Zozye 20:1-9
-
Bann lavil refiz (1-9)
20 Apre, Zeova ti dir Zozye:
2 “Dir bann Izraelit, ‘Swazir pour zot menm bann lavil refiz* ki mon ti koz avek zot lo la atraver Moiz,
3 pour ki sa enn ki touy en dimoun par aksidan,* san fer par ekspre, i kapab sov laba. Sa bann lavil pou vin en refiz pour zot kont sa fanmir ki pou revanze.*
4 Sa dimoun ki’n touy en lot dimoun pou bezwen sov dan enn sa bann lavil. I pou bezwen debout dan larantre baro lavil e eksplik son ka avek bann ansyen dan sa lavil. Apre, zot pou bezwen aksepte li dan sa lavil e donn li en landrwa reste parmi zot.
5 Si sa fanmir ki pou revanze i tay deryer sa dimoun ki’n touy en lot dimoun, zot pa devret donn li avek sa fanmir ki pe vin revanze, parski i’n touy son kanmarad par aksidan,* me pa akoz i ti ay li.
6 I bezwen reste dan sa lavil ziska ki i ganny zize devan sa pep* e reste laba ziska lanmor granpret ki la sa letan. Apre sa, sa dimoun i kapab retourn dan son lavil e i kapab antre dan son lakaz.’”
7 Alor, zot ti fer sa bann lavil vin sakre,* Kedes ki Galile dan bann montanny Naftali, Sekenm dan bann montanny Efraim ek Kiryat-Arba, setadir Ebronn dan bann montanny Zida.
8 Dan rezyon Zourden, les avek Zeriko, zot ti swazir lavil Beser ki ti dan dezer lo plato e ki ti tonm dan teritwar tribi Ribenn. Dan teritwar tribi Gad zot ti swazir Ramot ki Gilead e dan teritwar tribi Manase, zot ti swazir Golann ki Basann.
9 Sa bann lavil ti ganny swazir pour tou bann Izraelit ek bann etranze ki pe reste parmi zot, pour ki nenport dimoun ki touy en lot dimoun san fer par ekspre, i kapab sov laba e pa ganny touye par sa fanmir ki pou revanze, avan ki i ganny zize devan sa pep.*
Bann not
^ Oubyen “bann lavil ki zot kapab sov ladan.”
^ Oubyen “san konnen.”
^ Oubyen “kont sa enn ki revanze pour disan.”
^ Oubyen “san konnen.”
^ Probableman, sa pe refer avek bann ziz ki reprezant sa pep.
^ Oubyen “zot ti met apar.”
^ Probableman, sa pe refer avek bann ziz ki reprezant sa pep.
