1, 2. Ki bann santiman ki trouble imen ozordi, e konman sa i afekte nou?

EN ZANFAN i perdi oubyen i kas enn son zouzou ki i byen kontan e i konmans plere. I fer lapenn pour tann li pe plere! Me eski ou’n deza vwar ki mannyer figir en zanfan i ranpli avek lazwa kan son paran i aranz sa sitiasyon? Pour sa paran, trouv sa zouzou oubyen menm aranz sa ki’n kase pa en gran zafer. Me sa zanfan li i vreman kontan e i ranpli avek ladmirasyon. Sa ki ti’n paret fini perdi pour li in ganny aranze!

² Zeova, sa pli gran Papa, i annan sa pouvwar pour repar bann keksoz ki son bann zanfan lo later i kapab krwar in fini perdi. Byensir, nou pa pe dir bann senp zouzou. Dan sa bann “letan difisil,” nou perdi keksoz ki bokou pli enportan. (2 Timote 3:1-5) Plizyer keksoz ki presye pour nou imen i paret dan danze​—lakaz, byen materyel, lanplwa, menm lasante. Nou osi kapab santi nou dekouraze e pa konnen ki nou pou fer ler nou reflesir lo fason ki lanvironnman pe ganny detrir e plizyer kalite zannimo pe disparet. Me napa en lot keksoz ki pli afekte nou ki lanmor en dimoun ki nou kontan. Sa santiman ki tou in fini e ki nou pa kapab fer nanryen i kapab tro for pour siporte.​—2 Samyel 18:33.

3. Ki lespwar rekonfortan Akt 3:21 i fer resorti, e par ki mwayen Zeova pou akonpli sa?

³ Alor, pa i rekonfort nou ler nou aprann lo pwisans ki Zeova i annan pour aranze oubyen repare! Parey nou pou vwar, Zeova i kapab e i pou repar en gran kantite keksoz pour son bann zanfan lo later. Annefe, Labib i montre ki Zeova  i annan plan ‘pour renouvle tou keksoz.’ (Akt 3:21) Pour akonpli sa, Zeova pou servi Rwayonm Mesyanik, ki ganny dirize par son Garson, Zezi Kri. Levidans i montre ki sa Rwayonm ti konmans dirize dan lesyel an 1914. * (Matye 24:3-14) Kwa ki pou ganny repare? Annou egzamin serten keksoz merveye ki Bondye in fer pour aranz serten sitiasyon. Nou kapab deza vwar e eksperyans enn parmi sa bann keksoz. Lezot pou arive dan lavenir.

4, 5. Ki ti arive avek pep Bondye an 607 A.N.L., e ki lespwar Zeova ti ofer zot?

⁴ En keksoz ki Zeova in deza retabli, se vre ladorasyon. Pour nou konpran pli byen ki sa i vedir, annou egzamin listwar rwayonm Zida an bref. Ler nou fer sa, i pou donn nou en avangou lo fason ki Zeova i servi son pwisans pour aranz en sitiasyon ki’n deteryore.​—Romen 15:4.

⁵ Zis mazinen konman bann Zwif fidel ti santi an 607 A.N.L. kan Zerizalenm ti ganny detrir. Zot lavil ki zot ti kontan ti’n ganny detrir, son miray ti’n tonbe. Pli pir ankor, sa zoli tanp ki Salomon ti’n konstri, sa sel sant pour vre ladorasyon Zeova lo later antye, ti’n vin en ta debri. (Psonm 79:1) Bann sirvivan ti’n ganny anmennen an egzil Babilonn, e zot ti kit zot pei natal konman en landrwa dezerte pour bann zannimo sovaz. (Zeremi 9:11) Pour en imen, tou ti’n paret fini perdi. (Psonm 137:1) Me Zeova, ki depi lontan ti predir sa destriksyon, ti osi donn lespwar ki pou annan en letan kot zot sitiasyon pou ganny aranze.

6-8. (a) Ki tenm bann profet Ebre ti ekrir souvan lo la, e konman sa bann profesi ti trouv en premye lakonplisman? (b) Dan nou letan, konman pep Bondye in eksperyans en lakonplisman sa bann profesi?

