Zoel 1:1-20
1 Zeova ti demann Zoel,* garson Petouel pour dir sa parol:
2 “Zot bann ansyen, ekout saE tou zabitan sa pei,* ekout byen.
Eski en keksoz koumsa in deza arive dan zot letanOubyen dan letan zot bann zanset?
3 Koz avek zot bann garson lo la,Zot bann garson pou koz avek zot garsonE zot bann garson pou koz avek sa lot zenerasyon.
4 Bann plant ki bann sotrel* in kite, sotrel ki anvole in manze.
Sa ki sotrel ki anvole in kite, sotrel ki napa lezel in manze.
Sa ki sotrel ki napa lezel in kite, sotrel ki voras in manze.
5 Zot bann soular, leve e plere!
Zot bann bwarer diven, plennyen!
Akoz i nepli annan diven dou pour zot bwar.
6 Parski en nasyon pwisan ki pa kapab ganny konte in anvai mon pei.
Son ledan i parey ledan en lyon e son lanmaswar i parey lanmaswar en lyon.
7 Sa nasyon in detri mon pye rezen e mon pye fig, i’n kit zis en siko.
I’n depouy zot konpletman e zet zot laba.
Ni menm lekors lo son bann pti brans i pa’n kite.
8 Plennyen parey en vyerz* ki’n met lenz dey*Akoz i’n perdi son nouvo marye.*
9 Parski i nepli annan lofrann lagrenn* ek lofrann diven ki ganny anmennen dan lakaz Zeova.
Bann pret ki pe servi Zeova i dan dey.
10 Bann plantasyon in ganny detrir e later i dan dey.
Parski rekolt in ganny detrir e i nepli annan nouvo diven ni delwil.
11 Bann fermye i ebete, bann travayer plantasyon rezen pe plennyenAkoz dible ek lorz*,Parski rekolt dan plantasyon in ganny detrir.
12 Pye rezen in sek,Pye fig in fletri.
Pye grenad, pye dat, pye ponm,Tou bann pye dibwa dan lakanpanny in sek.
Olye zwaye, lepep i onte.
13 Zot bann pret, met latwal goni lo zot* e tap zot lestoman.*
Zot ki pe servi kot lotel, plennyen.
Zot ki pe servi mon Bondye, vin dan tanp e pas lannwit dan latwal goni.
Parski i nepli annan lofrann lagrenn ek lofrann diven ki ganny anmennen dan lakaz ou Bondye.
14 Demann dimoun pour zennen.* Fer en lasanble spesyal.
Reini bann ansyen ek tou zabitan peiDan lakaz Zeova zot Bondye e sipliy Zeova pour ed zot.
15 Maler akoz sa zour!
Parski zour Zeova i prosE i pou parey en destriksyon sorti kot sa enn Tou Pwisan!
16 Pa manze in disparet devan nou lizyeE i nepli annan lazwa ek lakontantman dan lakaz nou Bondye?
17 Lagrenn* in sek anba zot lapel.
Bann stor i vid.
Bann grennyen* in ganny demoli akoz lagrenn in sek.
18 Menm zannimo pe plennyen!
Bann bef pa konnen kote pour ale akoz napa zerb!
Bann mouton i soufer akoz sa ki’n arive.
19 O Zeova, se ou ki mon pou kriye.
Parski dife in detri zerb dan lakanpannyE laflanm dife in detri tou pye dibwa dan pei.
20 Menm bann zannimo sovaz i vin rod led kot ou,Parski delo larivyer in sekE dife in detri zerb dan lakanpanny.”
Bann not
^ Sa non i vedir “Zeova i Bondye.”
^ Oubyen “later.”
^ Oubyen “sotrel ki manz tou.” Dan sa verse an Ebre, i servi diferan mo pour dekri kat kalite sotrel.
^ Oubyen “zenn madanm.”
^ Oubyen “latwal goni.”
^ Literalman, “msye son zenntan.”
^ Vwar Leksplikasyon bann mo.
^ Lorz i en plant parey dible ki ganny servi pour fer lafarin.
^ Oubyen “anmar zot lenz dan zot leren.”
^ Oubyen “zot pou dan dey.”
^ Vwar Leksplikasyon bann mo.
^ Oubyen posibleman, “fig sek.”
^ Oubyen “stor.”
