1, 2. (a) Dan premye syek, kwa ki ti ede pour propaz sa bon nouvel dan Lanpir Romen? (b) Ki laprev nou annan ki Zeova pe siport nou dan nou letan? (Vwar bwat “ Bon nouvel dan plis ki 670 langaz.”)

 BANN viziter ki ti pe vin Zerizalenm pa ti oule krwar zot zorey. Bann Galileen ti pe koz byen langaz lezot nasyon e sa mesaz ki zot ti pe anonse ti atir latansyon sa bann etranze. I ti Lapannkot 33 N.L., e gras a en mirak, bann disip ti kapab koz diferan langaz e sa ti en laprev ki zot ti annan sipor Bondye. (Lir Akt 2:1-8, 12, 15-17.) Sa bon nouvel ki zot ti anonse sa zour ti tous leker dimoun diferan nasyonalite e sanmenm rezon sa mesaz ti propaze dan Lanpir Romen.​—Kol. 1:23.

² Ozordi, bann serviter Bondye pa koz diferan langaz par mirak. Me, kantmenm sa, zot pe arive propaz sa mesaz dan plis langaz ki dan premye syek. Atraver tradiksyon, sa mesaz Rwayonm in ganny anonse dan plis ki 670 langaz. (Akt 2:9-11) Pep Bondye in prodwir sitan en kantite piblikasyon dan plizyer langaz ki sa mesaz Rwayonm in kapab ariv ziska dan bann pli pti rezyon lo later. a Sa osi i en laprev konkret ki Zeova pe servi Lerwa Zezi pour diriz predikasyon. (Mat. 28:19, 20) Anmezir nou egzamin serten zouti ouswa piblikasyon ki nou’n servi pour akonpli sa travay pour plis ki 100 an, esey vwar ki mannyer sa Lerwa in ptitapti form nou pour demontre lentere personnel dan bann dimoun e ankouraz nou pour vin bann ansenyan Parol Bondye.​—2 Tim. 2:2.

3. Akoz nou servi diferan zouti dan predikasyon?

³ Zezi ti konpar mesaz Rwayonm avek en lagrenn e leker en dimoun avek later. (Mat. 13:18, 19) Zis parey en fermye ti pou servi diferan zouti pour kiltiv later e prepar li avan senm lagrenn, pep Zeova in servi diferan zouti ki kapab ed zot prepar leker plizyer milyon dimoun pour arive aksepte mesaz Rwayonm. Serten sa bann zouti ti ganny servi zis pour en ptigin letan. Lezot, parey liv ek magazin i  ankor efikas dan sa travay. Kontrerman avek bann metod ki ti kapab tous bann gran group dimoun alafwa parey nou ti vwar dan sapit avan, tou sa bann zouti ki pe al ganny mansyonnen la in ed bann proklanmater Rwayonm pour zwenn dimoun fas a fas.​—Akt 5:42; 17:2, 3.

4, 5. Ki mannyer bann rikord granmofonn ti ganny servi, me ki zot ti manke?

⁴ Diskour rikorde. Dan bann lannen 1930 ensi ki 1940, bann proklanmater ti rikord bann diskour e apre zwe li lo bann granmofonn portab. Sak rikord ti al pour mwens ki senk minit. Sa bann rikord ti annan bann pti tit parey “Trinite,” “Pirgatwar” ek “Rwayonm.” Ki mannyer sa bann rikord ti ganny servi? Frer Clayton Woodworth, Junior, ki ti batize an 1930 Leta-z-ini ti dir: “Mon ti mars avek en kalite granmofonn ki ti parey en pti valiz. I ti annan en nespes resor ki ti fer sa rikord vire e i ti annan en lanmans ki ou ti bezwen met an plas pour zwe sa rikord e mon ti bezwen met zegwir sa lanmans zis lo bor sa rikord pour li kapab zwe byen. Ler mon ti apros en lakaz, mon ti pou ouver sa valiz, met sa lanmans an plas e pez sonnet laport. Ler sa met lakour ti ouver laport, mon ti pou dir, ‘Mon annan en mesaz enportan mon ti a kontan ou tande.’” Ki mannyer dimoun ti reazir? Frer Woodworth ti dir: “Laplipar ditan, dimoun ti aksepte. Me dan lezot ka, zot ti zis ferm laport dan mon figir. Parfwa, i annan ki ti krwar ki mon ti pe vann granmofonn.”