 ⁶ Annefe, plizyer fwa dan Labib bann profet Ebre in koz lo ki mannyer sitiasyon ti pou aranze. * Atraver zot, Zeova ti promet ki bann zabitan ti pou rekonstrir sa pei, i ti pou vin en pei prodiktif, proteze kont bann zannimo sovaz ek latak lennmi. I ti dekrir zot pei konman en vre paradi! (Izai 65:25; Ezekyel 34:25; 36:35) Pli enportan, vre ladorasyon ti pou ganny retabli, e tanp ti pou ganny rekonstrir. (Mika 4:1-5) Sa bann profesi ti donn sa bann Zwif egzile lespwar, e ed zot andir sa 70 an legzil an Babilonn.

⁷ Alafendefen, sa letan ti arive. Bann Zwif ki ti ganny libere Babilonn, ti retourn Zerizalenm e rekonstrir tanp Zeova laba. (Ezra 1:1, 2) Osi lontan ki zot ti reste atase avek vre ladorasyon, Zeova ti beni zot e fer zot pei vin prodiktif e prospere. I ti protez zot kont lennmi e kont zannimo sovaz ki ti’n pran kontrol zot pei pour plizyer lannen. Zot ti’n bezwen vreman rezwir pour vwar pwisans Zeova pour refer keksoz a-nef! Me sa bann levennman ti reprezant selman en premye lakonplisman sa bann profesi. En pli gran lakonplisman ti pou arive “dan bann dernyen zour,” setadir nou letan, kan Zeritye Lerwa David ti pou vin lerwa.​—Izai 2:2-4; 9:6, 7.

⁸ En pe letan apre ki Zezi ti ganny pouvwar pour vin lerwa dan Rwayonm lesyel an 1914, i ti diriz son latansyon lo bezwen spirityel pep fidel Bondye lo later. Zis parey Siris sa Pers ti liber en restan Zwif an Babilonn an 537 A.N.L., Zezi ti liber en restan Zwif spirityel​—son prop disip​—anba lenfliyans Gran Babilonn, setadir tou bann fo larelizyon. (Romen 2:29; Revelasyon 18:1-5) Apartir 1919, vre ladorasyon in reganny son plas dan lavi bann vre Kretyen. (Malaki 3: 1-5) Depi sa letan, pep Zeova in ador Li dan son tanp spirityel ki’n ganny pirifye ki reprezant laranzman Bondye pour vre ladorasyon. Akoz sa i enportan pour nou ozordi?

9. Apre lepok bann zapot, ki bann legliz Kretyente ti fer avek ladorasyon Bondye, me ki Zeova in fer dan nou letan?

⁹ Annou get keksoz dapre sa ki’n arive dan lepase. Bann Kretyen dan premye syek ti rezwir bokou benediksyon spirityel. Me Zezi ek bann zapot ti predir ki vre ladorasyon ti pou ganny kontaminen e ti pou disparet. (Matye 13:24-30; Akt 20:29, 30) Apre lepok bann zapot, Kretyente in fer son laparisyon. Son bann pret in adopte bann lansennyman ek pratik payen. Zot in osi fer li preski enposib pour dimoun apros Bondye. Sa in arive akoz zot in dekrir Bondye konman en Trinite ki difisil konpran. Zot in ansenny dimoun pour konfes avek bann pret e priy avek Mari ek diferan “sen” olye avek Zeova. Apre plizyer syek en tel koripsyon, ki Zeova in fer? Dan sa lemonn ozordi​—en lemonn ranpli avek mansonz envante par bann larelizyon e sali par bann pratik ki Bondye i deteste​—i’n entervenir e retabli vre ladorasyon! San egzazere, nou kapab dir ki sa i enn bann levennman pli enportan dan nou letan.

10, 11. (a) Ki de laspe ki enplike dan sa paradi spirityel, e ki lefe sa i annan lo ou? (b) Ki kalite dimoun Zeova in rasanble dan sa paradi spirityel, e zot pou ganny privilez pour vwar kwa?

