Ezekyel 39:1-29
39 “Ou garson zonm, profetiz kont Gog e dir li, ‘La sa ki Souvren Senyer Zeova i dir: “Mon pou pran aksyon kont ou Gog, sef* Mesek ek Toubal.
2 Mon pou fer ou vir dan en lot direksyon e fer ou sorti dan bann landrwa ki byen lwen dan nor e anmenn ou lo bann montanny Izrael.
3 Mon pou tap ou lark* ki dan ou lanmen gos e fer li tonbe. Mon pou fer ou bann fles ki dan ou lanmen drwat tonbe.
4 Ou ansanm avek tou ou bann solda ek sa bann dimoun ki pou avek ou pou tonm lo bann montanny Izrael. Mon pou fer ou vin manze pour tou kalite zwazo* ek bann zannimo sovaz dan lakanpanny.”’
5 “‘Ou pou tonm dan lakanpanny, parski mwan ki’n koze.’ La sa ki Souvren Senyer Zeova in dir.
6 “‘Mon pou anvoy dife lo Magog e lo bann dimoun ki pe viv an sekirite lo bann zil. Zot pou bezwen konnen ki mwan, mon Zeova.
7 Mon pou fer mon pep Izrael konn mon non sen e mon pa pou les personn mank respe pour mon non sen ankor. Bann nasyon pou bezwen konnen ki mwan, mon Zeova, sa Enn ki Sen dan Izrael.’
8 “La sa ki Souvren Senyer Zeova i dir, ‘Wi, sa pou arive e i pou vin vre. Sa i sa zour ki mon’n koz lo la.
9 Bann zabitan dan bann lavil Izrael pou sorti e alim dife avek tou sa bann zarm, sa i enkli bann pti boukliye,* bann boukliye, lark, fles, mayos* ek lans. Zot pou servi sa bann zarm pour alim dife pour set an.
10 Zot pa pou bezwen al rod dibwa dan lakanpanny oubyen dan lafore parski zot pou servi sa bann zarm pour alim dife.’
“‘Zot pou pran bann keksoz avek sa bann ki ti pran zot keksoz e depouy sa bann ki ti depouy zot.’ La sa ki Souvren Senyer Zeova in dir.
11 “‘Sa zour, mon pou donn Gog en latonm dan Izrael, dan vale sa bann dimoun ki vwayaz dan les lanmer. Sa vale pou bar semen sa bann ki pe pas dan sa semen. Laba menm ki zot pou anter Gog ek tou son bann lafoul e zot pou apel sa landrwa Vale Amonn-Gog.*
12 Pep Izrael pou pran set mwan pour anter zot pour ki pei i ganny pirifye.
13 Tou dimoun dan pei pou travay pour anter zot e sa pou fer zot vin renonmen zour ki mon glorifye mon lekor.’ La sa ki Souvren Senyer Zeova in dir.
14 “‘Bann zonm pou ganny swazir pour kontinyen al partou dan pei pour rod bann lekor ki ankor lo later e anter zot pour ki pei i ganny pirifye. Zot pou kontinyen rode pour set mwan.
15 Ler sa bann ki pe al partou dan pei i vwar lezo en dimoun, zot pou met en mark o bor sa lezo. Apre, sa bann ki’n ganny swazir pour anter bann lekor, pou anter li dan Vale Amonn-Gog.
16 I pou osi annan en lavil laba ki apel Amona.* Zot pou pirifye sa pei.’
17 “Me ou garson zonm, la sa ki Souvren Senyer Zeova i dir: ‘Dir avek tou sort kalite zwazo e avek tou zannimo sovaz dan lakanpanny, “Rasanble zot e vini. Rasanble otour mon sakrifis ki mon pe prepare pour zot, en gran sakrifis lo bann montanny Izrael. Zot pou manz laser e bwar disan.
18 Zot pou manz laser bann zonm ki for e bwar disan bann sef lo later, setadir bann mal mouton, bann pti mouton, bann kabri ek toro, tou bann zannimo angrese sorti Basann.
19 Zot pou ranpli zot vant avek lagres e bwar disan ziska zot sou avek sa sakrifis ki mon pou prepare pour zot.”’
20 “‘Lo mon latab, zot pou ranpli zot vant avek bann seval, bann dimoun ki anmenn saret lager, bann zonm ki for ek tou sort kalite gerye.’ La sa ki Souvren Senyer Zeova in dir.
21 “‘Mon pou montre mon laglwar parmi bann nasyon. Tou nasyon pou vwar ki mon’n kondann zot e zot pou vwar pwisans* ki mon’n demontre parmi zot.
22 Apartir sa zour, pep Izrael pou bezwen konnen ki mwan, mon Zeova zot Bondye.
23 Bann nasyon pou bezwen konnen ki pep Izrael ti al an egzil akoz zot prop fot e akoz zot pa ti fidel avek mwan. Alor mon ti kasyet mon figir avek zot e mon ti livre zot dan lanmen zot bann lennmi e zot tou zot ti ganny touye avek lepe.
24 Mon ti azir avek zot dapre sa ki zot merite pour bann keksoz enpir ki zot in fer ek zot lofans e mon ti kasyet mon figir avek zot.’
25 “Alor la sa ki Souvren Senyer Zeova i dir: ‘Mon pou fer bann ki pour Zakob ki ti’n al an egzil retournen e mon pou pran pitye pour pep Izrael antye. Mon pou defann* mon non sen avek devouman.
26 Apre ki zot in ganny imilye akoz zot pa ti fidel avek mwan, zot pou reste an sekirite dan zot pei e personn pa pou fer zot per.
27 Ler mon pou tir zot parmi sa bann pep e dan bann pei zot bann lennmi, mon pou osi sanktifye mon lekor parmi zot devan en kantite nasyon.’
28 “‘Zot pou bezwen konnen ki mwan, mon Zeova zot Bondye ler mon fer zot al an egzil parmi bann nasyon e apre rasanble zot e fer zot retourn dan zot pei, san kit personn deryer.
29 Mon pou nepli kasyet mon figir avek zot, parski mon pou devid mon lespri sen lo pep Izrael.’ La sa ki Souvren Senyer Zeova in dir.”
Bann not
^ Oubyen “sef prens.”
^ Vwar Leksplikasyon bann mo.
^ Oubyen “zwazo rapas.”
^ En pti boukliye ki bann dimoun ki tir fles ti servi.
^ Oubyen posibleman, “bann baton ki annan en bout pwent devan ki ti ganny servi konman zarm.”
^ Oubyen “Vale bann lafoul Gog.”
^ Sa non i vedir “Bann lafoul.”
^ Literalman, “lanmen.”
^ Literalman, “montre devosyon zis pour.”
