1, 2. Akoz ou kontan Zeova?

 ESKI ou kontan Bondye? Petet ou sitan kontan li ki ou’n dedye ou lavi avek li. Ou santi ki i ou pli bon Zanmi. Me menm avan ou ti konmans kontan li, Zeova ti deza kontan ou. Labib i dir: “Nou nou kontan [Bondye] akoz i’n kontan nou premye.”​—1 Zan 4:19.

² Reflesir lo bann diferan fason ki Zeova in montre ki i kontan nou. I’n donn nou later pour ki nou kapab reste lo la e tou lezot keksoz pour ki nou lavi i gou. (Matye 5:43-48; Revelasyon 4:11) I oule ki nou annan en bon relasyon avek li e i’n ed nou pour aprann konn li. Ler nou lir Labib, se konmsi nou pe ekout Zeova. Ler nou priy li, i ekout nou. (Psonm 65:2) I gid nou e donn nou lafors atraver son lespri sen ki vreman pwisan. (Lik 11:13) I ti menm anvoy son Garson ki i kontan en kantite lo later pour liber nou avek pese ek lanmor.​—Lir Zan 3:16; Romen 5:8.

3. Ki mannyer nou kapab gard en bon relasyon avek Zeova?

 ³ Nou oule reste pros avek Bondye. Mazin en pti kou enn ou bon zanmi, en dimoun ki’n toultan la pour ou dan botan ek movetan. Me i demann zefor pour gard en bon zanmi koumsa. Pareyman, i demann zefor pour gard en bon relasyon avek Zeova, nou pli bon Zanmi ki tou. Nou kapab reste zanmi avek Zeova pour touzour. Sanmenm sa ki Labib i dir nou: “Reste dan lanmour Bondye.” (Zid 21) Ki mannyer nou kapab fer sa? Labib i dir: “Kontan Bondye i vedir obei son bann komannman e pourtan son bann komannman pa en fardo.”​—1 Zan 5:3.

4, 5. (a) Ki savedir “kontan Bondye”? (b) Ki mannyer ou ti konmans kontan Zeova?

⁴ Ler Labib i dir “kontan Bondye,” ki sa i vedir? Labib pa pe koz lo lanmour ki Bondye i annan pour nou me plito lo nou lanmour pour li. Ou rapel ler ou ti fek konmans kontan Zeova?

⁵ Mazin lafason ou ti santi ler pour premye fwa ou ti aprann ki Zeova i anvi ou viv pour touzour dan son nouvo lemonn. Ou ti aprann tou sa ki i’n fer pour ki ou kapab viv pour touzour. Ou ti realize ki Zeova in donn nou tou en kado presye ler i ti anvoy son prop Garson lo later. (Matye 20:28; Zan 8:29; Romen 5:12, 18) Anmezir ti konpran ki kantite Zeova i kontan ou, ou leker ti pous ou pour konmans kontan li osi.​—Lir 1 Zan 4:9, 10.

6. Ki ou fer ler ou vreman kontan en dimoun? Ki ou lanmour pour Bondye in motiv ou pour fer?

 ⁶ Me sa lanmour ki ou’n santi pour Zeova i zis en konmansman. Par egzanp, ler nou kontan en dimoun, nou pa zis dir li: “Mon kontan ou.” Lanmour i pous nou pour fer bann keksoz ki fer sa dimoun kontan. Pareyman, ou lanmour pour Zeova in fer ou anvi viv en lavi ki fer li plezir. Ou’n kontan Zeova en kantite, ou’n dedye ou lavi avek li e batize. Ler ou’n fer sa, ou’n promet pour servi Zeova pour touzour. (Lir Romen 14:7, 8.) Ki mannyer ou kapab gard ou promes?

7. Ki nou pou fer si nou kontan Zeova? Ki serten komannman Bondye?

⁷ Vi ki nou kontan Zeova, nou “obei son bann komannman.” Nou aprann dan Labib ki mannyer Bondye i anvi nou viv. Par egzanp, Zeova i dir nou ki i mal pour bwar ziska sou, koz manti, vole, fer sèks avek en dimoun ki nou pa’n marye avek oubyen ador okenn lezot keksoz oubyen dimoun apard ki li.​—1 Korentyen 5:11; 6:18; 10:14; Efezyen 4:28; Kolosyen 3:9.

