Ezekyel 25:1-17
25 Zeova ti koz avek mwan ankor enn fwa e i ti dir:
2 “Garson zonm, get bann Amonnit e profetiz kont zot.
3 Ou devret dir sa konsernan bann Amonnit, ‘Ekout sa ki Souvren Senyer Zeova i dir. La sa ki Souvren Senyer Zeova i dir: “Vi ki ou ti dir ‘I bon!’ ler mon landrwa sen ti ganny sali, ler pei Izrael ti ganny abandonnen e ler pep Zida ti al an egzil,
4 mon pe livre ou dan lanmen en pep ki sorti dan Les e zot pou pran ou konman zot propriyete. Zot pou etabli zot kan* kot ou e zot pou mont zot latant parmi ou. Zot pou manz ou bann fri e bwar ou dile.
5 Mon pou fer Raba vin en landrwa kot i annan zerb pour samo e pei bann Amonnit pou vin en landrwa repo pour bann troupo mouton. Zot pou bezwen konnen ki mwan, mon Zeova.”’”
6 “Parski la sa ki Souvren Senyer Zeova i dir: ‘Vi ki ou’n bat lanmen, pile e ou ti kontan e mepriz pei Izrael ler ou ti vwar sa ki ti pe arive avek li,
7 mon pou lev mon lanmen kont ou e livre ou avek bann nasyon e zot pou pran ou bann keksoz. Mon pou detri ou parmi bann pep ek bann pei. Mon pou detri ou e ou pou bezwen konnen ki mwan, mon Zeova.’
8 “La sa ki Souvren Senyer Zeova i dir: ‘Vi ki Moab ek Seir in dir, “Gete! Pep Zida i parey tou lezot nasyon,”
9 mon pou les bann lavil* Moab ki lo lafrontyer ganny atake, son bann pli zoli* lavil, depi Bet-Zesimot, Baal-Meonn e ziska Kiriataim.
10 Mon pou livre bann Moabit ansanm avek bann Amonnit dan lanmen sa pep ki sorti dan Les e zot pou pran zot konman zot propriyete, koumsa bann nasyon pa pou rapel bann Amonnit.
11 Mon pou kondann Moab e zot pou bezwen konnen ki mwan, mon Zeova.’
12 “La sa ki Souvren Senyer Zeova i dir: ‘Edonm in revanze kont pep Zida e sa i fer li pli koupab.
13 Alor la sa ki Souvren Senyer Zeova i dir: “Mon pou lev mon lanmen kont Edonm e mon pou detri son bann dimoun ek zannimo. Mon pou fer li vin en landrwa abandonnen. Zot pou ganny touye avek lepe depi Temann ziska Dedann.
14 ‘Mon pou fer mon pep Izrael revanze kont Edonm. Zot pou tir mon lakoler lo Edonm e Edonm pou bezwen konnen ki mwan ki pe revanze.’ La sa ki Souvren Senyer Zeova in dir.”’
15 “La sa ki Souvren Senyer Zeova i dir: ‘Vi ki bann Filisten in toultan annan laenn, zot in rod en fason pour revanze e anmenn destriksyon.
16 Alor la sa ki Souvren Senyer Zeova i dir: “Mon pe lev mon lanmen kont bann Filisten e mon pou detri bann Keretit ek larestan zabitan ki o bor lanmer.
17 Mon pou sirman revanze e pini zot severman e ler mon fer sa, zot pou bezwen konnen ki mwan, mon Zeova.”’”
Bann not
^ En kan i en landrwa kot i annan en kantite latant.
^ Oubyen “montanny.”
^ Oubyen “dekorasyon.”
