servi laso pour li paret for.
^ Literalman, “e zot, bann lagrel.”
^ Setadir, bann riban ki ti annan pour fer avek mazik ki zot ti met kot zot koud oubyen ponnyen.
^ Ebre, neʹphesh. Vwar Leksplikasyon bann mo.
^ Ebre, neʹphesh. Vwar Leksplikasyon bann mo.
^ Ebre, neʹphesh. Vwar Leksplikasyon bann mo.
^ Lorz i en plant parey dible ki ganny servi pour fer lafarin.
