Zeremi 16:1-21
16 Zeova ti koz avek mwan ankor enn fwa e i ti dir:
2 “Ou pa devret marye e ou pa devret annan bann garson ek bann fiy dan sa landrwa.
3 Parski la sa ki Zeova i dir konsernan bann garson ek bann fiy ki’n ne isi, konsernan zot manman ki’n donn zot nesans e konsernan zot papa ki’n fer zot dan sa pei:
4 ‘Zot pou mor akoz bann maladi e personn pa pou dan dey pour zot oubyen anter zot. Zot pou vin parey fimyen ater. Zot pou mor akoz lepe e akoz lafanmin e bann zwazo dan lesyel ek bann zannimo sovaz lo later pou manz zot lekor mor.’
5 Parski la sa ki Zeova i dir,‘Pa bezwen antre dan en lakaz kot bann dimoun ki dan dey pe manz ansanmE pa bezwen ale pour plere oubyen senpatiz avek zot.’
La sa ki Zeova i dir, ‘Parski mon’n tir mon lape parmi sa pepE osi mon lanmour fidel ek konpasyon.*
6 Bann dimoun enportan ek bann dimoun ki pa enportan pou mor dan sa pei.
Zot pa pou ganny antere,Personn pa pou dan dey pour zot,Personn pa pou koup son lekor oubyen raz son latet pour zot.*
7 Personn pa pou donn manze bann dimoun ki dan deyPour konsol zot akoz en dimoun in mor.
Personn pa pou donn zot lakoup konsolasyonPour zot bwar akoz zot papa oubyen zot manman in mor.
8 Pa bezwen antre dan en lakaz kot bann dimoun pe fer lafetPour asize, manze e bwar avek zot.’
9 “Parski la sa ki Zeova Sef larme, Bondye Izrael, i dir, ‘Isi dan sa landrwa, dan zot letan e devan zot lizye, mon pou fer ki dimoun pou nepli tann bann dimoun ki pe selebre e ki dan lazwa, lavwa nouvo marye ek nouvel marye.’
10 “Ler ou pou dir sa pep tou sa bann keksoz, zot pou demann ou, ‘Akoz Zeova in dir sa gran maler kont nou? Ki fot e ki pese nou’n fer kont Zeova nou Bondye?’
11 Ou devret dir zot, ‘La sa ki Zeova i dir, “Sa i akoz zot bann zanset ti abandonn mwan e zot ti kontinyen ador lezot bondye, servi zot e azenou devan zot. Me zot ti abandonn mwan e zot pa ti obei mon lalwa.
12 Zot ti pli pir ki zot bann zanset, zot antete e zot swiv zot move leker dan plas obei mwan.
13 Alor mon pou tir zot dan sa pei e zet zot dan en pei ki zot pa konnen e ki zot bann zanset pa ti konnen. Laba, zot pou bezwen servi lezot bondye lizour ek aswar, parski mon pa pou pran pitye pour zot.”’
14 ‘La sa ki Zeova i dir, “Par kont, en letan pe vini kot zot pou nepli dir: “Mon fer serman devan Zeova sa Bondye vivan, ki ti fer pep Izrael sorti Lezip!”
15 Me plito zot pou dir: “Mon fer serman devan Zeova sa Bondye vivan, ki ti fer pep Izrael sorti dan sa pei ki dan nor e dan tou bann pei kot i ti’n dispers zot!” Mon pou fer zot retourn dan zot pei, ki mon ti donn zot bann zanset.’
16 La sa ki Zeova i dir, ‘Mon pe fer en kantite peser viniE zot pou lapes zot.
Apre, mon pou fer en kantite saser viniE zot pou sas zot lo tou montanny e lo tou pti montannyE dan bann trou ros.
17 Parski mon vwar* tou sa ki zot fer.
Zot pa kapab kasyet sa bann keksoz ki zot pe ferE mon vwar zot bann fot.
18 Premyerman, mon pou fer zot pey tou sa ki zot bezwen pour bann fot ek pese ki zot in fer,Parski zot in sali mon pei avek zot bann zidol degoutan ki pa vivan*E zot in ranpli mon leritaz avek zot bann keksoz degoutan.’”
19 O Zeova, ou mon lafors e ou mon landrwa proteksyon,Mon landrwa kasyet ler mon dan problenm,Bann nasyon partou lo later pou vin kot ouE zot pou dir: “Nou bann zanset ti erit bann keksoz ki ti anbet zot,Bann keksoz ki pa fer sans e ki pa kapab fer nanryen.”
20 Eski en zonm i kapab fer bann bondye pour li menmKan zot pa vreman bann bondye?
21 “Alor mon pou fer zot konnen,Sa letan mon pou fer zot konn mon lafors ek mon pwisansE zot pou bezwen konnen ki mon apel Zeova.”
Bann not
^ Vwar Leksplikasyon bann mo.
^ Sa i bann koutim ki bann payen ti fer ler zot ti dan dey. Aparaman, pep Izrael ti swiv sa bann koutim ler zot ti aret ador Bondye.
^ Literalman, “mon lizye i lo.”
^ Literalman, “bann lekor mor.”