8, 9. Ki mannyer nou kapab konn sa ki Zeova i anvi nou fer dan serten sityasyon kot napa en lalwa spesifik dan Labib? Donn en legzanp.

⁸ Pour nou fer plezir Zeova, nou bezwen fer plis ki zis obei son bann komannman. Zeova pa’n donn nou en gran lalis lalwa ki dir nou ki pour fer dan tou sityasyon lavi. Alor, parfwa i napa en lalwa spesifik dan Labib ki pou dir nou ki nou devret fer. Ki  mannyer nou kapab fer bann bon desizyon? (Efezyen 5:17) Nou trouv bann prensip dan Labib. En prensip i en laverite de baz ki montre nou pwennvi Zeova lo serten keksoz. Ler nou lir Labib, nou aprann konn Zeova konman en Bondye reel. Nou aprann konn son fason panse, sa ki i pa kontan e sa ki i kontan.​—Lir Psonm 97:10; Proverb 6:16-19; vwar Lezot lenformasyon nimero 1.

⁹ Par egzanp, ki mannyer nou kapab deside ki nou pou gete lo televizyon oubyen Enternet? Zeova pa dir nou egzakteman ki nou bezwen fer. Me bann prensip ki i donn nou pou ed nou fer bann bon desizyon. I annan en kantite divertisman konmela ki ranpli avek vyolans ek sèks. Dan Labib, Zeova i dir nou ki “i deteste sa enn ki kontan vyolans” e i “pou ziz bann dimoun ki komet imoralite seksyel.” (Psonm 11:5; Ebre 13:4) Ki mannyer sa bann prensip i kapab ed nou pour fer bann bon desizyon? Ler nou konnen ki Zeova pa kontan en keksoz oubyen i vwar li mal, nou pa devret fer sa keksoz.

10, 11. Akoz nou devret obei Zeova?

¹⁰ Akoz nou devret obei Zeova? Nou pa devret obei Zeova zis akoz nou pa anvi ganny pini oubyen pour evit bann move konsekans. (Galat 6:7) Nou devret obei Zeova akoz nou kontan li. Zis parey bann zanfan ki anvi fer plezir zot paran, nou osi nou anvi fer plezir nou Papa ki dan lesyel. Napa nanryen pli gou ki fer Zeova plezir!​—Psonm 5:12; Proverb 12:2; vwar Lezot lenformasyon nimero 2.

 ¹¹ Nou pa obei Zeova zis ler i fasil oubyen ler nou napa en lot swa. Nou pa swazir ki kalite lalwa oubyen standar nou pou swiv oubyen pa swiv. (Deterononm 12:32) Me nou obei li avek tou nou leker, zis parey sa psalmis ti dir: “Mon pran plezir obeir ou bann komannman, ki mon kontan bokou.” (Psonm 119:47; Romen 6:17) Nou anvi vin parey Noe ki ti montre ki i ti kontan Zeova par obei tou sa ki Zeova ti demann li pour fer. Labib i dir ki Noe “ti fer tou sa ki Bondye ti’n dir li.” (Zenez 6:22) Ou ti a kontan Zeova i dir sa lo ou?

12. Ki mannyer nou kapab fer Zeova kontan?

¹² Ki mannyer Zeova i santi ler nou obei li? Nou fer son leker kontan. (Proverb 11:20, NWT; 27:11) Zis mazin sa! Nou fer plezir Kreater liniver ler nou obei li. Me i pa zanmen fors nou pour obei li. O kontrer, i’n donn nou sa liberte pour swazir. Savedir nou lib pour swazir pour fer sa ki byen oubyen sa ki mal. Zeova i anvi ki nou lanmour pour li i motiv nou pour fer bann bon desizyon pour ki nou viv sa pli bon lavi.​—Deterononm 30:15, 16, 19, 20; vwar Lezot lenformasyon nimero 3.

13, 14. Ki mannyer nou konnen ki bann komannman Bondye pa tro difisil pour obei? Donn en legzanp.