¹⁰ Alor, ozordi bann vre Kretyen i rezwir en paradi spirityel. Ki sa paradi i enplike? Prensipalman, de laspe. Premye se vre ladorasyon sa vre Bondye, Zeova. I’n beni nou avek en ladorasyon kot napa mansonz. I’n beni nou avek nouritir spirityel. Sa i permet nou aprann konsernan nou Papa dan lesyel, konman pour fer li plezir e pour apros avek li. (Zan 4:24) Dezyenm laspe sa paradi spirityel i enplik dimoun. Parey Izai ti predir, “dan bann dernyen zour,” Zeova in ansenny  son bann adorater semen lape. I’n aboli lager parmi nou. Kantmenm nou enparfe, i’n ed nou “vin en dimoun konpletman nouvo.” I beni nou bann zefor par donn nou son lespri sen, ki prodwir bann zoli kalite dan nou. (Efezyen 4:22-24; Galat 5:22, 23) Kan ou azir an armoni avek lespri Bondye, ou vreman form parti sa paradi spirityel.

¹¹ Dan sa paradi spirityel, Zeova in rasanble sa kalite dimoun ki i kontan​—bann ki kontan li, ki kontan lape, e ki “konsyan zot bezwen spirityel.” (Matye 5:3, NW) Sa bann dimoun pou ganny privilez pour vwar en lot devlopman pli enpresyonan ankor. Sa se kan tou keksoz pou ganny refer a-nef, ki enkli limanite ek later antye.

12, 13. (a) Akoz bann profesi konsernan refer keksoz a-nef i bezwen ganny en lot lakonplisman? (b) Ki plan Zeova pour later parey ti ganny dir dan zarden Edenn, e akoz sa i donn nou lespwar pour lavenir?

¹² Plizyer profesi ki koz lo refer keksoz a-nef i pa selman aplik pour bann keksoz spirityel. Par egzanp, Izai ti ekrir lo en letan kot sa ki malad, sa ki bwate, sa ki aveg, e sa ki sourd pou ganny geri e menm lanmor pou disparet pour touzour. (Izai 25:8; 35:1-7) Sa bann promes pa ti ganny akonpli dan en sans literal dan ansyen Izrael. Menm si nou’n vwar en lakonplisman spirityel sa bann promes dan nou letan, nou annan tou rezon pour krwar ki dan lavenir, i pou literalman trouv en pli gran lakonplisman. Kote nou konn sa?

¹³ Dan zarden Edenn, Zeova ti fer kler son plan pour later: I ti anvi ki later i ganny abite par bann imen ki ini ansanm, ki ere, e ki an bonn sante. Zonm ek fanm ti ganny sa responsabilite pour pran swen avek later ek tou bann zannimo e pour fer later antye vin en paradi. (Zenez 1:28) Sa i byen diferan avek sa ki nou vwar konmela. Me nou kapab annan konfyans ki personn pa kapab reisi kas plan Zeova. (Izai 55: 10, 11) Zezi, konman sa Lerwa Mesyanik apwente par Zeova, pou anmenn sa Paradi lo later antye.​—Lik 23:43.

14, 15. (a) Konman Zeova pou refer “tou keksoz a-nef”? (b) Konman lavi pou ete dan Paradi, e ki laspe ki pli atir ou?

¹⁴ Zis mazinen nou pe vwar later antye vin en Paradi! Konsernan sa letan, Zeova i dir: “Lala mon refer tou keksoz a-nef.” (Revelasyon 21:5) Annou vwar ki sa pou vedir. Kan Zeova in fini servi son pwisans pour detrir sa sistenm mesan, i pou annan “en nouvo lesyel ek en nouvo later.” Sa i vedir ki en nouvo gouvernman dan lesyel pou renny lo en nouvo sosyete lo later konpoze avek bann dimoun ki kontan Zeova e fer son lavolonte. (2 Pyer 3:13) Satan, ansanm avek son bann demon pou ganny anfermen e zot pa pou kapab fer nanryen. (Revelasyon 20:3) Pour premye fwa pandan plizyer milye lannen, limanite pou ganny libere avek sa move lenfliyans. San dout, nou pou santi en tre gran soulazman.

