1-3. (a) Ki bon kado Zeova in donn nou? Ki mannyer nou kapab mal servi li? (b) Ki mannyer nou devret servi nou abilite pour koze?

 EN PAPA i donn son garson adolesan en bisiklet. I vreman kontan pour donn li sa kado. Me, ki mannyer sa papa pou santi si son zanfan i mont sa bisiklet an foupanmal, tap en dimoun e fer li dimal?

² Zeova i sa Enn ki donn “tou don ki bon e tou kado parfe.” (Zak 1:17) Enn parmi sa bann kado i sa abilite pour koze. Ler nou koze, nou kapab eksprim nou panse ek santiman. Sa ki nou dir i kapab ed lezot e fer zot santi zot byen, me i osi kapab bles lezot e fer zot soufer.

³ Sa ki nou dir i kapab annan en gran lefe lo lezot e Zeova i montre nou ki mannyer pour byen servi sa abilite pour koze. I dir nou: “Okenn parol pouri pa devret sorti dan zot labous, me zot devret koz zis sa ki bon pour batir lezot dapre zot bezwen, pour ki sa i kapab benefisye sa ki ekoute.” (Efezyen 4:29) Annou vwar ki mannyer nou kapab servi sa kado sorti kot Bondye dan en fason ki fer li plezir e ki ankouraz lezot.

4, 5. Ki bann proverb dan Labib i montre nou lo lefe ki nou parol i kapab annan?

⁴ Parol i kapab annan en gran lefe lo lezot, alor nou bezwen vey sa ki nou dir e ki mannyer nou dir li. Proverb 15:4 i dir: “En bon parol i parey en pye dibwa ki donn lavi; me en parol kriyel i kas leker.” Zis parey en pye dibwa i kapab donn lonbraz ek bann bon keksoz, en bon parol i ankouraz e relev moral lezot. De lot kote, bann move parol i bles lezot e dekouraz zot.​—Proverb 18:21.

⁵ Proverb 12:18 i dir: “Bann parol [san reflesir] i blese parey en lepe.” Koz brit i kapab bles santiman en dimoun e gat zanmi. Petet ou rapel ler en dimoun ti mal koz avek ou e sa ti bles ou santiman. De lot kote sa menm proverb i dir: “Me parol en saz i geri.” En bon parol i kapab geri oubyen ankouraz en dimoun ki’n ganny ofanse. I kapab ed de zanmi ki ti’n fase akoz en mal konprenezon pour rezourd zot problenm. (Lir Proverb 16:24.) Ler nou konsyan ki nou parol i kapab afekte lezot, nou pou vey byen sa ki nou dir.

6. Akoz i difisil pour kontrol sa ki nou dir?

⁶ En lot rezon akoz nou devret vey byen sa ki nou dir i akoz nou tou nou enparfe. “Leker zonm i move” e sa ki nou dir i souvan sorti dan nou leker. (Zenez 8:21; Lik 6:45) I kapab vreman difisil pour kontrol sa ki nou dir. (Lir Zak 3:2-4.) Me nou bezwen kontinyen fer zefor pour amelyor lafason ki nou koz avek lezot.

7, 8. Ki mannyer sa ki nou dir i kapab afekte nou relasyon avek Zeova?

 ⁷ Nou bezwen vey byen sa ki nou dir parski nou bezwen rann kont avek Zeova pour sa ki nou dir oubyen lafason ki nou dir li. Zak 1:26 i dir: “Si en dimoun i panse ki i pe ador Bondye me i pa seryezman kontrol son labous, i pe anbet son lekor e son ladorasyon i initil.” Sa mo ki’n ganny tradwir “initil” i osi vedir “anven.” (1 Korentyen 15:17) Si nou pa vey byen sa ki nou dir, nou kapab gat e menm kas nou relasyon avek Zeova.​—Zak 3:8-10.

⁸ I kler ki nou annan bann bon rezon pour vey byen sa ki nou dir e lafason ki nou dir li. Pour ed nou byen servi sa abilite pour koze parey Zeova ti a kontan, nou bezwen konnen ki kalite parol nou devret evite.

9, 10. (a) Konmela ki mannyer bokou dimoun i koze? (b) Akoz nou pa devret servi bann parol sal?

⁹ Konmela bokou dimoun i kontan zoure e servi parol sal. En kantite dimoun i krwar ki zot bezwen zoure oubyen servi parol vilger pour dir sa ki zot annan pour dir. Bann komedyen i souvan servi bann dyok sal ek zoure pour fer dimoun riye. Me zapot Pol ti dir: “Zot devret debaras zot avek tousala: firer, lakoler, lemal, lensilt e pa les bann dyok sal sorti dan zot labous.” (Kolosyen 3:8) I ti osi dir ki bann “dyok sal” pa devret “ni menm ganny mansyonnen parmi” bann vre Kretyen.​—Efezyen 5:3, 4.

