Zozye 14:1-15
14 Sa i bann pei ki bann Izraelit ti gannyen dan pei Kanaan ki pret Eleazar, Zozye garson Noun ek bann sef fanmir* bann tribi Izrael ti donn zot konman leritaz.
2 Zot ti tir osor* pour zot partaz zot leritaz, zis parey Zeova ti’n donn lord pour fer atraver Moiz pour sa nef tribi ek en lanmwatye tribi.
3 Moiz ti’n donn sa lot de tribi ek sa lot lanmwatye tribi zot leritaz lo lot kote* Larivyer Zourden me i pa ti donn bann Levit en leritaz parmi zot.
4 Bann desandans Zozef ti ganny konsidere konman de tribi, Manase ek Efraim. Zot pa ti donn bann Levit en par dan zot teritwar eksepte bann lavil pour zot reste ladan e bann landrwa pour zot met zot bann zannimo ek zot bann keksoz ki zot ti annan.
5 Alor, bann Izraelit ti partaz later zis parey Zeova ti’n donn lord Moiz pour fer.
6 Apre, bann zonm Zida ti al Gilgal kot Zozye. Kaleb garson Zefoune en Kenizit ti dir li: “Ou konn tre byen sa ki Zeova ti dir Moiz, serviter* sa vre Bondye konsernan ou ek mwan ler nou ti Kades-Barnea.
7 Mon ti annan 40 an ler Moiz serviter Zeova ti fer mwan kit Kades-Barnea pour al espyonn sa pei e mon ti retournen e dir li laverite.*
8 Menm si mon bann frer ki ti al avek mwan ti fer pep Izrael dekouraze,* mwan mon ti obei Zeova avek tou mon leker.*
9 Sa zour, Moiz ti fer serman e dir: ‘Sa pei kot ou’n marse pou vin en leritaz permanan pour ou ek ou bann garson akoz ou’n obei Zeova mon Bondye avek tou ou leker.’
10 Alor, zis parey i ti promet, Zeova in gard mwan vivan pandan sa 45 an depi ki Zeova ti fer sa promes avek Moiz ler Izrael ti dan dezer. Ozordi mon annan 85 an e mon ankor vivan.
11 Ozordi mon ankor for zis parey ler Moiz ti anvoy mwan dan sa pei. Mon lafors i ankor parey i ti ete avan, pour al lager e fer lezot keksoz.
12 Alor, donn mwan sa bann montanny ki Zeova ti promet sa zour. Menm si sa zour ou ti tande ki i ti annan bann Anakim laba avek bann gran lavil ki ganny proteze avek bann gro miray, sirman* Zeova pou avek mwan e mon pou pous zot zis parey Zeova ti promet.”
13 Alor, Zozye ti beni Kaleb garson Zefoune e i ti donn li Ebronn konman en leritaz.
14 Sanmenm sa, Ebronn i leritaz Kaleb garson Zefoune en Kenizit ziska ozordi, parski i ti obei Zeova Bondye Izrael avek tou son leker.
15 Avan sa, Ebronn ti apel Kiryat-Arba (Arba ti en zonm vreman enportan parmi bann Anakim). I ti nepli annan lager dan sa pei e i ti anpe.
Bann not
^ Literalman, “sef lakaz paternel.”
^ Vwar Leksplikasyon bann mo.
^ Setadir, kote les.
^ Oubyen “zonm.”
^ Literalman, “avek en parol parey i ete dan mon leker.”
^ Literalman, “fer leker bann dimoun fonn.”
^ Literalman, “konpletman.”
^ Oubyen “mon asire.”
