Nonm 19:1-22
-
En bef rouz ek delo pirifikasyon (1-22)
19 Zeova ti osi dir Moiz ek Aaron:
2 “La en lalwa ki Zeova in donn lord pour swiv, ‘Dir bann Izraelit ki zot devret pran en bef rouz ki san defo e ki pa’n zanmen anmenn okenn zoug.*
3 Zot devret donn pret Eleazar sa bef e i pou anmenn li an deor kan. Sa bef pou ganny touye devan li.
4 Apre sa, pret Eleazar pou pran en pe disan avek son ledwa e i pou fann sa disan set fwa dan direksyon latant renyon.
5 Apre, sa bef pou ganny brile devan Eleazar. Son lapo, lavyann, disan ek son malpropte pou ganny brile.
6 Sa pret pou pran dibwa sed, lizop* ek en bout latwal gro rouz e i pou zet zot dan dife kot sa bef pe ganny brile.
7 Apre, sa pret pou lav son lenz e benny dan delo. Apre sa, i pou kapab retourn dan kan, me sa pret pou enpir ziska aswar.
8 “‘Sa dimoun ki’n bril sa bef pou lav son lenz e benny dan delo. I pou reste enpir ziska aswar.
9 “‘En zonm ki pir pou anmas lasann sa bef e i pou met sa lasann an deor kan dan en landrwa prop. Pep Izrael i devret gard li pour prepar delo ki ganny servi pour pirifikasyon. Sa i en sakrifis pour pese.
10 Sa enn ki anmas lasann sa bef pou lav son lenz e i pou enpir ziska aswar.
“‘Sa pou en lalwa permanan pour bann Izraelit ek bann etranze ki pe reste parmi zot.
11 En dimoun ki tous en lekor mor pou vin enpir pour set zour.
12 Trwazyenm zour, sa dimoun i devret pirifye son lekor avek sa delo pirifikasyon e setyenm zour i pou vin pir. Me si sa dimoun pa pirifye son lekor trwazyenm zour, i pa pou vin pir setyenm zour.
13 En dimoun ki tous en lekor mor e ki pa pirifye son lekor, i sali tabernak Zeova. Sa dimoun i devret ganny met amor parmi pep Izrael. I pou kontinyen reste enpir vi ki sa delo pirifikasyon pa’n ganny fannen lo li. I pou kontinyen reste enpir.
14 “‘La lalwa konsernan en dimoun ki mor dan en latant: Nenport dimoun ki antre dan sa latant e tou dimoun ki ti deza dan sa latant pou vin enpir pour set zour.
15 Okenn resipyan ki son kouvertir pa’n ganny byen anmare lo la pou enpir.
16 En dimoun ki dan lakanpanny ki tous en dimoun ki’n ganny touye avek lepe, en lekor mor, lezo en dimoun mor oubyen en latonm pou vin enpir pour set zour.
17 Zot devret anmenn pour sa dimoun ki enpir lasann sa sakrifis pour pese ki’n ganny brile, met li dan en resipyan e vid delo sours lo la.
18 Apre en zonm ki pir pou pran en pe lizop e tranp li dan sa delo pirifikasyon. I pou fann sa delo lo latant, lo tou bann resipyan e lo tou dimoun ki ti dan latant. I pou osi fann sa delo lo sa dimoun ki’n tous lezo en dimoun mor, en dimoun ki’n ganny touye, en lekor mor oubyen en latonm.
19 Sa dimoun pir pou fann sa delo lo en dimoun ki’n vin enpir trwazyenm zour e setyenm zour. Setyenm zour, i pou ganny pirifye avek son pese. Apre i pou lav son lenz, benny dan delo e aswar i pou vin pir.
20 “‘Me en dimoun enpir ki pa pirifye son lekor i devret ganny met amor, parski i’n sali landrwa sen Zeova. Sa delo pirifikasyon pa’n ganny fannen lo li, alor i enpir.
21 “‘Sa i en lalwa permanan pour pep Izrael: Sa dimoun ki fann sa delo pirifikasyon i devret lav son lenz e sa enn ki tous sa delo pirifikasyon pou vin enpir ziska aswar.
22 Nenport keksoz ki en dimoun enpir i touse pou vin enpir e en dimoun ki tous sa keksoz pou vin enpir ziska aswar.’”
