Zefanya 1:1-18
1 Zeova ti koz avek Zefanya,* garson Kousi, garson Gedalya, garson Amarya, garson Ezekya letan ki Zosya, garson Amonn, ti lerwa Zida:
2 La sa ki Zeova i dir, “Mon pou konpletman detri tou sa ki lo later.”
3 La sa ki Zeova i dir, “Mon pou detri dimoun ek zannimo.
Mon pou detri bann zwazo dan lesyel ek pwason dan lanmer,Tou sa ki fer dimoun fer pese* e osi bann move dimounE mon pou tir bann imen lo later.”
4 “Mon pou lev mon lanmen kont ZidaE kont tou zabitan Zerizalenm.
Mon pou tir tou tras ladorasyon Baal dan sa landrwaE non bann pret bann fo bondye ek bann pret enfidel.
5 Mon pou detri tou bann ki azenou devan soley, lalin ek zetwal lo twa lakaz,Bann ki azenou e fer serman pour reste fidel avek ZeovaE an menm tan fer serman pour reste fidel avek Malkam.
6 Mon pou detri bann ki’n aret swiv ZeovaE ki pa rod Zeova oubyen demann li son gidans.”
7 Reste trankil devan Souvren Senyer Zeova, parski zour Zeova i pros.
Zeova in prepar en sakrifis e i’n fer tou son bann envite vin sen.
8 “Zour sakrifis Zeova, mon pou fer bann prens rann kont,Bann garson lerwa e tou bann ki met lenz lezot nasyon pou osi rann kont.
9 Sa zour, mon pou fer tou dimoun ki mont lo platform* rann kont,Bann ki ranpli lakaz zot met avek vyolans ek mansonz.”
10 La sa ki Zeova i dir, “Sa zour,I pou annan en leokri kot Baro Pwason,Dimoun pou plennyen dan Dezyenm Distrik sa lavilE i pou annan en gro tapaz sorti dan bann pti montanny.
11 Zot bann zabitan Maktes,* plennyenParski tou bann marsan in ganny touye,Tou bann ki pez larzan* in ganny detrir.
12 Sa letan, mon pou fouy Zerizalenm anba lao avek bann lalanp,E mon pou fer tou bann ki satisfe avek zot lekor* rann kont, bann ki pe dir dan zot leker,‘Zeova pa pou fer sa ki byen ni sa ki mal.’
13 Zot larises pou ganny vole e zot lakaz pou ganny detrir.
Zot pou konstri lakaz, me zot pa pou reste ladan.
Zot pou plant plantasyon rezen, me zot pa pou bwar son diven.
14 Gran zour Zeova i pros!
I pros e i pe vin vreman vit!*
Tapaz zour Zeova i vreman fer per.
Menm bann gerye i kriye.
15 Sa i zour gran lakoler Bondye,En zour ladetres ek lafreyer,En zour tanpet ek destriksyon,En zour fernwanr e sonm,En zour nyaze e vreman sonm,
16 En zour kot dimoun pou soufle tronpet e kriyePour atak bann lavil* ek bann gran latour dan kwen miray.
17 Mon pou fer bann imen souferE zot pou mars parey dimoun aveg,Parski zot in fer pese kont Zeova.
Zot disan pou ganny vid ater parey lapousyerE zot trip* pou parey malpropte zannimo.
18 Ni zot larzan,* ni zot lor pa pou kapab sov zot zour gran lakoler Zeova i arive.
Son lakoler i parey en dife ki pou bril later antye,Parski i pou detri tou dimoun lo later, wi, i pou detri zot dan en fason terib.”
Bann not
^ Oubyen “Sofoni.” Sa non i vedir “Zeova in kasyet (protez) li.”
^ Aparaman, sa pe refer avek bann keksoz ki relye avek ador zidol.
^ Oubyen “podyonm.” Posibleman, sa i platform kot tronn lerwa ti ete.
^ Aparaman, sa pe refer avek en landrwa Zerizalenm ki o bor Baro Pwason.
^ Larzan, sa metal.
^ Literalman, “tou sa bann dimoun ki parey lanmar ki’n poze” dan fon barik diven.
^ Oubyen “pe depese.”
^ Oubyen “lavil ki ganny proteze par bann miray.”
^ Oubyen “laser.”
^ Larzan, sa metal.
