1. Ki mannyer bokou dimoun, enkli bann vre Kretyen i santi parfwa?

ESKI Zeova i kontan ou personnelman? Serten dimoun i dakor ki Bondye i kontan limanite an zeneral, parey Zan 3:16 i dir. Me an realite zot santi ki ‘Bondye pa pou zanmen kapab kontan mwan personnelman.’ Menm bann vre Kretyen i kapab santi koumsa parfwa. En zonm ki ti dekouraze ti dir: “Mon vwar li vreman difisil pour krwar ki Bondye i enterese avek mwan.” Eski parfwa ou osi, ou santi koumsa?

2, 3. Lekel ki anvi fer nou krwar ki Zeova pa apresye nou oubyen pa kontan nou, e ki mannyer nou kapab sirmont sa santiman?

² Satan i vreman anvi fer nou krwar ki Zeova pa ni kontan nou e pa ni apresye nou. I vre ki souvannfwa Satan i servi lafyerte ek lorgey ki dimoun i annan pour anbet zot. (2 Korentyen 11:3) Me i osi pran plezir pour fer dimoun mank respe pour zot lekor. (Zan 7:47-49; 8:13, 44) Sa i sirtou leka dan sa “bann dernyen zour” ki vreman difisil. Bokou dimoun i grandi dan bann fanmiy kot dimoun i “annan leker dir.” Lezot i bezwen toultan fer fas avek dimoun ki vyolan, egois e anfle avek lorgey. (2 Timote 3:1-5) Grandi dan en lanvironnman kot i annan rasis, laenn e osi ganny maltrete i kapab fer serten dimoun krwar ki personn pa kontan zot oubyen ki zot pa vo nanryen.

³ Si ou santi koumsa, pa bezwen dezespere. Bokou nou i sever avek nou lekor parfwa. Me pa oubliye ki Parol Bondye i la pour “remet drwat” e pour ‘detri bann fo rezonnman.’ (2 Timote 3:16; 2 Korentyen 10:4) Labib i dir: “Nou posed lasirans devan li. Se ki dan nenport ki sirkonstans ki nou leker i kondann nou, nou konnen ki Bondye i pli  gran ki nou leker e i konn tou.” (1 Zan 3:19, 20) Annou egzamin kat fason kot Labib i ed nou pour “posed lasirans” ki Zeova i kontan nou.

4, 5. Ki mannyer legzanp Zezi konsernan sren i montre ki nou annan valer dan lizye Zeova?

⁴ Premyerman, Labib i klerman montre ki Bondye i apresye sak son serviter. Par egzanp, Zezi ti dir: “Eski de pti sren pa i vann pour en sou? Me en sel pa tonm ater san lavolonte zot Papa, me menm, bann bren seve lo zot latet in konte. Alor pa bezwen per, zot vo bokou plis ki en kantite sren!” (Matye 10:29-31) Annou egzaminen ki sa parol ti vedir pour sa bann ki ti ekout Zezi dan premye syek.

⁵ Petet nou kapab demande, akfer en dimoun ti pou aste en sren? Dan letan Zezi, sren ti sa zwazo pli bon marse ki ti ganny vann konman manze. Remarke ki avek en sou, en dimoun ti kapab aste de sren. Me Zezi ti fer resorti plitar, ki si en dimoun ti donn de sou, i ti ganny senk sren olye kat. Sa enn anplis ti ganny azoute konmsi i ti napa valer. Petet sa bann zwazo ti napa valer dan lizye zonm, me konman Kreater ti vwar zot? Zezi ti dir: ‘Napa enn [ni sa senkyenm ki’n ganny azoute] ki Bondye i oubliye.’ (Lik 12:6, 7) Aprezan nou kapab konmans konpran sa pwen ki Zezi ti oule fer resorti. Si Zeova i atas sitan valer avek en senp sren, konbyen plis valer en imen i annan alor! Parey Zezi ti eksplike, Zeova i konn tou detay lo nou. Annefe, menm bren seve lo nou latet in ganny konte!

