1-3. Nonm serten keksoz ki ti fer lanmor Zezi diferan avek lezot lanmor dan listwar.

APEPRE 2000 an pase, en zonm inosan ti ganny arete, ganny trouve koupab pour krim ki i pa ti fer e answit ganny tortire ziska ki i ti ganny met amor. Sa pa ti premye lanmor kriyel e enzis ki ti arive dan listwar; e malerezman i pa ti sa enn dernyen osi. Me sa lanmor pa ti parey avek lezot lanmor.

² Anmezir ki sa zonm ti soufer dan bann dernyen moman son lavi, lafason ki lesyel ti sanze ti montre ki sa levennman ti tre enportan. Kantmenm i ti gran midi, en sel kou partou ti vin fernwanr. En istoryen ti ekrir ki sa zour “soley ti aret donn son lalimyer.” (Lik 23:44, 45) Apre, zis avan sa zonm ti pran son dernyen lespirasyon, i ti dir en parol inoubliyab: “Tou in akonpli!” Annefe, par donn son lavi i ti akonpli en keksoz merveye. Son sakrifis ti sa gran pli akt lanmour ki okenn imen in deza demontre.​—Zan 15:13; 19:30.

³ Byensir, sa zonm ki nou pe koz lo la, se Zezi. Preski tou dimoun i konn byen son soufrans ek lanmor ki ti ariv le 14 Nizan, lannen 33 N.L. Me i annan en keksoz enportan ki souvan in ganny inyore. Menm si Zezi ti soufer en kantite, i annan en lot ki ti soufer plis ankor. Annefe, ti annan en lot ki ti fer en pli gran sakrifis sa zour. Sa i pli gran akt lanmour ki okenn dimoun in deza fer dan liniver. Lo ki nou pe koze? Larepons sa kestyon i ofer en lentrodiksyon apropriye pour sa size pli enportan. Sa se lanmour Zeova.

4. Ki mannyer sa zofisye larme Romen ti rekonnet ki Zezi pa ti en zonm ordiner, e ki konklizyon i ti tire?

⁴ Sa zofisye larme Romen ki ti sirvey legzekisyon Zezi ti sirprann par sa fernwanr ek sa gro tranbleman-d-ter ki ti arive apre lanmor Zezi. I ti dir: “Vreman sa ti garson Bondye.” (Matye 27:54) I kler ki Zezi pa ti en zonm ordiner. Sa solda ti ede touy sa sel Garson, Bondye Tre O! Ki kantite presye sa Garson ti presye pour son Papa?

5. Ki kantite letan Zezi ti pase avek son Papa avan ler i ti vin lo later?

⁵ Labib i dir ki Zezi i “premye-ne tou kreasyon.” (Kolosyen 1:15) Zis mazin sa, Garson Zeova ti egziste avan liniver. Alor, ki kantite letan zot in pase ansanm? Serten syantis i estimen ki liniver i annan 13 bilyon lannen. Eski ou kapab mazin sa kantite letan? Menm si liniver i vreman annan 13 bilyon lannen, i probab ki Garson Zeova in viv bokou plis letan ki sa! Ki i ti fer pandan tou sa letan?

6. (a) Ki travay Garson Zeova ti fer ler i ti ankor dan lesyel? (b) Ki kalite relasyon ki egziste ant Zeova ek son Garson?

⁶ Pandan tou sa letan, sa Garson ti travay avek lazwa konman “zouvriye abil” son Papa. (Proverb 8:30) Labib i dir: “Napa nanryen dan kreasyon ki’n ganny fer san [sa Garson].” (Zan 1:3) Alor, Zeova ek son Garson ti travay ansanm pour kree tou lezot keksoz. Zot ti pas bann bon moman ansanm! Bokou dimoun pou dakor ki sa lanmour ki egziste ant paran ek zanfan i vreman for. Deplis ‘lanmour i soud tou keksoz parfetman ansanm dan larmoni.’ (Kolosyen 3:14) Alor, lekel parmi nou ki kapab vreman konpran ki kantite pros Zeova ek son Garson ti pros avek kanmarad apre tou sa letan ki zot in pas ansanm? I kler ki Zeova ek son Garson i ini ansanm par en lyen lanmour pli for ki’n deza egziste.