¹⁵ Finalman, nou pou kapab pran swen avek sa zoli plannet parey ti devret ete depi okonmansman. Later i annan bann pouvwar natirel pour repar son lekor. Bann lak ek larivyer polye i kapab vin prop ankor lo zot menm si sours sa polisyon i ganny eliminen. Bann peizaz ki’n ganny ravaze par lager i kapab vin zoli ankor si lager i arete. I pou en plezir pour travay an armoni avek later, kontribye pour fer li vin ankor en zoli zarden ranpli avek en gran varyete plant ek zannimo! Olye detrir bann zannimo ek plant an bonnavini, imen pou viv anpe avek tou kreasyon lo later. Menm bann zanfan pa pou per bann zannimo sovaz.​—Izai 9:6, 7; 11:1-9.

16. Dan Paradi, kwa ki pou ganny remet a-nef ki pou vreman en sanzman pour sak dimoun fidel?

¹⁶ En lot keksoz ki pou ganny remet a-nef, se nou lekor. Apre Armagedon, bann sirvivan pou vwar bann gerizon mirakile partou lo later. Parey i ti fer ler i ti lo later, Zezi pou servi son pwisans ki Bondye in donn li pour fer bann  aveg vwar kler, bann sourd tande, bann ki bwete e andikape pou vin an bonn sante. (Matye 15:30) Bann ki aze pou kontan pour ganny en nouvo lafors, lasante ek lenerzi parey dan zot zenn tan. (Zob 33:25) Bann pli lo figir pou disparet, bann lazanm pou redrese e bann misk pou reganny zot lafors. Tou bann imen fidel pou santi ki lefe pese ek lenperfeksyon pe disparet gradyelman. Nou pou vreman remersi Zeova pour son pwisans merveye pour repare! Annou aprezan konsantre lo en laspe tousan sa letan eksitan kot keksoz pou ganny refer a-nef.

17, 18. (a) Akoz Zezi ti reprimann bann Sadiseen? (b) Ki ti arive ki Eliya ti bezwen demann Zeova pour fer en rezireksyon?

¹⁷ Dan premye syek N.L., serten sef relizye, ki ti apel Sadiseen, pa ti krwar dan rezireksyon. Zezi ti reprimann zot avek sa parol: “Zot dan lerer, akoz zot pa konn ni Lekritir ni pisans Bondye.” (Matye 22:29) Wi, Lekritir i revele ki Zeova i annan sa pwisans pour redonn lavi. Konman?

¹⁸ Zis mazin sa ki ti arive dan letan Eliya. En vev ti pe anmenn lekor son sel zanfan dan son lebra. Sa pti garson ti’n mor. Profet Eliya, ki ti en envite sa vev pour en pe letan, ti’n bezwen soke. Pli boner, i ti ede anpes sa zanfan mor lafen. Petet Eliya ti’n devlop en latasman avek sa pti garson. Sa manman ti dan en gran sagrinasyon. Son garson ti sa sel dimoun vivan ki ti fer li rapel son defen msye. Petet i ti annan lespwar ki son garson ti pou pran swen avek li dan son vye zour. Dan son gran sagrinasyon sa vev ti per ki i ti pe ganny pini pour en fot dan lepase. Eliya ti nepli kapab get sa sitiasyon tre tris. I ti zantiman pran lekor sa garson ki ti dan lebra son manman, anmenn li dan son lasanm, e demann Zeova pour redonn lavi sa pti garson.​—1 Lerwa 17:8-21.

19, 20. (a) Konman Abraam ti montre ki i ti annan lafwa dan pwisans Zeova pour redonn lavi, e lo kwa sa lafwa ti baze? (b) Konman Zeova ti rekonpans lafwa Eliya?

