Let Zak 3:1-18
3 Mon bann frer, i pa neseser ki en kantite zot i vin bann ansenyan, parski zot konnen ki nou pou ganny zize pli severman.
2 Parski nou tou nou souvan fer fot.* Si en dimoun pa zanmen fer okenn fot ler i koze, i en dimoun parfe ki kapab kontrol* son lekor antye.
3 Si nou met labrid dan labous bann seval pour fer zot obei nou, nou osi kontrol zot lekor antye.
4 Get osi bann bato: Menm si zot vreman gro e zot ganny pouse par bann gro divan, zot ganny dirize par en ptipti gouvernay e zot al dan nenport ki direksyon ki sa zonm ki diriz bato i oule ale.
5 Pareyman, lalang i en pti parti lekor, pourtan i vant son lekor lo bann gran gran keksoz. Gete ki mannyer zis en pti dife i kapab finalman bril en gran lafore!
6 Lalang osi i en dife. Lalang i en parti lekor ki fer en kantite keksoz mal parski i sali lekor antye e i kapab detri lavi* en dimoun. Parey Zeenn,* i anmenn destriksyon.
7 Parski tou sort kalite zannimo sovaz, zwazo, reptil ek zannimo delo sale i kapab ganny donte* e in ganny donte par imen.
8 Me bann imen pa kapab dont lalang. I pa kapab ganny kontrole e i fer ditor, i ranpli avek pwazon ki anmenn lanmor.
9 Nou loue Zeova* nou Papa avek nou lalang e pourtan avek nou lalang nou osi modi dimoun ki’n ganny fer “dan resanblans Bondye.”
10 Dan menm labous, i sorti benediksyon ek malediksyon.
Mon bann frer, i pa byen pour keksoz ariv koumsa.
11 Delo dou ek delo anmer pa kapab sorti dan menm sours delo, non?
12 Mon bann frer, en pye fig pa kapab raport zoliv oubyen en pye rezen, fig, pa i vre? Ni delo sale pa kapab vin delo dou.
13 Lekel ki saz e entelizan parmi zot? I devret annan en bon kondwit ki montre ki i fer tou keksoz avek ladouser akoz i annan lasazes.
14 Me si zot sitan zalou e kontan dispit,* pa bezwen vant zot lekor e koz manti kont laverite.
15 Sa pa lasazes ki sorti dan lesyel, i lasazes lemonn, ki demonyak e pa spirityel.
16 Parski kot i annan zalouzi ek dispit,* i pou osi annan dezord ek tou sort keksoz mal.
17 Me lasazes ki sorti dan lesyel i fer en dimoun premyerman pir, apre i fer li kontan fer lape, rezonnab, pare pour obei, annan bokou pitye,* fer bann bon aksyon,* pa fer lapreferans e pa ipokrit.
18 Deplis, fri ladrwatir i ganny senmen dan lape pour* sa bann ki pe fer lape.
Bann not
^ Oubyen “nou souvan tonbe.”
^ Oubyen “met en labrid avek.”
^ Literalman, “serk nesans (lorizin).”
^ Vwar Leksplikasyon bann mo.
^ Oubyen “kontrole.”
^ Vwar Leksplikasyon bann mo.
^ Oubyen posibleman, “annan lanbisyon egois.”
^ Oubyen posibleman, “lanbisyon egois.”
^ Oubyen “demontre mizerikord.”
^ Oubyen “raport bann bon fri.”
^ Oubyen posibleman, “par.”