6. Akoz nou kapab asire ki Zezi pa ti pe egzazere kan i ti dir ki nou bren seve in ganny konte?

⁶ Eski vreman Zeova i konnen ki kantite bren seve nou annan? Serten i kapab mazinen ki Zezi ti pe egzazere. Me zis mazin en kou lo rezireksyon. Sirman Zeova i bezwen  konn nou byen pour li kapab redonn nou lavi! I sitan apresye nou ki i rapel tou pti detay lo nou, menm nou kod zenetik e tou nou bann souvenir ek leksperyans. * Ler nou konpar sa ki enplike dan rezireksyon avek kont nou bren seve​—ki normalman pous apepre 100,000 bren lo nou latet​—i evidan ki sa pou en senp keksoz pour li fer.

7, 8. (a) Ki serten kalite ki Zeova i kontan pour vwar kan i egzamin leker imen? (b) Ki serten travay nou fer ki presye pour Zeova?

⁷ Dezyenmman, Labib i ansenny nou bann keksoz ki Zeova i apresye dan son bann serviter. I kontan nou bann bon kalite ek zefor ki nou fer. Lerwa David ti dir son garson Salomon ki Zeova pe egzamin tou leker, e i konn tou panse. (1 Kronik 28:9) Anmezir ki Bondye i egzamin sa plizyer bilyon leker dan sa lemonn ki ranpli avek vyolans ek laenn, i bezwen fer li plezir kan i vwar en dimoun ki dan son leker i kontan lape, laverite ek ladrwatir! Ki i arive ler Bondye i vwar en leker ki ranpli avek lanmour pour li, ki anvi konn li e anvi partaz sa konnesans avek lezot? Zeova i dir nou i remark sa bann ki koz lo li avek lezot. I menm annan en “liv souvenir” pour bann “ki annan lakrent pour Zeova e pour bann ki pans lo son non.” (Malaki 3:16) Sa bann kalite i presye pour li.

⁸ Ki serten bon aksyon ki Zeova i apresye? Sirman i nou zefor pour imit son Garson, Zezi Kri. (1 Pyer 2:21) En travay enportan ki Bondye i apresye i predikasyon sa bon nouvel lo son Rwayonm. Romen 10:15 i dir: “I en keksoz merveye pour war arive bann ki anons bonn nouvel!”  Normalman, petet nou pa pou mazinen ki nou “merveye” oubyen ki nou lipye i zoli parey Traduction du monde nouveau i dir. Me sa lekspresyon dan sa verse i reprezant sa zefor ki bann serviter Zeova i fer pour pres sa bon nouvel. Tou sa bann zefor i presye e zoli dan lizye Zeova.​—Matye 24:14; 28:19, 20.

9, 10. (a) Akoz nou kapab asire ki Zeova i apresye nou kan nou andir diferan kalite difikilte? (b) Ki pwennvi negatif ki Zeova pa zanmen annan lo son bann serviter fidel?

⁹ Zeova i osi apresye ler nou andire. (Matye 24:13) Pa oubliye, Satan i anvi ou rezet Zeova. Sak zour ki ou reste fidel avek Zeova, i en zour anplis ki ou’n ede pour reponn provokasyon Satan kont Zeova. (Proverb 27:11) Parler i pa fasil pour andire. Bann problenm lasante, larzan, depresyon ek lezot lobstak i kapab fer li difisil. Ler sa ki nou ti pe ekspekte pa arive i kapab dekourazan osi. (Proverb 13:12) Kan ou kontinyen andir sa bann difikilte, ou vin pli presye devan Zeova. Se pour sa rezon ki Lerwa David ti demann Zeova pour met son larm dan en “boutey.” Avek  konfyans i ti azoute: “Eski pa zot dan ou liv?” (Psonm 56:8) Wi, Zeova i mazin tou sa larm ki nou verse e tou sa soufrans ki nou andire pour gard nou fidelite avek li. Tousala i presye pour li.

