Ezra 5:1-17
5 Apre, profet Agay ek profet Zekarya pti zanfan Ido ti dir bann Zwif ki ti dan teritwar Zida e dan Zerizalenm en profesi o non Bondye Izrael ki ti avek zot.
2 Sa letan, Zorobabel garson Sealtyel ek Zesoua garson Zeozadak ti konmans rekonstri lakaz Bondye ki ti Zerizalenm. Bann profet Bondye ti avek zot e ti pe siport zot.
3 Dan sa letan, Tatenay gouverner rezyon Lot kote Larivyer,* Setar-Bozenay ek bann dimoun ki travay avek zot ti vin kot zot e demann zot: “Lekel ki’n donn zot lord pour konstri sa lakaz e pour fini sa batiman?”*
4 Zot ti osi demande: “Ki mannyer sa bann zonm ki pe travay lo sa batiman i apele?”
5 Me Bondye ti pe vey* bann ansyen parmi bann Zwif e zot pa ti fer bann Zwif aret travay ziska ki zot ti kapab anvoy en let kot Daryis e ziska ki Daryis i anvoy en dokiman kot zot konsernan sa ki ti pe arive.
6 La en kopi sa let ki Tatenay gouverner rezyon Lot kote Larivyer, Setar-Bozenay ek bann dimoun ki travay avek li, bann gouverner dan rezyon Lot kote Larivyer ti anvoy Lerwa Daryis.
7 Zot ti anvoy sa let kot li e zot ti ekri sa ladan:
“Lerwa Daryis:
“Ki lape i avek ou!
8 Nou pe fer lerwa konnen ki nou’n al dan provens* Zida kot lakaz sa gran Bondye e zot pe konstri sa lakaz avek bann gro ros e zot pe met dibwa dan bann miray. Bann dimoun pe travay dir e zot pe fer tou sa ki zot kapab pour fer zot travay avanse.
9 Apre, nou ti demann zot bann ansyen: ‘Lekel ki’n donn zot lord pour konstri sa lakaz e pour fini sa batiman?’*
10 Nou ti osi demann zot ki mannyer zot apele pour nou ekri non sa bann zonm ki pe diriz sa travay, pour nou dir ou.
11 “La sa ki zot ti dir nou: ‘Nou, nou bann serviter Bondye lesyel ek later e nou pe rekonstri sa lakaz ki en gran lerwa Izrael ti fini konstri plizyer lannen pase.
12 Me vi ki nou bann zanset ti fer Bondye lesyel ankoler, i ti livre zot dan lanmen Neboukadnezar lerwa Babilonn, en Kaldeen, ki ti detri sa lakaz e anmenn bann dimoun an egzil Babilonn.
13 Me dan premye lannen ki Siris ti lerwa Babilonn, Lerwa Siris ti donn en lord pour rekonstri sa lakaz Bondye.
14 An plis ki sa, Lerwa Siris ti pran bann resipyan annor e annarzan dan tanp Babilonn ki Neboukadnezar ti’n pran dan lakaz Bondye ki ti Zerizalenm e anmenn dan tanp Babilonn. Sa bann resipyan ti ganny donnen avek en zonm ki apel Sesbazar,* ki Siris ti’n fer vin gouverner.
15 Siris ti dir li: “Pran sa bann resipyan e al met zot dan tanp ki Zerizalenm e les zot rekonstri lakaz Bondye dan sa landrwa kot i ti ete avan.”
16 Apre, sa Sesbazar ti vini e i ti met fondasyon lakaz Bondye ki Zerizalenm. Depi sa letan ziska ozordi, sa lakaz i ankor pe ganny konstrir me i pa ankor fini.’
17 “Aprezan, si i paret bon pour lerwa, fer en resers dan lasanm trezor lerwa ki Babilonn, pour gete si Lerwa Siris ti donn en lord pour rekonstri sa lakaz Bondye ki Zerizalenm. Apre, les nou konnen ki lerwa i deside fer konsernan sa.”
Bann not
^ Oubyen “lot kote Larivyer Efrat.”
^ Oubyen “sa bann bim.”
^ Literalman, “lizye zot Bondye ti lo.”
^ Oubyen “distrik.”
^ Oubyen “sa bann bim.”
