Let pour bann Romen 13:1-14
13 Tou dimoun i devret soumet avek bann lotorite,* parski tou lotorite i sorti kot Bondye. Sa bann lotorite in ganny met an plas dan zot diferan pozisyon par Bondye.
2 Alor, sa ki opoz lotorite i al kont laranzman Bondye, sa bann ki al kont laranzman Bondye pou ganny zize.
3 Se bann ki fer sa ki mal ki per bann dirizan, pa bann ki fer sa ki byen. Si ou pa oule per bann ki dan lotorite, kontinyen fer sa ki byen e ou pou ganny felisite,
4 parski Bondye pe servi sa bann lotorite pour ou prop dibyen. Me si ou pe fer sa ki mal, ou annan rezon pour ou per parski i pa pou nanryen ki zot annan en lepe. Bann lotorite i serviter Bondye pour pini* sa enn ki pratik sa ki mal.
5 Alor i annan en bon rezon pour zot soumet avek lotorite, pa zis akoz pinisyon me osi akoz zot konsyans.
6 Sanmenm rezon ki zot pe osi pey taks, parski sa bann lotorite i serviter Bondye ki pe servi piblik e pe kontinyelman ranpli zot devwar.
7 Donn zot sa ki zot demande: pey taks avek sa ki demann taks, pey taks ladwann avek sa ki demann taks ladwann, respekte sa enn ki demann respe, onor sa enn ki demann loner.
8 Pa bezwen dwa personn nanryen eksepte kontan kanmarad, parski sa ki kontan son prosen pe akonpli lalwa.
9 Parski dapre lalwa: “Ou pa devret komet adilter, ou pa devret komet mert, ou pa devret vole, ou pa devret groker” e lezot komannman ankor, tousala i sorti dan en sel lalwa: “Ou devret kontan ou prosen parey ou kontan ou prop lekor.”
10 Lanmour pa fer ditor son prosen, alor lanmour i akonpli lalwa.
11 Fer sa akoz zot konn lepok ki nou ladan, parski i’n ariv ler pour zot leve dan zot sonmey, parski letan pour nou ganny sove i pli pros ki ler nou ti konmans krwar dan Bondye.
12 I byen tar dan lannwit, lizour pe aprose. Alor, annou debaras nou avek bann kondwit ki annan pour fer avek fernwanr e annou pran* bann zarm lalimyer.
13 Annou konport nou byen parey dimoun ki mars lizour, pa partisip dan bann parti san kontrol, pa bwar pour sou, pa komet imoralite seksyel* ek vis,* pa fer kankan e pa zalou.
14 Plito, vin parey* Senyer Zezi Kri e pa bezwen plàn davans pour satisfer zot bann move dezir.
Bann not
^ Oubyen “gouvernman.”
^ Oubyen “eksprim lakoler Bondye lo.”
^ Literalman, “met lo nou.”
^ Grek, por·neiʹa. Vwar Leksplikasyon bann mo.
^ Oubyen “move aksyon ki ganny fer san okenn laont.” Grek, a·selʹgei·a. Vwar Leksplikasyon bann mo.
^ Oubyen “abiy zot avek.”