¹⁰ Me dan nou leker nou kapab tant pour rezet sa bann levidans ki nou presye dan lizye Zeova. Nou kapab kontinyelman mazinen ki: ‘I annan bokou lezot ki demontre pli bon legzanp ki mwan. Zeova i bezwen dezapwente kan i konpar mwan avek zot!’ Zeova pa fer konparezon; e son fason panse pa strik oubyen dir. (Galat 6:4) Avek bon zizman e bokou latansyon, Zeova i lir nou leker e i apresye sa ki bon, menm si i pti gin.

11. Ki nou kapab aprann lo Zeova par lafason ki i ti tret Abiya?

¹¹ Trwazyenmman, anmezir ki Zeova i egzamin nou, i rod sa ki bon dan nou. Par egzanp, kan Zeova ti dir ki fanmiy antye Lerwa Yarobam ti pou ganny egzekite akoz zot ti vir ledo avek li, I ti donn lord ki en garson Lerwa, Abiya i ganny en bon lanterman. Akoz sa? “En bon keksoz anver Zeova Bondye Izrael in ganny vwar dan li.” (1 Lerwa 14:1, 10-13) Annefe, Zeova ti egzamin avek swen dan leker sa zennonm, e i ti vwar en “bon keksoz” dan son leker. Menm si sa bon keksoz ti kapab pti oubyen pa enportan, Zeova ti vwar ki sa ti merite ganny ekrir dan son Parol. I ti menm rekonpans li, par pran pitye pour en manm sa fanmiy ki ti rebel kont li.

12, 13. (a) Ki mannyer sa ka avek Yeosafat i montre nou ki Zeova i rod sa ki bon dan nou menm ler nou fer pese? (b) Ki mannyer Zeova i azir konman en Paran ki annan lanmour pour son zanfan konsernan nou bann bon travay ek kalite?

¹² Nou kapab vwar en lot legzanp pli remarkab dan ka sa bon Lerwa Yeosafat. Kan sa lerwa ti fer en fot bet, profet Zeova ti dir li: “Zeova i annan en gran lakoler kont ou.” Pa  sa ti en panse ki fer reflesir! Me mesaz Zeova pa ti fini la. I ti kontinyen: “Kantmenm sa, i annan bann bon keksoz ki’n ganny vwar dan ou.” (2 Kronik 19:1-3) Alor, menm si lakoler Zeova ti zistifye, sa pa ti anpes li vwar bann bon keksoz dan Yeosafat. Pa Zeova i diferan avek bann imen enparfe! Kan nou annan en dezakor avek lezot, nou kapab tant pour pa rekonnet bann bon keksoz dan zot. Deplis, sa dezapwentman, laont ek remor-d-konsyans ki nou santi ler nou fer pese i kapab fer nou pa vwar sa ki bon dan nou. Me pa oubliye ki si nou repantir e fer bokou zefor pour pa repet zot ankor, Zeova i pardonn nou.

¹³ Anmezir ki Zeova i egzamin ou, i rezet sa bann pese zis parey en dimoun ki pe fouye pour rod en trezor i rezet sa later ek lezot keksoz ki napa valer. Me konsernan ou bann bon kalite ek travay ki ou fer? Wi, sa i bann keksoz ki i garde! Eski ou’n deza remarke ki mannyer serten paran i kontan anmas desen oubyen bann proze lekol ki zot zanfan i fer, parler en kantite letan apre ki zot zanfan in oubliy sa bann keksoz? Zeova i sa paran ki annan plis  lanmour pour son bann zanfan. Osi lontan ki nou reste fidel avek li, i pa pou zanmen oubliy nou bann bon travay ek nou bann bon kalite. Annefe, i pou konsider li enzis lo son par pour oubliy sa bann keksoz e i pa zanmen enzis. (Ebre 6:10) I osi egzamin nou dan en lot fason.