⁵ Ver 1940, plis ki 90 diferan diskour rikorde ti disponib e plis ki en milyon rikord ti’n ganny fer. John Barr ki sa letan ti pe fer pionye Langleter e ki pli tar ti en manm  Konsey Direkter ti dir: “Pandan lannen 1936 ziska 1945, granmofonn ti mon konpanyon. Anfet, sa letan, mon pa ti konnen ki pour fer si mon ti napa enn. Tann lavwa Frer Rutherford kot sak laport ti vreman ankourazan, i ti konmsi i ti avek ou an personn. Me selman, pres avek en granmofonn pa ti donn ou sa sans pour ansennyen dan predikasyon, ni sa abilite pour tous leker bann dimoun.”

6, 7. (a) Ki byenfe ek limit bann kart temwannyaz? (b) Dan ki sans Zeova ‘in met parol dan nou labous’?

⁶ Kart temwannyaz. O konmansman 1933, bann proklanmater ti ganny ankouraze pour servi kart temwannyaz dan predikasyon portanport. En kart temwannyaz ti apepre 7.6 par 12.7 santimet grander. I ti annan en pti mesaz lo Labib ek en lalis bann piblikasyon ki sa met lakour ti kapab gannyen. En proklanmater ti senpleman donn sa met lakour sa kart e demann li pour lir li. Lilian Kammerud ki ti finalman servi konman misyonner Puerto Rico ek Larzantin ti dir: “Mon ti kontan pres avek kart temwannyaz.” Akoz sa? Sa ser ti dir: “Pa tou dimoun ki ti kapab fer en bon prezantasyon. Alor, i ti ed mwan pour fasilman apros dimoun.”

⁷ Frer David Reusch ki ti batize an 1918 ti fer sa remark: “Bann kart temwannyaz ti ed bann frer ek ser akoz pa bokou ki ti santi ki zot ti konnen ki pour dir.” Me, sa zouti ti annan son limit. Frer Reusch ti dir, “Par ler, nou ti zwenn dimoun ki ti krwar ki nou pa kapab koze. Dan en sans, bokou parmi nou pa ti kapab koze. Me Zeova ti pe prepar nou pour vin bann predikater ki ti pou kapab koz avek bann dimoun. I pa ti tarde pour met parol dan nou labous par ansenny nou konman pour servi Labib kot laport. Sanmenm ki Lekol Minister Teokratik ki ti ganny etablir an 1940 ti fer.”​—Lir Zeremi 1:6-9.

8. Ki mannyer ou kapab les Kris form ou?

⁸ Liv. Depi 1914, pep Zeova in prodwir plis ki 100 diferan liv ki koz lo bann topik dan Labib. Serten sa bann liv ti’n ganny fer ekspreseman pour form bann proklanmater pour vin pli efikas. Anna Larsen, Dennmark, ki’n en proklanmater pour apepre 70 an i dir: “Zeova ti ed nou pour vin bann proklanmater efikas atraver Lekol Minister Teokratik ek bann liv ki nou ti gannyen. Mon rapel premye parmi sa bann liv ti annan pour tit Aid to Kingdom Publishers, ki ti ganny lanse an 1945. An 1946, “Equipped for Every Good Work” ti ganny pibliye. Konmela nou annan sa liv Benefisye atraver Ledikasyon Lekol Minister Teokratik ki ti ganny pibliye an 2001 an Angle.” Sirman, Lekol Minister Teokratik ek serten sa bann liv in zwe en gran rol vi ki “nou kapasite i sorti kot Bondye.” (2 Kor. 3:5, 6) Eski ou en zelev dan Lekol  Minister Teokratik? Eski ou anmenn ou liv Lekol Minister renyon sak semenn e swiv anmezir sirveyan lekol i refer avek? Si wi, se konmsi ou pe les Kris form ou pour vin en pli bon ansenyan.​—2 Kor. 9:6; 2 Tim. 2:15.

9, 10. Ki rol liv in zwe pour plante e aroz lagrenn laverite?