7. Ki mannyer Zeova ti eksprim son santiman kan son Garson ti batize?

⁷ Kantmenm sa, Zeova ti anvoy son Garson lo later pour  ne konman en pti baba. Pour Zeova fer en keksoz parey ti vedir ki pour en pe letan i ti pou bezwen perdi sa relasyon vreman pros ki i ti annan avek son Garson byenneme dan lesyel. Avek bokou lentere, Zeova ti obzerv Zezi anmezir ki i ti grandi pour vin en zonm parfe. Apepre laz 30 an, Zezi ti batize. Nou pa bezwen esey devinen ki mannyer Zeova ti santi konsernan son Garson sa zour. Zeova li menm ti dir: “Sa mon Garson byenneme, ki donn mwan bokou lazwa.” (Matye 3:17) Letan i ti vwar ki Zezi ti fidelman fer tou sa ki ti’n ganny profetize, tou sa ki i ti demann li, son Papa ti’n bezwen santi li vreman kontan!​—Zan 5:36; 17:4.

8, 9. (a) Ki Zezi ti andire le 14 Nizan lannen 33 N.L., e ki lefe sa ti fer lo son Papa dan lesyel? (b) Akoz Zeova ti les son Garson soufer e mor?

⁸ Me ki mannyer Zeova ti santi le 14 Nizan lannen 33 N.L.? Ki mannyer i ti santi kan Zezi ti ganny trai e ganny arete par en lafoul? Kan son bann zanmi ti abandonn li e ler i ti ganny akize pour nanryen ditou? Ler zot ti sikann li, kras dan son figir, e donn li kou-d-pwen? Anmezir ki i ti ganny fwete, kot son ledo ti ganny sizle? Ler i ti ganny kloute, lanmen ek lipye, lo en poto dibwa e ganny les anpandan anmenmtan ki dimoun ti ensilte li? Konman sa Papa ti santi kan son Garson ti kriy ver li dan son soufrans? Konman Zeova ti santi kan Zezi ti respir pour dernyen fwa e ti nepli la pour premye fwa depi konmansman kreasyon?​—Matye 26:14-16, 46, 47, 56, 59, 67; 27:38-44, 46; Zan 19:1.

⁹ Nou pa trouv mo pour eksprim sa douler ki i ti’n bezwen santi. Vi ki Zeova i annan santiman, nou pa kapab trouv mo pour eksprim son santiman ler son Garson ti mor. Me sa ki nou kapab dir, se akoz Zeova ti permet sa arive. Akoz sa Papa ti bezwen pas atraver sa kantite soufrans? Larepons i ganny trouve dan en verse Labib kot Zeova i revel en keksoz merveye avek nou e nou kapab dir ki Levanzil antye i baze lo la. Sa i Zan 3:16 ki dir: “Parski  Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor me i a ganny lavi eternel.” Alor, se lanmour ki ti motiv li pour fer sa. Anvoy son Garson pour soufer e mor pour nou, i en kado ki Zeova ti donn nou e sa ti pli gran akt lanmour ki’n deza ganny fer.

10. Ki imen i bezwen dan lavi e ki’n arive avek sinifikasyon sa mo “lanmour”?

¹⁰ Ki savedir sa mo “lanmour”? Lanmour i sa pli gran keksoz ki imen i bezwen. Depi nesans ziska lanmor, imen i fer bokou zefor pour ganny lanmour. Zot santi zot byen ler lezot i kontan zot, zot menm ganny afekte e mor si lezot pa kontan zot. Toudmenm, i difisil pour eksplike ki savedir lanmour. Byensir, dimoun i koz en kantite lo lanmour. I toultan annan en kantite liv, sanson ek poenm lo lanmour. Me kantmenm i annan tousala, zot pa toultan fer kler ki savedir lanmour. Lefe ki sa mo in telman ganny servi in vin pli difisil pour konn son vre sinifikasyon.

