Ezekyel 45:1-25
45 “‘Ler zot partaz later dan sa pei konman en leritaz, zot devret donn Zeova en kontribisyon, en bout later dan pei e sa bout later pou vin sen. I devret 25,000 koude* longer e 10,000 koude larzer. Sa bout later antye* pou vin sen.
2 Dan sa bout later, i pou annan en kare later pour landrwa sen. Sa kare later pou mezir 500 koude par 500 koude* e i pou annan en bout later ki mezir 50 koude lo sak kote ki pou vin en laplenn.*
3 Dan sa bout later, ou devret mezir 25,000 koude longer ek 10,000 koude larzer e lanmenm la kot landrwa sen pou ete, en keksoz tre sen.
4 Sa bout later pou sen e i pour bann pret ki servi kot landrwa sen e ki vin devan Zeova pour servi li. Sa pou en landrwa kot zot pou fer zot lakaz e en landrwa ki sen pour landrwa sen.
5 “‘I pou annan en bout later ki mezir 25,000 koude longer e 10,000 koude larzer pour bann Levit, bann serviter kot tanp e zot pou annan 20 lasal a manze* konman propriyete.
6 “‘Zot devret donn sa lavil en bout later ki mezir 25,000 koude longer (dapre kontribisyon sen) e 5,000 koude larzer. Sa pou vin pour pep Izrael antye.
7 “‘I pou annan en bout later lo de kote kontribisyon sen ek sa bout later ki pour lavil. Sa bout later pou vin pour sef. I pou o bor kontribisyon sen ek sa bout later ki pour lavil. I pou lo kote was e lo kote les. Son longer depi lafrontyer lo kote was ziska lafrontyer lo kote les pou menm parey avek en bout later en tribi.
8 Sa later pou vin son propriyete dan Izrael. Mon bann sef pou nepli maltret mon pep e zot pou donn larestan sa pei avek pep Izrael e sak tribi pou ganny en bout.’
9 “La sa ki Souvren Senyer Zeova i dir: ‘Bann sef Izrael, zot in tro ale!’
“‘Aret fer vyolans e aret fer dimoun soufer. Fer sa ki zis e drwat. Aret pran propriyete mon pep.’ La sa ki Souvren Senyer Zeova in dir.
10 ‘Zot devret servi bann balans ki egzakt, en mezir efa* ki egzakt e en mezir bat* ki egzakt.
11 En mezir efa ek en mezir bat pa devret sanze. En mezir bat i devret en dizyenm en omer* e en mezir efa i devret en dizyenm en omer. En omer i devret sa standar ki zot devret servi pour mezire.
12 En sekel* i devret 20 gera.* 20 sekel azout 25 sekel ek 15 sekel i devret fer en mane.’*
13 “‘Sa i kontribisyon ki zot devret ofer: en sizyenm en efa dan sak omer dible e en sizyenm en efa dan sak omer lorz.*
14 Lakantite delwil ki ganny donnen i devret ganny mezire dapre mezir bat. En bat i en dizyenm en kor* e dis bat i en omer parski dis bat i fer en omer.
15 Parmi bann zannimo dan troupo pep Izrael, dan sak 200 mouton, zot devret donn en mouton. Tousala pou ganny servi pour lofrann lagrenn,* pour lofrann brile* ek sakrifis lape* pour ki pese sa pep i ganny pardonnen.’* La sa ki Souvren Senyer Zeova in dir.
16 “‘Tou dimoun dan pei i devret fer sa kontribisyon avek sef dan pei Izrael.
17 Me sa sef pou responsab pour bann lofrann brile, lofrann lagrenn ek lofrann diven* pandan bann lafet, pandan nouvellin, bann Saba ek tou bann lafet ki pep Izrael i devret selebre. I pou osi donn sakrifis pour pese, lofrann lagrenn, lofrann brile ek sakrifis lape pour ki pese pep Izrael i ganny pardonnen.’*
18 “La sa ki Souvren Senyer Zeova i dir: ‘Premye zour premye mwan, ou devret pran en zenn toro ki san defo dan troupo e ou devret pirifye landrwa sen akoz pese.
19 Sa pret pou pran en pe disan sakrifis pour pese e met sa disan lo lankadreman laport tanp, lo sa kat kwen sa rebor lotel e lo lankadreman baro lakour anndan.
20 Sanmenm sa ki ou devret fer setyenm zour sa mwan pour tou dimoun ki’n fer pese san fer par ekspre oubyen dan linyorans. Ou devret ofer sakrifis pour pardonn* pese tanp.
21 “‘Katorzyenm zour premye mwan, zot devret selebre Lapak.* Pandan set zour zot devret manz dipen san lelven.
22 Sa zour, sa sef pou donn en zenn toro konman sakrifis pour pese pour li menm e pour tou dimoun dan pei.
23 Pandan sa set zour lafet, toulezour i devret donn set zenn toro ki san defo ek set mal mouton ki san defo konman en lofrann brile pour Zeova e osi en mal kabri konman sakrifis pour pese.
24 I devret osi donn en efa konman lofrann lagrenn pour sak zenn toro, en efa pour sak mal mouton e osi en in* delwil pour sak efa.
25 “‘Kenzyenm zour setyenm mwan, pandan set zour sa lafet, i devret donn menm sakrifis pour pese, menm lofrann brile, lofrann lagrenn ek delwil.’”
Bann not
^ Sa pe refer avek en gran koude. Vwar Lezot lenformasyon B14.
^ Oubyen “Par anndan tou son bann lafrontyer.”
^ Literalman, “500 par 500.”
^ Oubyen “laplenn zerb.”
^ Oubyen “20 lasanm.”
^ Vwar Lezot lenformasyon B14.
^ Vwar Lezot lenformasyon B14.
^ Vwar Lezot lenformasyon B14.
^ Oubyen “min.” Vwar Lezot lenformasyon B14.
^ Vwar Lezot lenformasyon B14.
^ Vwar Lezot lenformasyon B14.
^ Lorz i en plant parey dible ki ganny servi pour fer lafarin.
^ Vwar Lezot lenformasyon B14.
^ Vwar Leksplikasyon bann mo.
^ Vwar Leksplikasyon bann mo.
^ Vwar Leksplikasyon bann mo.
^ Oubyen “kouver.”
^ Vwar Leksplikasyon bann mo.
^ Oubyen “kouver.”
^ Oubyen “kouver.”
^ Vwar Leksplikasyon bann mo.
^ Vwar Lezot lenformasyon B14.
