Ziz 10:1-18
10 Apre Abimelek, Tola garson Poua, garson Dodo, en zonm ki sorti dan tribi Isakar ti konmans ziz Izrael. I ti reste Samir dan bann montanny Efraim.
2 I ti ziz Izrael pour 23 an. Apre i ti mor e i ti ganny antere Samir.
3 Apre li, Zair en Gileadit ti ziz Izrael pour 22 an.
4 I ti annan 30 garson ki ti mont 30 bourik. Zot ti annan 30 lavil e ziska ozordi, sa bann lavil i apel Avot-Zair e zot dan pei Gilead.
5 Apre sa, Zair ti mor e i ti ganny antere Kamonn.
6 Ankor enn fwa, bann Izraelit ti fer sa ki mal dan lizye Zeova e zot ti konmans ador bann Baal, bann stati Astoret, bann bondye Aram,* bann bondye Sidon, bann bondye Moab, bann bondye Amonnit ek bann bondye Filisten. Zot ti abandonn Zeova e aret ador li.
7 Apre, Zeova ti pran en gran lakoler avek pep Izrael e i ti vann zot avek bann Filisten ek Amonnit.
8 Sa lannen, zot ti fer bann Izraelit martir e maltret zot. Pour 18 an, zot ti fer soufer tou bann Izraelit ki ti reste lot kote Larivyer Zourden, dan pei bann Amorit ki Gilead.
9 Bann Amonnit ti osi travers Larivyer Zourden pour lager avek tribi Zida, Benzamen ek Efraim. Izrael ti dan en kantite problenm.
10 Apre sa, bann Izraelit ti demann Zeova led e dir: “Nou’n fer pese kont ou, parski nou’n abandonn nou Bondye e ador bann Baal.”
11 Me Zeova ti dir bann Izraelit: “Pa mon ti sov zot Lezip e dan lanmen bann Amorit, Amonnit, Filisten,
12 Sidonyen, Amalekit ek Madyanit ler zot ti pe fer zot soufer? Ler zot ti demann mwan led, mon ti sov zot dan lanmen sa bann nasyon.
13 Me zot in abandonn mwan e ador lezot bondye. Sanmenm sa, mon pa pou sov zot ankor.
14 Al kot sanmenm sa bann bondye ki zot in swazir e demann zot led. Les sa bann bondye sov zot dan zot bann problenm.”
15 Me bann Izraelit ti dir Zeova: “Nou’n fer pese. Fer sa ki ou ou krwar i bon avek nou. Silvouple, zis sov nou ozordi.”
16 Alor, zot ti tir bann fo bondye* parmi zot e zot ti ador Zeova ziska ki Bondye ti nepli kapab kontinyen vwar zot soufer.*
17 Pli tar, bann Amonnit ti rasanble zot larme e etabli zot kan Gilead. Alor, bann Izraelit ti rasanble ansanm e etabli zot kan Mizpa.
18 Bann dimoun ek bann prens Gilead ti dir kanmarad: “Lekel ki pou diriz nou dan sa lager avek bann Amonnit? Sa dimoun ki fer sa pou vin sef bann zabitan Gilead.”
Bann not
^ Oubyen “Siri.”
^ Literalman, “bondye etranze.”
^ Oubyen “Bondye ti vin enpasyan akoz zot ti pe soufer.”
