Zenez 12:1-20
12 Apre, Zeova ti dir Abram: “Kit ou pei, ou fanmir ek fanmir* ou papa e al dan sa pei ki mon pou montre ou.
2 Mon pou fer ou vin en gran nasyon, mon pou beni ou, mon pou fer ou non vin gran e ou pou vin en benediksyon pour lezot.
3 Mon pou beni bann ki beni ou e mon pou modi bann ki modi ou. Atraver ou, tou fanmir lo later pou sirman ganny beni.”*
4 Alor Abram ti ale zis parey Zeova ti’n demann li e Lot ti al avek li. Abram ti annan 75 an ler i ti kit lavil Arann.
5 Abram ti pran Saray son madanm, Lot garson son frer, tou keksoz ki zot ti’n gannyen ek tou dimoun ki ti reste avek zot Arann e zot ti al dan pei Kanaan. Ler zot ti ariv dan pei Kanaan,
6 Abram ti travers sa pei e i ti ariv Sekenm, o bor bann gran pye dibwa More. Sa letan, bann Kananeen ti pe reste dan sa pei.
7 Zeova ti aparet avek Abram e dir li: “Mon pou donn ou desandans sa pei.” Alor Abram ti konstri en lotel la pour Zeova ki ti’n aparet avek li.
8 Pli tar, i ti kit sa landrwa e al dan bann montanny ki dan les Betel. I ti mont son latant ant Betel ek Ay. Betel ti dan was e Ay ti dan les. Laba i ti konstri en lotel pour Zeova e konmans loue* non Zeova.
9 Apre, i ti kit laba e anmezir ki i ti pe al dan direksyon Negeb, i ti reste dan diferan landrwa.
10 Pli tar, i ti annan en lafanmin dan pei. Alor Abram ti desann Lezip pour li reste laba pour en pe letan* parski i ti annan en gran lafanmin dan pei.
11 Ler zot ti pros pour ariv Lezip, i ti dir Saray son madanm: “Ekout mwan silvouple! Mon konnen ki ou en zoli madanm.
12 Alor ler bann Ezipsyen pou vwar ou, zot pou dir, ‘Sa i son madanm.’ Apre, zot pou touy mwan e pran ou.*
13 Silvouple, dir zot ki ou mon ser. Gras a ou, tou pou al byen pour mwan e zot pa pou touy mwan.”
14 Dek ki Abram ti ariv Lezip, bann Ezipsyen ti remarke ki sa madanm ti vreman zoli.
15 Bann prens Faraon ti osi remark li e zot ti dir Faraon ki i ti en zoli madanm. Alor zot ti anmenn sa madanm kot lakaz Faraon.
16 Akoz Saray, Faraon ti tret Abram byen e i ti donn li bann mouton, bef, mal ek femel bourik, serviter, servant ek samo.
17 Me Zeova ti frap Faraon ek tou dimoun ki ti reste kot li avek bann gro fleo akoz Saray, madanm Abram.
18 Alor Faraon ti apel Abram e dir: “Ki ou’n fer avek mwan? Akoz ou pa ti dir mwan ki sa i ou madanm?
19 Akoz ou ti dir, ‘Sa i mon ser?’ Mon ti pros pour pran li konman mon madanm. La ou madanm. Pran li e ale!”
20 Alor Faraon ti donn lord son bann zonm pour fer li ale avek son madanm e tou sa ki i ti annan.
Bann not
^ Literalman, “lakaz.”
^ Oubyen “pou ganny en benediksyon pour zot menm.”
^ Literalman, “kriy lo.”
^ Oubyen “pour reste laba konman en etranze.”
^ Oubyen “gard ou vivan.”