14, 15. (a) Akoz nou lenperfeksyon pa anpes Zeova vwar sa ki bon dan nou? Eksplike. (b) Ki Zeova pou fer avek sa bann bon kalite ki i vwar dan nou, e ki mannyer i vwar son bann serviter fidel?

¹⁴ Zeova i get pli lwen ki nou lenperfeksyon e i vwar sa ki nou pou kapab fer dan lavenir. Annou konsider en legzanp. Bann dimoun ki kontan lar pou fer bokou zefor pour repar bann tablo oubyen lezot travay lar ki’n ganny andomaze. Par egzanp, dan Galeri Nasyonal Lonn, Langleter, en dimoun ti tir bal fizi e andomaz en desen ki Leonardo da Vinci ti fer. Sa desen ti vo apepre 30 milyon dolar Ameriken. Personn pa ti sizere ki sa desen i devret ganny zete vi ki i ti’n ganny andomaze. Deswit travay pour repar sa tablo ki annan preski 500 an ti konmanse. Akoz zot ti fer tou sa zefor? Akoz sa desen ti presye pour bann ki kontan lar. Eski ou, pa ou annan plis valer ki en desen ki’n ganny fer avek lakre ek sarbon? Dan lizye Bondye ou presye menm si pese ki ou’n erite in afekte ou dan en serten fason. (Psonm 72:12-14) Zeova, ki Kreater imen, pou fer tou sa ki neseser pour fer tou bann ki fidel avek li vin parfe.​—Akt 3:21; Romen 8:20-22.

¹⁵ Wi, Zeova i vwar sa ki bon dan nou ki nou kapab pa vwar dan nou menm. Deplis, ler nou servi li i pou fer sa ki bon grandi dan nou ziska ki nou finalman vin parfe. Nenport ki fason sa lemonn Satan i tret nou, Zeova i vwar son bann serviter fidel presye.​—Agai 2:7.

16. Ki pli gran laprev ki Zeova i kontan nou, e ki mannyer nou konnen sa ranson in ganny ofer pour nou personnelman?

¹⁶ Katriyenmman, Zeova in fer bokou pour prouve ki i kontan nou. Sirman, sakrifis Kris i larepons pli efikas anver  mansonz Satan konmkwa nou pa vo nanryen oubyen Zeova pa kontan nou. Nou pa devret zanmen oubliye ki sa lanmor kriyel ki Zezi ti soufer lo poto e sa soufrans ki Zeova ti andire kan i ti get son Garson byenneme pe mor i laprev ki zot kontan nou. Malerezman, bokou dimoun i vwar li difisil pour krwar ki sa kado in ganny fer pour zot personnelman. Zot santi ki zot pa merit sa. Me mazinen ki zapot Pol ti en persekiter bann vre Kretyen. Pourtan, i ti ekrir apre: ‘Garson Bondye ki’n kontan mwan e ki’n donn son lavi pour mwan.’​—Galat 1:13; 2:20.

17. Par ki mwayen Zeova i atir nou anver li ek son Garson?

¹⁷ Zeova i prouve ki i kontan nou personnelman par ed nou benefisye avek sakrifis Kris. Zezi ti dir: “Personn pa kapab vin kot mwan, si mon Papa ki’n anvoy mwan, pa atir li kot mwan.” (Zan 6:44) Wi, Zeova i atir nou personnelman anver son Garson e i osi donn nou sa lespwar pour viv eternelman. Ki mannyer i fer sa? I’n fer sa par mwayen predikasyon, kot nou’n personnelman ganny en temwannyaz. I osi servi son lespri sen pour ed nou konpran e aplik bann laverite, kantmenm nou enparfe e annan serten limit. Alor, Zeova i kapab dir sa lo nou parey i ti dir lo Izrael: ‘Avek en lanmour pour touzour mon’n kontan ou. Se pour sa rezon ki mon’n atir ou avek labonte leker.’​—Zeremi 31:3.