⁹ Zeova in osi ed nou par fer son lorganizasyon prodwir bann liv ki ed bann proklanmater eksplik bann lansennyman de baz. Sa liv The Truth That Leads to Eternal Life ti en liv vreman efikas. I ti ganny enprimen pour premye fwa an 1968 e i ti anmenn bon rezilta deswit. Minister Rwayonm Novanm 1968 ti dir: “I’n annan sitan en kantite demann pour sa liv Truth ki an Septanm bann Betelit kot lenprimri Brooklyn ti bezwen travay aswar.” Sa lartik ti eksplike: “En letan, an Out, demann pour liv Truth ti sitan bokou ki i ti depas lakantite ki ti disponib par enn pwen senk milyon kopi!” Ver 1982, plis ki 100 milyon kopi sa liv ti’n ganny pibliye dan 116 langaz. Dan sa 14 an depi 1968 ziska 1982, liv Truth in ede pour ki nou ganny plis ki en milyon proklanmater. b

¹⁰ An 2005, i ti annan liv Ki Labib i vreman dir? ki ti ganny lanse pour ed nou kondwir letid Labib. Apepre 200 milyon kopi in deza fini ganny pibliye dan 256 langaz! Ki lefe in annan? Dan zis set an, depi 2005 ziska 2012, apepre 1.2 milyon dimoun in vin proklanmater sa bon nouvel. Pandan sa menm peryod letan, lakantite dimoun ki pe etidye Labib avek nou in sorti 6 milyon pour vin plis ki 8.7 milyon. San okenn dout, Zeova in beni nou zefor pour plante e aroz bann lagrenn laverite lo Rwayonm.​—Lir 1 Korentyen 3:6, 7.

11, 12. Anliny avek sa bann verse dan paragraf, pour lekel nou magazin in ganny prepare?

¹¹ Magazin. O konmansman, The Watch Tower ti prensipalman pour sa “pti troupo” ki “Bondye in apele” pour viv dan lesyel. (Lik 12:32; Ebr. 3:1) Le 1 Oktob 1919, lorganizasyon Zeova ti lans en lot magazin ki ti’n ganny fer pour atir en lot lodyans e sa se manm piblik. Sa magazin ti vin sitan popiler pour bann Etidyan Labib ek manm piblik ki pour plizyer lannen i ti sa magazin ki’n ganny plis distribye ki The Watch Tower. Sa magazin ti ganny apele The Golden Age o konmansman. An 1937, son non ti sanze pour vin Consolation. Apre, an 1946, i ti ganny apele Awake!

¹² Diran bann deseni ki’n pase, stil ek prezantasyon Latour Veyer ek Awake! in sanze, me zot bi i reste parey, setadir, pour anons Rwayonm Bondye e batir lafwa dan Labib. Ozordi, i annan de edisyon Latour Veyer, edisyon piblik ek letid. Edisyon letid pe target “lezot serviter” andotmo, sa “pti troupo” ek “lezot mouton.” c (Mat. 24:45; Zan 10:16)  Edisyon piblik in ganny prepare sirtou pour sa bann ki pa ankor konn laverite me ki annan respe pour Labib ek Bondye. (Akt 13:16) Awake! i plis pour sa bann ki pa konn bokou lo Labib ek sa vre Bondye, Zeova.​—Akt 17:22, 23.

13. Kwa ki ou vwar remarkab avek nou bann magazin? (Diskit latab “ Rikord mondyal lo distribisyon bann liv.”)

¹³ Ver konmansman lannen 2014, sak mwan, plis ki 44 milyon kopi Awake! ek apepre 46 milyon kopi Latour Veyer ti ganny pibliye. Awake! i ganny tradwir dan apepre 100 langaz e Latour Veyer dan plis ki 200 e sa i fer ki i sa de piblikasyon ki pli ganny tradwir e distribye lo later antye! Menm si sa bann lakonplisman i remarkab, i pa devret sirprann nou. Dan sa de magazin i annan sa mesaz ki Zezi ti dir pou ganny prese lo later antye.​—Mat. 24:14.