11, 12. (a) Kote nou pou ale pour aprann plis lo lanmour, e akoz? (b) Ki kalite lanmour ki’n ganny spesifye dan langaz Grek, e ki mo pour “lanmour” ki’n ganny servi pli souvan dan Lekritir Grek Kretyen? (Vwar osi not anba lo paz.) (c) Ki savedir a·gaʹpe?

¹¹ Me Labib i fer kler ki savedir lanmour. Vine’s Expository Dictionary of New Testament Words i dir ki ou kapab konpran kisisa lanmour selman par bann aksyon ki ganny fer pour demontre li. Bann resi Labib konsernan sa ki Zeova in fer i ansenny nou en kantite lo son lanmour, ki enkli sa gran lafeksyon ki i annan pour son kreasyon. Par egzanp, kwa ki pou ed nou konpran pli byen sa kalite ki sa akt lanmour Zeova in demontre, ki nou’n diskite pli boner? Dan bann sapit ki pou swiv nou pou vwar bokou lezot legzanp lanmour Zeova an aksyon. Deplis, nou pou kapab ganny en pli bon apersi par egzamin bann mo orizinal  pour “lanmour” ki ganny servi dan Labib. Dan ansyen langaz Grek, ti annan kat mo pour “lanmour.” * Parmi sa kat mo, sa enn ki ganny servi pli souvan dan Lekritir Grek Kretyen i a·gaʹpe. En diksyonner lo Labib i dekrir sa mo a·gaʹpe, konman “mo pli pwisan ki’n ganny envante pour lanmour.” Akoz sa?

¹² A·gaʹpe i relye avek lanmour ki ganny gide par prensip. Alor sa lanmour i pa zis en lemosyon ki pous nou pour azir anver en lot dimoun. Sa kalite lanmour i enplik plis keksoz, i annan pour fer avek refleksyon ek volonte. Me sirtou, a·gaʹpe i en lanmour ki pa ditou egois. Par egzanp, annou get ankor Zan 3:16. Lekel sa “lemonn” ki Bondye ti telman kontan ki i ti donn son sel Garson? I bann imen ki kapab ganny sove. Sa i enkli bokou dimoun ki pe viv en move lavi. Eski Zeova i kontan sakenn antre zot konman en zanmi, parey i ti kontan Abraam? (Zak 2:23) Non, me selman Zeova i demontre labonte anver tou dimoun, menm si i kout li ser. I anvi ki tou dimoun i repantir e sanz zot fason viv. (2 Pyer 3:9) I annan bokou ki fer li. Sa bann ki’n fer li, avek lazwa Zeova i akey zot konman son bann zanmi.

13, 14. Kwa ki montre ki a·gaʹpe i souvan enkli lafeksyon?

¹³ Me serten dimoun i annan en move pwennvi lo a·gaʹpe. Zot panse ki sa kalite lanmour i fre, en keksoz ki ou aprann dan liv. An realite, souvannfwa a·gaʹpe i enkli en lafeksyon personnel pour lezot. Par egzanp, kan Zan ti ekrir, “Papa i kontan son Garson,” i ti servi en form sa mo  a·gaʹpe. Eski sa kalite lanmour napa lafeksyon ladan? Remarke ki Zezi ti dir, “Papa i kontan [annan lafeksyon pour, NW] son Garson.” Safwasi i ti servi en mo ki ti sorti dan sa mo phi·leʹo. (Zan 3:35; 5:20) Lanmour Zeova i souvannfwa enkli en lafeksyon profon. Me son lanmour pa zanmen ganny enfliyanse senpleman par santiman. Son lanmour i toultan ganny gide par son bann prensip saz e zis.