18, 19. (a) Ki sa fason pli entim ki Zeova in demontre son lanmour pour nou, e kwa ki montre i enterese avek nou personnelman? (b) Ki mannyer Parol Bondye i asir nou ki Zeova i santi nou douler ler i ekout nou?

¹⁸ Petet atraver sa privilez ki nou annan pour priye ki nou eksperyans lanmour Zeova dan en fason pli entim. Labib i envit nou tou pour “priye tou letan.” (1 Tesalonisyen 5:17) Kan nou priye, Bondye i ekout nou. I menm  ganny apele konman sa enn “ki ekout lapriyer.” (Psonm 65:2) I pa’n donn personn sa plas pour ekout nou lapriyer, ni menm son prop Garson. Zis mazin sa: Kreater liniver i ankouraz nou pour apros li dan lapriyer, e dir li tou sa ki nou anvi. Ki mannyer i ekoute? Eski i ekout nou san konpasyon, santiman, oubyen konmsi i pa enterese? Non, i pa koumsa.

¹⁹ Zeova i pare pour konpran e santi nou douler. Ki sa i enplike? En Kretyen aze ti dir, “Se ou douler dan mon leker.” Eski nou bann soufrans i vreman fer lefe lo Zeova? Konsernan soufrans son pep Izrael, Labib i dir: “Pandan ki zot ti pe pas dan soufrans, sa ti fer li soufer.” (Izai 63:9) Zeova pa ti zis vwar zot difikilte, i ti santi douler sa pep. Zeova ti dekrir sa profon santiman ki i annan pour son pep par dir: “Sa ki pe tous zot pe tous mon kannet lizye.” * (Zekarya 2:8) Pa sa i fer mal! Wi, Zeova i santi sa ki nou santi, kan nou soufer, li osi i soufer.

20. Si nou anvi obeir sa konsey dan Romen 12:3, ki pwennvi nou devret rezete?

²⁰ Vi ki Zeova in prouve ki i kontan nou, alor, en Kretyen ki annan bon rezonnman pa pou servi sa konman en leskiz pour vin orgeye oubyen egois. Zapot Pol ti ekrir: “Par lagras spesyal ki Bondye in donn mwan, mon dir avek zot tou: pa bezwen ki zot ganny en tro gran lopinyon lo zot menm. Okontrer ki zot rezonnab, e mezir zot valer dapre zot par lafwa ki Bondye in donn zot.” (Romen 12:3) Anmezir ki nou eksperyans lanmour nou Papa dan lesyel,  annou toultan gard en bon rezonnman e mazinen ki nou pa kapab fer nanryen pour ganny oubyen merit son lanmour.​—Lik 17:10.

21. Ki bann mansonz Satan nou bezwen kontinyen reziste, e ki laverite dan Labib ki nou kapab kontinyen annan konfyans ladan?

²¹ Annou fer tou zefor posib pour rezet tou mansonz Satan, enkli sa mansonz ki nou napa valer oubyen personn pa kontan nou. Si ou leksperyans dan lavi in fer ou krwar ki Bondye pa pou zanmen kapab kontan ou oubyen ki ou bann bon aksyon napa okenn lenportans, oubyen ou pese i tro gro pour lanmor son Garson kouver, dan sa ka ou’n ganny ansennyen en mansonz. Avek tou ou leker, rezet sa bann mansonz! Annou kontinyen annan konfyans dan sa laverite ki Pol ti ekrir anba lenspirasyon: “Mon annan sa lasirans ki ni lanmor, ni lavi, ni bann lanz, ni bann pouvwar, ni letan prezan, ni lavenir, ni okenn pisans, ni bann zabitan dan lemonn ki anler, ni dan lemonn ki anba, ni okenn lezot kreatir pa pou zanmen kapab separ nou avek lanmour Bondye dan Kris-Zezi nou Senyer.”​—Romen 8:38, 39.