¹⁹ Eliya pa ti premye dimoun pour krwar dan rezireksyon.  Plizyer syek pli boner, Abraam ti krwar ki Zeova i annan sa pwisans pour redonn lavi e i ti annan bon rezon pour krwar sa. Kan Abraam ti annan 100 an e Sara 90 an, Zeova ti refer zot sistenm reprodiktif marse, ki ti permet Sara ganny en garson par mirak. (Zenez 17:17; 21:2, 3) Plitar, kan sa pti garson ti vin adilt, Zeova ti demann Abraam pour sakrifye son garson. Abraam ti demontre lafwa, i ti mazin dan li menm ki Zeova ti pou kapab resisit Izaak son garson byenneme. (Ebre 11:17-19) En tel lafwa for i kapab eksplike akoz Abraam, avan i ti mont lo montanny pour ofer son garson, ti asir son bann serviter ki li ek Izaak pou retourn ansanm.​—Zenez 22:5.

²⁰ Zeova pa ti les Abraam sakrifye son garson, alor rezireksyon pa ti neseser sa letan. Parkont, dan ka Eliya, garson sa vev ti’n deza mor​—me pa pour lontan. Zeova ti rekonpans lafwa sa profet par resisit sa zanfan! Apre Eliya ti donn sa manman son garson, avek sa parol inoubliyab: “Gete, ou garson i vivan”!​—1 Lerwa 17:22-24.

21, 22. (a) Akoz bann lenformasyon lo rezireksyon in ganny rikorde dan Labib? (b) Dan Paradi, ki kantite dimoun ki pou ganny resisite, e lekel ki pou fer li?

²¹ Alor pour premye fwa dan Labib, nou vwar Zeova servi son pwisans pour redonn lavi en dimoun. Plitar, Zeova ti osi donn pouvwar Elisa, Zezi, Pol, ek Pyer pour redonn lavi bann dimoun mor. Byensir, bann ki ti ganny resisite ti finalman mor ankor. Kantmenm sa, sa bann lenformasyon dan Labib i donn nou en zoli avangou lo bann keksoz ki pou arive dan lavenir.

²² Dan Paradi, Zezi pou akonpli son rol konman “larezireksyon ek lavi.” (Zan 11:25) I pou resisit plizyer milyon dimoun e donn zot sa loportinite pour viv pour touzour dan Paradi lo later. (Zan 5:28, 29) Zis mazin sa senn kot bann fanmiy ek zanmi ki ti’n ganny separe par lanmor, pe anbras  kanmarad, pa konnen ki mannyer pour eksprim zot lazwa! Tou imen pou loue Zeova pour son pwisans pour redonn lavi.

23. Ki pli gran fason Zeova in demontre son pwisans, e konman sa i asir nou lespwar pour lavenir?

²³ Zeova in donn nou en levidans solid ki sa bann lespwar i asire. I ti demontre son gran pwisans, kan i ti resisit son Garson Zezi. Zezi in vin en kreatir spirityel pwisan, ki dan dezyenm pozisyon apre Zeova. Apre ki Zezi ti resisite i ti aparet avek plizyer santenn temwen. (1 Korentyen 15:5, 6) Menm pour bann ki doute, sa levidans i devret ase pour zot. Zeova i annan pwisans pour redonn lavi bann dimoun mor.

24. Akoz nou kapab annan konfyans ki Zeova pou resisit bann mor, e ki lespwar sakenn ant nou i devret apresye?

²⁴ Zeova napa zis sa pwisans pour redonn lavi, me i osi annan sa dezir pour fer li. Sa zonm fidel Zob ti ganny enspire pour dir ki Zeova i vreman anvi resisit bann mor. (Zob 14:15) Eski ou pa santi ou atire avek nou Bondye, ki kontan pour servi son pwisans pour redonn lavi? Me rapel ki rezireksyon i zis en laspe sa gran travay Zeova pour refer keksoz a-nef byento. Anmezir ki ou apros pli pre avek li, toultan apresye sa lespwar merveye ki ou pou la pour vwar Zeova pe “refer tou keksoz a-nef.”​—Revelasyon 21:5.