14. Ki nou’n promote avek devouman e akoz?

¹⁴ Labib. An 1896, Frer Russell ek son bann asosye ti sanz non legal ki ti ganny servi pour pibliy nou bann piblikasyon pour ki i annan sa mo Labib ladan, alor Watch Tower Bible and Tract Society ki ti ganny servi. Sa sanzman ti apropriye akoz Labib in touzour sa zouti prensipal ki nou servi pour propaz sa bon nouvel Rwayonm. (Lik 24:27) Anliny avek sa nouvo non nou lasosyasyon, avek devouman, bann serviter Bondye in kontribye en kantite pour distribye e ankouraz lezot pour lir Labib. Par egzanp, an 1926, dan nou prop lenprimri, nou ti enprim The Emphatic Diaglott, ki ti en tradiksyon Lekritir Grek Kretyen, prodwir par Benjamin Wilson. O konmansman 1942, nou ti enprimen e distribye apepre 700,000 kopi King James Version an antye. Zis de-z-an pli tar, nou ti konmans enprim American Standard Version ki servi non Zeova apepre 6,823 fwa. Ver 1950, nou ti’n distribye plis ki 250,000 kopi.

15, 16. (a) Ki ou apresye avek New World Translation? (Diskit bwat “ Tradwir Labib pli vit.”) (b) Ki mannyer ou kapab les Zeova tous ou leker?

¹⁵ An 1950, New World Translation of the Christian Greek Scriptures ti ganny lanse. Tradiksyon konplet New World Translation of the Holy Scriptures ti ganny lanse dan en volim an 1961. Sa tradiksyon Labib i onor Zeova par remet son non dan tou bann landrwa kot i ete dan teks orizinal an Ebre. Non Bondye i osi aparet 237 fwa dan teks prensipal Lekritir Grek Kretyen dan New World Translation. Plizyer fwa in ganny revize e tou dernyenman an 2013, i’n ganny revize pour fer sir ki i pli egzakt e pli fasil pour lir. Ziska 2013, plis ki 201 milyon kopi New World Translation in ganny pibliye an antye ouswa an parti dan 121 langaz.

¹⁶ Ki mannyer serten in reazir apre ki zot in lir New World Translation dan zot langaz. En zonm Nepale i dir: “Pour plizyer lannen, bann vye tradiksyon Nepale ki nou ti annan ti difisil pour konpran, vi ki i ti servi en langaz en pe klasik. Me, aprezan nou konpran Labib pli byen vi ki  i servi bann mo ki nou servi tou le zour.” Kan en madanm dan Repiblik Lafrik Santral ti konmans lir tradiksyon Sango, i ti konmans plere e dir: “Sa se langaz mon leker.” Parey sa madanm, nou tou nou kapab les Zeova tous nou leker par lir son Parol sak zour.​—Ps. 1:2; Mat. 22:36, 37.

17. Ki mannyer ou kapab demontre ou lapresyasyon pour bann zouti ek formasyon ki ou gannyen e ki rezilta ou kapab gannyen?

¹⁷ Eski ou apresye bann zouti ek formasyon kontinyel ki Lerwa Zezi Kri in donn nou? Eski ou fer letan pour lir bann piblikasyon ki lorganizasyon Bondye pe prodwir e eski ou servi li pour ed lezot? Si wi, ou kapab santi parey Ser Opal Betler ki ti batize le 4 Oktob 1914. Ser Opal i dir: “Pandan plizyer lannen, mwan ek mon msye nou’n servi granmofonn ek bann kart temwannyaz. Nou ti pres kaz an kaz avek liv, brosir ek magazin. Nou ti fer bann kanpanny ek lamars e distribye bann mesaz enprimen. Pli tar, nou ti ganny formen pour fer bann retourn vizit e kondwir letid Labib kot lakour bann dimoun enterese. Nou’n byen okipe e nou lavi in gou.” Zezi ti promet ki son bann disip ti pou okipe pe senm lagrenn, rekolte e rasanble ansanm. Plizyer milyon, parey ser Opal i kapab sertifye ki sa promes in vin vre.​—Lir Zan 4:35, 36.

18. Ki privilez nou annan?

¹⁸ Bokou ki pa ankor vin serviter sa Lerwa i kapab mazinen ki pep Bondye i “bann zonm senp san gran ledikasyon.” (Akt 4:13) Me zis reflesir! Sa Lerwa in fer bann dimoun ordiner kontinyen prodwir bann piblikasyon ki’n ganny plis pibliye e distribye dan lemonn. Pli enportan ankor, i’n form e motiv nou pour servi sa bann zouti pour propaz sa bon nouvel avek dimoun dan tou nasyon. Pa nou annan en gran privilez pour travay avek Kris pour plant lagrenn laverite e rekolte bann disip!