¹⁴ Parey nou’n vwar, tou bann kalite Zeova i eksepsyonnel, parfe, e atiran. Me lanmour i sa kalite ki pli atiran. Napa nanryen ki atir nou avek Zeova sitan en kantite koumsa ki son lanmour. Gran mersi lanmour i osi son kalite dominan. Ki mannyer nou konn sa?

15. Ki Labib i dir konsernan lanmour Zeova, e akoz sa parol i spesyal? (Vwar osi not anba lo paz.)

¹⁵ Labib i dir en keksoz konsernan lanmour ki i pa zanmen dir lo lezot kalite prensipal Zeova. Labib pa dir ki Bondye i pwisans oubyen Bondye i lazistis ouswa menm ki Bondye i lasazes. I posed sa bann kalite, se li ki sours prensipal sa bann kalite e napa personn ki kapab demontre sa trwa kalite pli byen ki li. Me Labib i dir en keksoz pli profon konsernan sa katriyenm kalite: “Bondye i lanmour.” * (1 Zan 4:8) Ki savedir sa?

16-18. (a) Akoz Labib i dir “Bondye i lanmour”? (b) Parmi tou bann keksoz ki’n ganny kree lo later, akoz i apropriye ki zonm i reprezant lanmour Zeova?

¹⁶ Ler nou dir “Bondye i lanmour” i pa parey en senp pti  kalkil kot nou dir, “Bondye i egal avek lanmour.” Nou pa kapab devir sa parol e dir ki “lanmour i Bondye.” Zeova pa en kalite ki difisil pour konpran. I annan plizyer kalite santiman ek diferan tre apard ki lanmour. Me lanmour i en par esansyel dan personnalite Zeova. En travay referans lo sa verse i dir: “Lanmour i dan natir Bondye.” An zeneral, nou kapab met li koumsa: Pwisans Zeova i permet li pour azir. Son lazistis ek lasazes i diriz lafason ki i azir. Me lanmour Zeova, i pous li pour azir. Deplis son lanmour i toultan evidan dan lafason ki i servi son bann lezot kalite.

¹⁷ Souvannfwa nou antann dir ki Zeova i pli gran legzanp lanmour. Alor, si nou anvi aprann konsernan sa lanmour ki ganny gide par prensip, nou bezwen aprann konn Zeova. Byensir, nou kapab vwar sa zoli kalite dan bann imen osi. Me akoz imen i annan sa kalite? Bondye ti dir son Garson sa parol ler i ti pe kree bann keksoz: “Annou fer zonm parey nou, dan nou resanblans.” (Zenez 1:26) Parmi tou sa bann keksoz ki annan lo later, zis bann zonm ek fanm ki kapab fer sa swa pour kontan e alor imit zot Papa dan lesyel. Pa oubliye ki Zeova ti servi diferan keksoz ki i’n kree pour reprezant son kat kalite prensipal. Me Zeova ti swazir zonm, ki son kreasyon pli siperyer lo later, pour reprezant Son kalite pli dominan, lanmour.​—Ezekyel 1:10.

¹⁸ Ler nou demontre en lanmour ki pa egois e ki ganny dirize par prensip, nou pe reflekte kalite dominan Zeova. Sa i parey avek sa ki zapot Zan ti dir: “Nou, nou kontan akoz Bondye in kontan nou an premye.” (1 Zan 4:19) Me dan ki fason Zeova in kontan nou an premye?

