Zeremi 33:1-26
33 Ler Zeremi ti ankor fermen dan Lakour Gard, Zeova ti koz avek li en dezyenm fwa e i ti dir:
2 “La sa ki Zeova, sa Enn ki’n fer later i dir, wi, Zeova sa Enn ki’n fer later e ki’n byen etabli li, sa Enn ki apel Zeova,
3 ‘Kriy mwan e mon pou reponn ou. Mon pou kontan pour dir ou bann gran keksoz ek bann keksoz ki ou pa kapab konpran, bann keksoz ki ou pa ti konnen.’”
4 “Parski la sa ki Zeova Bondye Izrael i dir konsernan bann lakaz dan sa lavil ek bann lakaz bann lerwa Zida ki’n ganny kraze akoz bann lennmi in met en ta later apiye avek miray sa lavil e akoz lepe
5 e konsernan sa bann dimoun ki pe vin lager avek bann Kaldeen, ki pe vin ranpli sa bann landrwa avek lekor mor bann dimoun ki mon’n touye akoz mon vreman ankoler, sa bann dimoun ki’n fer bann move keksoz e ki’n fer mwan kasyet mon figir avek sa lavil:
6 ‘Mon pe fer li rekipere e reganny son lasante. Mon pou geri zot e mon pou fer zot anpe e an sekirite.*
7 Mon pou fer bann dimoun Zida ek bann dimoun Izrael ki’n ganny pran konman prizonnyen retournen e mon pou konstri zot parey mon ti fer o konmansman.
8 Mon pou pirifye zot avek tou zot bann pese ki zot in fer kont mwan e ki’n fer zot koupab. Mon pou pardonn zot pour tou zot bann pese ki zot in fer kont mwan e ki’n fer zot koupab e pour tou zot bann lofans ki zot in fer kont mwan.
9 Mon pou kontan ler mon pou tann non sa lavil. I pou fer tou bann nasyon lo later ki tann tou sa bann bon keksoz ki mon pou fer pour li, loue mwan e zot pou vwar li konman en zoli keksoz. Zot pou per e zot pou tranble akoz tou sa bann bon keksoz ki mon pou fer pour li e akoz i pou anpe.’”
10 “La sa ki Zeova i dir: ‘Konsernan sa landrwa ki zot pou dir i en dezer e ki napa dimoun oubyen zannimo laba, dan bann lavil Zida e dan bann semen Zerizalenm ki dezerte e ki napa personn ki pe reste laba oubyen zannimo, zot pou tann ankor dan sa landrwa
11 bann dimoun ki pe selebre e ki dan lazwa, lavwa nouvo marye ek nouvel marye, bann dimoun ki pe dir: “Remersye Zeova Sef larme, parski Zeova i bon e son lanmour fidel i dire pour touzour!”’
“‘Zot pou anmenn bann sakrifis remersiman dan lakaz Zeova, parski mon pou fer bann dimoun dan sa pei ki’n ganny pran konman prizonnyen retournen, parey i ti ete o konmansman.’ La sa ki Zeova in dir.”
12 “La sa ki Zeova Sef larme i dir: ‘I pou annan bann laplenn zerb ankor kot bann berze pou kapab fer zot bann troupo repoze, dan sa dezer, kot napa dimoun oubyen zannimo e dan tou son bann lavil.’
13 “‘Bann berze pou kont zot bann mouton ankor dan bann lavil ki dan bann montanny, dan bann lavil ki dan bann laplenn, dan bann lavil dan sid, dan pei Benzamen, dan zalantour Zerizalenm e dan bann lavil Zida.’ La sa ki Zeova in dir.”
14 “La sa ki Zeova i dir, ‘Gete! En letan pe vini kot mon pou akonpli sa bon promes ki mon ti fer konsernan pep Izrael ek pep Zida.
15 Dan sa letan, mon pou fer en desandans David vin en lerwa* ki fer sa ki byen* e i pou fer ki i annan lazistis ek ladrwatir dan sa pei.
16 Dan sa letan, Zida pou ganny sove e Zerizalenm pou viv an sekirite. I pou ganny apele: Zeova i nou ladrwatir.’”
17 “Parski la sa ki Zeova i dir: ‘I pou toultan annan en zonm dan desandans David ki pou asiz lo tronn pep Izrael
18 e i pou toultan annan en zonm parmi bann pret ki sorti dan tribi Levi ki pou debout devan mwan pour ofer bann lofrann brile,* pour bril bann lofrann lagrenn* e pour ofer bann sakrifis.’”
19 Zeova ti koz avek Zeremi ankor enn fwa e i ti dir:
20 “La sa ki Zeova i dir, ‘Si zot kapab kas mon lalyans konsernan lizour ek mon lalyans konsernan lannwit, pour anpes lizour ek lannwit vin dan sa moman ki zot sipoze vini,
21 zot pou kapab kas sa lalyans ki mon ti fer avek David mon serviter e i pou napa enn son garson ki pou dirize konman lerwa lo son tronn e zot pou osi kas sa lalyans ki mon ti fer avek bann pret ki sorti dan tribi Levi, mon bann serviter.
22 Zis parey zot pa kapab kont sa larme ki dan lesyel e zot pa kapab mezir disab o bor lanmer, mon pou fer desandans David mon serviter ek bann Levit ki pe servi mwan vin en kantite.’”
23 Zeova ti koz avek Zeremi ankor enn fwa e i ti dir:
24 “Ou pa’n remarke ki bann dimoun pe dir, ‘Zeova pou rezet sa de fanmir ki i’n swazir’? Zot pa pe respekte mon pep e zot nepli konsider mon pep konman en nasyon.
25 “La sa ki Zeova i dir: ‘Zis parey mon’n etabli mon lalyans konsernan lizour ek lannwit, bann lalwa* pour lesyel ek later,
26 mon pa pou zanmen rezet bann desandans Zakob ek desandans David mon serviter e mon pou fer bann dimoun dan son desandans diriz bann desandans Abraam, Izaak ek Zakob. Parski mon pou rasanble sa bann dimoun ki’n ganny pran konman prizonnyen e mon pou pran pitye pour zot.’”
Bann not
^ Oubyen “laverite.”
^ Oubyen “zeritye.”
^ Oubyen “ki drwat.”
^ Vwar Leksplikasyon bann mo.
^ Vwar Leksplikasyon bann mo.
^ Oubyen “lareg.”
