Ezekyel 15:1-8
-
Zerizalenm i en pye rezen ki pa kapab ganny servi (1-8)
15 Zeova ti koz avek mwan ankor enn fwa e i ti dir:
2 “Garson zonm, ki mannyer dibwa pye rezen i diferan avek dibwa lezot pye dibwa oubyen brans lezot pye dibwa dan lafore?
3 Eski zot kapab fer en baton avek dibwa pye rezen pour zot travay avek? Oubyen, eski dimoun i kapab fer en pike avek sa dibwa pour met anpandan bann keksoz?
4 Gete! I ganny zete dan dife pour fer dife reste alimen e dife i bril net son de bout e bril en pe son milye. Aprezan, eski i kapab ganny servi pour travay avek?
5 Menm si i ti antye, i pa ti pou kapab ganny servi pour fer okenn keksoz. Alor, ki ou pou kapab fer avek li la ki i’n ganny brile!”
6 “Alor la sa ki Souvren Senyer Zeova i dir: ‘Zis parey mon’n zet dibwa pye rezen ki parmi lezot pye dibwa dan lafore dan dife pour fer dife reste alimen, mon pou fer sanmenm sa avek bann zabitan Zerizalenm.
7 Mon’n get zot. Zot in sove dan dife me dife pou detri zot. Zot pou bezwen konnen ki mwan mon Zeova ler mon get zot.’”
8 “‘Mon pou fer sa pei vin dezerte akoz zot pa’n reste fidel.’ La sa ki Souvren Senyer Zeova in dir.”