19. Akoz nou kapab dir ki lanmour ti zwe en rol tre enportan dan travay kreasyon Zeova?

¹⁹ Lanmour pa en keksoz nouvo. Apre tou, kwa ki ti pous Zeova pour konmans kree? Se pa akoz i ti li tousel e i  ti anvi lakonpanni lezot. Zeova pa mank nanryen. Napa nanryen ki Zeova i bezwen ki en lot dimoun i kapab donn li. Me son lanmour ki en kalite ki aktif, ti pous li pour partaz sa lazwa pour viv avek bann imen entelizan ki pou apresye sa kado. Son sel Garson byenneme ti “konmansman kreasyon Bondye.” (Revelasyon 3:14) Apre, Zeova ti servi sa Zouvriye Abil pour kree tou lezot keksoz, par konmans premyerman avek bann lanz. (Zob 38:4, 7; Kolosyen 1:16) Avek liberte, lentelizans, ek santiman ki ti Zeova ti donn zot, sa bann lanz ti annan loportinite pour devlop bann bon relasyon avek lezot e pli enportan ankor avek Zeova. (2 Korentyen 3:17) Alor, zot ti kapab montre lanmour parski Zeova ti kontan zot an premye.

20, 21. Ki Zeova ti fer pour montre ki i ti kontan Adan ek Ev, me konman zot ti azir?

²⁰ I ti menm zafer avek imen osi. Okonmansman, Adan ek Ev ti antoure avek lanmour. Partou kot zot ti gete dan paradi an Edenn, zot ti kapab vwar ki vreman zot Papa i kontan zot. Gete sa ki Labib i dir: “Zeova ti fer en zarden an Edenn, dan les, e i ti met zonm ki i ti’n formen ladan.” (Zenez 2:8) Eski ou’n deza vizit en zoli zarden? Kwa ki ou ti pli apresye? Get bann reyon soley kot i annan bokou pye dibwa? Eski i sa kantite kouler fler ki enpresyonan? Son sa pti delo larivyer, zwazo ek zensek ki parey en lanmizik? Petet, eski i sa loder ki bann pye dibwa, fri ek fler i anvoye? Antouka, napa en zarden ozordi ki parey sa enn ki ti an Edenn. Akoz?

²¹ Parski se Zeova li menm ki ti fer sa zarden! Sa zarden ti bezwen vreman zoli. Dan sa zarden ti annan tou kalite pye dibwa ki ti agreab pour gete e annan bann bon fri. Sa zarden ti ganny byen aroze, i ti vreman gran e ti annan en varyete zannimo. Adan ek Ev pa ti mank nanryen pour viv en lavi ere, enkli travay satisfezan ek bon konpanyon. Vi ki Zeova ti kontan zot an premye, zot ti annan tou rezon  pour zot osi kontan Bondye. Me zot pa ti arive fer sa. Olye obeir zot Papa ki dan lesyel, zot ti rebele kont li.​—Zenez, sapit 2.

22. Ki mannyer lafason ki Zeova ti azir apre ki Adan ek Ev ti rebele, i montre ki son “lanmour i fidel”?

²² Sirman sa ti bezwen sagrin Zeova en kantite! Me eski sa rebelyon ti fer son leker vin dir? Non! “Son labonte leker [oubyen, “lanmour fidel,” not anba lo paz] i pour en letan endefini.” (Psonm 136:1) Alor, deswit i ti fer laranzman pour ki nenport desandans Adan ek Ev ki annan sa bon kondisyon leker i kapab ganny sove. Parey nou’n vwar, sa laranzman ti enkli sakrifis ranson son Garson byenneme, ki ti kout Zeova bokou.​—1 Zan 4:10.

23. Donn en rezon akoz Zeova i ‘en Bondye ere,’ e ki kestyon enportan nou pou diskite dan nou lot sapit?

²³ Wi, depi okonmansman Zeova in pran linisyativ pour montre lanmour pour limanite. Dan bokou fason “Bondye in kontan nou an premye.” Vi ki lanmour i promot lazwa ek larmoni, alor i pa drol ki Labib i dir ki Zeova i ‘en Bondye ere.’ (1 Timote 1:11) Me sa i fer nou demann en kestyon byen enportan. Eski Zeova i vreman kontan nou personnelman? Sa lot sapit pou diskit sa size?