Ezekyel 9:1-11
9 Apre i ti kriy dan mon zorey e dir: “Rasanble sa bann ki pou pini sa lavil, sakenn avek son zarm pour detri dan son lanmen!”
2 Mon ti vwar sis zonm pe vini sorti dan direksyon baro anler ki vir dan nor, sakenn avek son zarm pour kraze dan son lanmen. I ti annan en zonm parmi zot ki ti dan en lenz linenn e i ti annan en po lank* ki sekreter i servi dan son leren. Zot ti antre e debout o bor lotel an kwiv.
3 Apre sa, laglwar Bondye Izrael ti sorti kot i ti ete par lao bann seriben e i ti al kot larantre laport sa lakaz. I ti kriy sa zonm ki ti dan en lenz linenn e ki ti annan sa po lank ki sekreter i servi dan son leren.
4 Zeova ti dir li: “Al partou dan lavil Zerizalenm e met en mark lo fron bann zonm ki pe plennyen e pe soufer akoz tou sa bann keksoz degoutan ki pe ganny fer dan sa lavil.”
5 Mon ti tann li dir lezot: “Swiv li partou dan lavil e touy bann dimoun. Zot pa devret annan pitye pour zot, ni demontre okenn konpasyon anver zot.
6 Zot devret touy tou bann zonm aze, garson, vyerz, pti zanfan ek bann madanm. Me pa bezwen touy sa bann ki annan sa mark lo zot fron. Zot devret konmans kot mon landrwa sen.” Alor zot ti konmans avek bann ansyen ki ti devan lakaz.
7 Apre i ti dir zot: “Fer sa lakaz vin enpir e ranpli bann lakour avek lekor bann ki’n ganny touye. Ale!” Alor zot ti ale e touy bann dimoun dan lavil.
8 Ler zot ti pe touy bann dimoun, zis mwan ki ti reste vivan. Mon ti tonm lafas anba e kriye: “Ar wi Souvren Senyer Zeova! Eski ou pou detri tou larestan dimoun dan Izrael pandan ki ou pe pran en gran lakoler avek Zerizalenm?”
9 Alor i ti dir mwan: “Fot pep Izrael ek Zida i vreman, vreman grav. Sa pei i ranpli avek vyolans e sa lavil i ranpli avek koripsyon. Parski zot pe dir, ‘Zeova in kit pei e Zeova pa vwar nou.’
10 Me mwan, mon pa pou pran pitye pour zot, ni demontre konpasyon anver zot. Mon pou fer zot sibir konsekans sa ki zot in fer.”
11 Apre, mon ti vwar sa zonm ki ti dan en lenz linenn e ki ti annan sa po lank ki sekreter i servi dan son leren, pe vini e i ti dir: “Mon’n fer parey ou ti’n donn mwan lord pour fer.”
Bann not
^ En bwat ki annan plim ek lank ladan.