Let pour bann Romen 6:1-23
6 Ki nou kapab dir alor? Eski nou devret kontinyen fer pese pour ki Bondye i demontre plis labonte ekstraordiner anver nou?
2 Ditou! Vi ki nou’n mor an sa ki konsern pese, ki mannyer nou kapab kontinyen viv dan pese?
3 Oubyen eski zot pa konnen ki nou tou ki’n batize dan Kris Zezi ti ganny batize dan son lanmor?
4 Alor nou ti ganny antere avek li atraver nou batenm dan son lanmor, pour ki zis parey Kris ti ganny resisite par pwisans* son Papa, nou osi nou devret viv en nouvo lavi.
5 Si nou’n mor parey li, sirman nou pou osi ganny resisite parey li e dan sa fason nou pou ini avek li.
6 Parski nou konnen ki nou vye personnalite ti ganny kloute lo poto avek li pour ki nou lekor enparfe i nepli annan pouvwar lo nou e ki nou nepli lesklav pese.
7 Parski sa ki’n mor in ganny akite* avek son pese.
8 Deplis, si nou’n mor avek Kris, nou krwar ki nou pou osi viv avek li.
9 Parski nou konnen ki Kris, la ki i’n ganny resisite pa pou zanmen mor ankor e lanmor i nepli annan pouvwar lo li.
10 Parski i ti mor enn fwa pour tou pour retir pese, me sa lavi ki i viv, i viv pour Bondye.
11 Pareyman zot, konsider zot lekor konman mor an sa ki konsern pese me vivan an sa ki konsern Bondye gras a Kris Zezi.
12 Alor, pa les pese kontinyen domin* lo zot lekor mortel pour ki zot pa obei dezir zot lekor mortel.
13 Zot ki’n mor me ki aprezan vivan, pa les pese servi zot lekor* konman bann zarm pour fer sa ki mal, me les Bondye servi zot lekor konman bann zarm pour fer sa ki drwat.
14 Parski pese pa devret domin lo zot, la ki zot pa anba lalwa me ki Bondye i demontre son labonte ekstraordiner anver zot.
15 Aprezan? Eski lefet ki nou pa anba lalwa e ki Bondye i demontre son labonte ekstraordiner anver nou, nou pou fer pese? Ditou!
16 Eski zot pa konnen ki si zot toultan obei en dimoun, zot vin son lesklav? Swa zot lesklav pese ki anmenn lanmor, swa zot lesklav lobeisans ki anmenn ladrwatir.
17 Me mon remersye Bondye ki menm si zot ti lesklav pese avan, aprezan zot obei Bondye avek tou zot leker e zot swiv sa model lansennyman ki zot in gannyen.
18 Wi, vi ki zot in ganny libere avek pese, zot vin lesklav ladrwatir.
19 Mon pe servi langaz tou le zour akoz febles zot lekor enparfe, parski zis parey zot ti servi zot lekor pour vin lesklav lenpirte ek lemal pour fer lemal, aprezan servi zot lekor pour vin lesklav ladrwatir pour vin sen.
20 Parski ler zot ti lesklav pese, zot pa ti oblize fer sa ki drwat.
21 Alor, ki fri zot ti raporte sa letan? Keksoz ki fer zot onte aprezan. Me konsekans sa bann keksoz se lanmor.
22 Par kont, aprezan ki zot in ganny libere avek pese e vin lesklav Bondye, zot pe raport fri, sa i sentete e rekonpans se lavi eternel.
23 Parski konsekans* pese se lanmor, me sa kado ki Bondye i donnen se lavi eternel gras a Kris Zezi nou Senyer.
Bann not
^ Literalman, “laglwar.”
^ Oubyen “pardonnen, libere.”
^ Oubyen “dominen parey en lerwa.”
^ Literalman, “bann parti zot lekor.”
^ Oubyen “saler.”
