Mika 6:1-16
6 Silvouple, ekout sa ki Zeova pe dir.
Leve e prezant ou defans devan bann montannyE ki bann pti montanny i tann ou lavwa.
2 Zot, bann montanny, ekout lakizasyon Zeova,Zot, bann fondasyon later ki solid, ekoute,Parski Zeova in fer en lakizasyon kont son pep.
Akoz i pou anmenn levidans kont Izrael:
3 “Mon pep, ki mon’n fer ou?
Ki mon’n fer pour fatig ou?
Temwanny kont mwan.
4 Parski mon’n tir ou Lezip,Mon ti liber ou dan pei kot ou ti lesklav.
Mon ti anvoy Moiz, Aaron ek Miriyam kot ou.
5 Mon pep, silvouple, rapel sa ki Lerwa Balak sorti Moab ti anvi ferE ki Balaam garson Beor ti reponn li,Sa ki ti arive depi Sitim ziska Gilgal,Koumsa zot pou konnen ki Zeova i fer sa ki drwat.”
6 Ki mon pou anmennen pour Zeova?
Ki mon pou anmennen ler mon pou tonm azenou devan Bondye ki dan lesyel?
Eski mon pou vin devan li avek bann lofrann brile,Avek bann pti bef enn an?
7 Eski Zeova pou kontan plizyer milye mal mouton?
Eski i pou kontan en kantite* delwil?
Eski mon pou donn mon premye garson pour mon fot?*
Eski mon pou ofer mon zanfan* pour mon pese?
8 Me Bondye in fer ou konnen kwa ki byen.
Ki Zeova pe demann ou* pour fer?
I zis demann ou pour demontre lazistis,* kontan fidelite*E avek limilite, mars* avek ou Bondye!
9 Zeova pe koz for avek bann zabitan dan lavil.
Dimoun ki annan lasazes* pou annan gran respe pour ou non.
Pran kont sa pinisyon* e sa enn ki pou pini zot.
10 Eski i ankor annan larises malonnet dan lakaz bann move dimoun?
Eski i annan en mezir efa* ki pa egzakt, ki detestab?
11 Eski mon pou pir moralman* si mon servi en balans ki pa egzaktE si mon servi bann pwa pour vol lezot?
12 Parski son bann dimoun ris i vyolan
E son bann zabitan i koz manti.
Zot anbet dimoun avek zot lalang.
13 “Pour sa rezon, mon pou tap ou e bles ou,Mon pou detri ou konpletman akoz ou pese.
14 Ou pou manze, me ou pa pou rasazye.
Ou vant pou reste vid.
Sa ki ou met dekote, ou pa pou kapab gardeE sa ki ou reisi garde, mon pou fer ou lennmi detri avek lepe.
15 Ou pou senm lagrenn, me ou pa pou rekolte.
Ou pou kraz zoliv, me ou pa pou servi sa delwil.
Ou pou fer nouvo diven, me ou pa pou bwar sa diven.
16 Parski zot obei bann lalwa Omri, zot swiv tou sa ki Aab ek son fanmir i ferE zot ekout zot konsey.
Sanmenm sa, dimoun pou soke ler mon pou pini ou.
Dimoun pou soufle ler zot pou vwar son bann zabitanE bann pep pou monk zot.”
Bann not
^ Literalman, “plizyer dizenn milye larivyer.”
^ Oubyen “revolt.”
^ Literalman, “fri mon lekor.”
^ Oubyen “demann ou an retour.”
^ Oubyen “azir dan en fason zis oubyen pa fer lapreferans.”
^ Oubyen “labonte ek lanmour fidel.” Literalman, “pour kontan lanmour fidel.”
^ Oubyen “E mars dan en fason modes.”
^ Oubyen “azir avek lasazes.”
^ Literalman, “baton.”
^ Apepre 22 lit. Vwar Lezot lenformasyon B14.
^ Oubyen “inosan.”