¹³ Eski ou krwar ki obei bann komannman Zeova i tro difisil oubyen i anpes ou fer sa ki ou anvi? Labib i dir klerman: “Son bann komannman pa en fardo.” (1 Zan 5:3) An Grek, sa mo “fardo” i vedir  “lour.” Dan lezot verse Labib, sa mo i ganny servi pour dekrir bann lareg ki tro strik oubyen ler dimoun i sey kontrol oubyen fer ditor lezot. (Matye 23:4; Akt 20:29, 30) En lot tradiksyon Labib (Bible en français courant) i dir: “Son bann komannman pa tro difisil pour nou.” Bann komannman Zeova pa “lour,” setadir zot pa tro difisil pour nou obei. Sa ki Zeova i ekspekte avek nou i toultan rezonnab.

¹⁴ Par egzanp, fer konmsi ou pe ed enn ou zanmi ki pe sanz landrwa reste. I’n fini met tou son bann zafer dan bwat. Serten bwat i leze e fasil pour anmennen, tandis ki lezot i sitan lour ki i bezwen de dimoun pour lev zot. Eski ou zanmi ti pou demann ou pour lev en bwat lour ou tousel? Me non! Akoz? Parski i pa anvi ou ganny dimal. Parey sa zanmi, Zeova pa zanmen demann nou pour fer en keksoz ki tro difisil. (Deterononm 30:11-14) Zeova i konn nou byen. I “konnen koman nou’n ganny kree; i rapel ki nou zis lapousyer.”​—Psonm 103:14.

15. Akoz nou kapab asire ki bann komannman Zeova i pour nou prop dibyen?

¹⁵ Moiz ti dir nasyon Izrael ki zot ti pou “ere pour touzour” si zot obei bann komannman Zeova e sa ti pou osi “gard [zot] vivan.” (Deterononm 5:28-33; 6:24) Pareyman ozordi, tou sa ki Zeova i demann nou pour fer i pour nou prop dibyen. (Lir Izai 48:17.) Nou Papa, Zeova, i toultan konn sa ki pli bon pour nou. (Romen 11:33) Labib i dir nou: “Bondye i lanmour.” (1 Zan 4:8) Savedir tou sa ki Zeova i dir oubyen fer i akoz i kontan nou.

16. Ki mannyer nou konnen ki nou kapab obei Bondye menm si nou enparfe e pe viv dan en move lemonn?

 ¹⁶ I pa toultan fasil pour obei Bondye. Nou pe viv dan en move lemonn ki pe ganny dirize par Dyab. I esey enfliyans dimoun pour fer sa ki mal. (1 Zan 5:19) Nou bezwen osi lalit avek nou bann panse ek santiman enparfe ki kapab fer nou dezobei Bondye. (Romen 7:21-25) Me nou lanmour pour Zeova i donn nou lafors pour fer sa ki byen. I vwar zefor ki nou fer pour obei li e i ed nou par donn nou son lespri sen, en lafors ki pwisan. (1 Samyel 15:22, 23; Akt 5:32) Lespri sen i ed nou pour devlop bann kalite ki fer li fasil pour nou obei li.​—Galat 5:22, 23.

17, 18. (a) Ki nou pou aprann dan sa liv? (b) Ki nou pou diskit lo la dan sa lot sapit?

¹⁷ Dan sa liv, nou pou aprann ki mannyer pour viv dan en fason ki fer Zeova plezir. Nou pou aprann ki mannyer pour aplik son bann prensip ek standar moral dan nou prop lavi. Pa bliye ki Zeova pa zanmen fors nou pour obei li. Ler nou swazir pour obei Zeova, nou pou viv en pli bon lavi e nou pou annan en zoli lavenir. Pli enportan ankor, ler nou obei Bondye, sa i montre li ki kantite nou kontan li.​—Vwar Lezot lenformasyon nimero 4.

¹⁸ Pour ed nou konn sa ki byen ek sa ki mal, Zeova in donn nou tou en konsyans. Si nou antrenn nou konsyans, i kapab ed nou pour “obei son bann komannman.” Alor, kisisa en konsyans e ki mannyer nou kapab antrenn li? Annou vwar.