Ezekyel 35:1-15
-
Profesi kont bann montanny Seir (1-15)
35 Zeova ti koz avek mwan ankor enn fwa e i ti dir:
2 “Garson zonm, get bann montanny Seir e profetiz kont li.
3 Dir li, ‘La sa ki Souvren Senyer Zeova i dir: “Bann montanny Seir, mon pou pran aksyon kont ou. Mon pou lev mon lanmen kont ou e fer ou vin en landrwa abandonnen.
4 Mon pou detri ou bann lavil, ou pou vin en landrwa abandonnen e ou pou bezwen konnen ki mwan, mon Zeova.
5 Parski ou’n toultan annan laenn pour pep Izrael e ou ti livre bann Izraelit pour ganny touye avek lepe ler zot ti dan maler, ler zot ti ganny zot dernyen pinisyon.”’
6 “La sa ki Souvren Senyer Zeova i dir. ‘Alor, mwan sa Bondye vivan, mon fer serman ki ou pou ganny touye e lanmor* pou tay deryer ou. Vi ki ou pa ti kontan disan, lanmor pou tay deryer ou.
7 Mon pou fer bann montanny Seir vin en landrwa abandonnen. Mon pou touy tou dimoun ki pas dan sa landrwa oubyen ki retourn laba.
8 Mon pou ranpli son bann montanny avek bann dimoun ki’n ganny touye. Bann ki’n ganny touye avek lepe pou tonm lo ou bann montanny, dan ou bann vale e dan tou ou bann pti larivyer.
9 Mon pou fer ou vin en landrwa abandonnen pour touzour. I pou napa personn ki pou reste dan ou bann lavil e ou pou bezwen konnen ki mwan, mon Zeova.’
10 “Vi ki ou ti dir, ‘Sa de nasyon ek sa de pei pou vin pour mwan e nou pou pran tou le de konman nou propriyete,’ menm si Zeova li menm ti laba,
11 la sa ki Souvren Senyer Zeova i dir, ‘Alor mwan sa Bondye vivan, mon fer serman ki mon pou azir avek ou avek menm lakoler ek zalouzi ki ou ti demontre anver zot akoz ou ti ay zot. Mon pou fer zot konn mwan ler mon ziz ou.
12 Ou pou bezwen konnen ki mwan Zeova, mon’n tann tou sa bann keksoz ensolan ki ou’n dir konsernan bann montanny Izrael. Ou ti dir, “Zot in vin en landrwa abandonnen e zot in ganny donnen avek nou pour detri.”*
13 Ou’n dir bann keksoz arogan kont mwan e ou’n dir en kantite keksoz kont mwan. Mon’n tann tousala.’
14 “La sa ki Souvren Senyer Zeova i dir: ‘Later antye pou kontan ler mon fer ou vin en landrwa abandonnen.
15 Zis parey ou ti kontan ler leritaz pep Izrael ti vin en landrwa abandonnen, koumsanmenm mon pou azir avek ou. Bann montanny Seir, ou pou vin en landrwa abandonnen, wi, Edonm antye e zot pou bezwen konnen ki mwan, mon Zeova.’”
