Let pour bann Galat 6:1-18
6 Mon bann frer, menm si en dimoun i pran en move semen san ki i realize, zot ki matir spirityelman, esey redres sa dimoun avek ladouser.* Me fer atansyon pangar ou osi ou ganny tante.
2 Kontinyen anmenn fardo kanmarad e dan sa fason ou pou obei lalwa Kris.
3 Parski si en dimoun i krwar i enportan me i en nanryen ditou, i pe anbet son prop lekor.
4 Me sakenn i devret egzamin son prop aksyon e apre sa, i pou kontan akoz sa ki li menm in fer e pa akoz i pe konpar li avek en lot dimoun.
5 Parski sakenn i devret desarz son prop responsabilite.
6 Deplis, fodre ki sa enn ki ganny ansennyen parol Bondye i partaz tou bon keksoz avek sa enn ki donn li sa lansennyman.
7 Pa les zot ganny anbete: Personn pa kapab anbet* Bondye. Sa ki en dimoun pe senmen, sanmenm ki i pou rekolte osi.
8 Parski sa enn ki pe senm pour fer plezir son lekor enparfe pou rekolte sa ki move* avek son lekor enparfe, me sa enn ki pe senm pour fer plezir lespri sen pou rekolte lavi eternel avek lespri sen.
9 Alor, annou pa aret fer sa ki byen parski ler letan i arive nou pou rekolte si nou pa abandonnen.*
10 Alor, tan ki nou annan loportinite, annou fer sa ki byen anver tou dimoun, me sirtou anver nou bann frer ek ser dan lafwa.
11 Mon’n ekri sa let avek mon prop lanmen, gete avek ki groser lekritir mon’n ekri.
12 Tou sa bann ki anvi fer en bon lenpresyon lo lezot* i sa bann ki esey fors zot pour sirkonsi e zot fer sa zis pour zot pa ganny persekite akoz poto martir* Kris.
13 Parski menm sa bann ki pe ganny sirkonsi, zot menm zot pa obei Lalwa. Me zot oule ki zot ganny sirkonsi pour ki zot kapab annan en rezon pour vant zot lekor akoz zot in reisi persyad zot pour ganny sirkonsi.
14 Me mon pa zanmen anvi vant mon lekor eksepte dan Senyer Zezi Kri ki’n mor lo poto martir.* Me gras a li, pour mwan, sa lemonn in fini ganny met amor* e pour lemonn, mwan ki’n fini ganny met amor.*
15 I pa enportan si en dimoun i ganny sirkonsi oubyen non, sa ki enportan se ki en dimoun i vin en nouvo kreasyon.
16 Ki tou bann ki viv dapre sa lareg e ki form parti Izrael Bondye i ganny lape ek konpasyon.*
17 Konmansman ozordi, personn pa devret fer problenm avek mwan, parski i annan bann mark en lesklav Zezi lo mon lekor.
18 Mon bann frer, ki zot leta lespri i ganny beni avek labonte ekstraordiner nou Senyer Zezi Kri. Amenn.
Bann not
^ Oubyen “en lespri ladouser.”
^ Literalman, “monk.”
^ Literalman, “destriksyon.”
^ Oubyen “fatige.”
^ Literalman, “dan laser.”
^ Vwar Leksplikasyon bann mo.
^ Vwar Leksplikasyon bann mo.
^ Oubyen “touye lo poto.”
^ Oubyen “touye lo poto.”
^ Oubyen “mizerikord.”