¹⁰ Zeova ek bann ki kontan li pa kontan bann parol sal akoz i enpir. Dan Labib, “lenpirte” i form parti bann “move kondwit lekor enparfe.” (Galat 5:19-21) “Lenpirte” i kapab enkli diferan kalite pese. Enn fwa ki en dimoun in fer en keksoz enpir, i pou pli fasil pour li fer en lot keksoz enpir. Si en dimoun i fer li en labitid pour servi bann parol sal e i pa oule arete, sa i montre ki i pa kapab kontinyen reste dan kongregasyon.​—2 Korentyen 12:21; Efezyen 4:19; vwar Lezot lenformasyon nimero 23.

11, 12. (a) Kwa ki mal avek fann rimer? (b) Akoz nou pa devret fer bann fo lakizasyon lo nou kanmarad?

¹¹ Nou pa devret fann rimer. I normal pour nou demontre lentere dan lezot e pour koz lo nou fanmir ek zanmi. Menm dan premye syek, bann Kretyen ti anvi konnen ki mannyer zot bann frer ek ser ti ete e ki zot ti kapab fer pour ed zot. (Efezyen 6:21, 22;  Kolosyen 4:8, 9) Me i fasil ler nou pe koz lo lezot dimoun pour konmans koz an mal lo zot. Si nou repet en keksoz ki nou’n tande, nou kapab dir bann keksoz ki pa vre oubyen koz lo bann keksoz personnel. Si nou pa fer atansyon, nou menm kapab konmans fer bann fo lakizasyon oubyen kalonmni. Bann Farizyen ti fer bann fo lakizasyon lo Zezi. (Matye 9:32-34; 12:22-24) Kalonmni i gat repitasyon dimoun, i fer divizyon, i bles santiman dimoun e i kas lanmitye.​—Proverb 26:20.

¹² Zeova i anvi ki nou koz dan en fason ki ed e ankouraz lezot, me pa dan en fason ki gat zanmi. Zeova i deteste bann ki “senm diskord” ant bann frer ek ser. (Proverb 6:16-19) Satan ki osi ganny apele Dyab i sa enn premye ki ti fer kalonmni par fer fo lakizasyon lo Bondye. (Revelasyon 12:9, 10) Konmela dan sa lemonn, i normal pour dimoun koz manti lo kanmarad. Me sa pa devret arive dan kongregasyon Kretyen. (Galat 5:19-21) Alor, nou devret vey sa ki nou dir e toultan reflesir avan nou koze. Avan ler ou repet en keksoz lo en lot dimoun, demann ou lekor: ‘Eski mon asire ki sa ki mon pe al dir i vre? Eski i bon pour repet sa parol? Eski i pou ankouraz lezot? Eski mon ti a kontan ki sa dimoun ki mon pe koz lo la i tande ki mon pe dir? Ki mannyer mon pou santi si en dimoun i dir sa lo mwan?’​—Lir 1 Tesalonisyen 4:11.

13, 14. (a) Ki lefe lensilt i kapab annan lo dimoun? (b) Akoz bann Kretyen pa devret ensilte lezot?

¹³ Par fwa, nou tou nou dir bann keksoz ki nou regrete pli tar. Me nou pa anvi fer li en labitid pour  kritik lezot, pour koz brit oubyen ensilte nou kanmarad. En vre Kretyen pa devret ensilte personn. Pol ti dir: “Debaras zot avek tou sort rankin, lakoler, firer, kriye ek lensilt.” (Efezyen 4:31) Lezot tradiksyon Labib i tradwir “lensilt” konman “move parol” oubyen “zoure.” Bann lensilt i fer dimoun perdi zot dinyite e fer zot santi ki zot pa vo nanryen. Sirtou bann zanfan i fasilman ganny blese, alor nou bezwen vey byen ki nou pa dir bann keksoz ki kapab dekouraz zot konpletman.​—Kolosyen 3:21.

¹⁴ Labib i averti nou konsernan serten lensilt, kot dimoun i kontinyelman maltret son kanmarad pli ba ki later. Pa i ti pou vreman fer lapenn si en dimoun ti fer sa avek son konzwen oubyen zanfan! Anfet, en dimoun ki pa oule aret ensilte lezot dan sa fason vreman grav pou nepli kapab ganny konsidere konman en Temwen Zeova. (1 Korentyen 5:11-13; 6:9, 10) Parey nou’n aprann, si nou dir bann parol sal, keksoz ki pa vre oubyen ki pa zantiy, nou pou gat nou relasyon avek Zeova e avek lezot.

15. Ki kalite parol ki kapab batir lezot?

¹⁵ Ki mannyer nou kapab servi nou abilite pour koze parey Zeova i anvi? Menm si Labib pa dir nou egzakteman tou sa ki nou devret dir oubyen pa dir, i dir nou, koz “zis sa ki bon pour batir lezot.” (Efezyen 4:29) Bann parol ki batir i pir, zantiy e vre. Zeova i anvi nou servi nou parol pour ankouraz e ed lezot. Sa i kapab difisil, akoz i demann plis zefor pour dir  bann bon keksoz ki ankourazan plito ki dir bann move keksoz oubyen koz an bonnavini. (Tit 2:8) Annou vwar serten keksoz ki nou kapab dir pour batir lezot.

16, 17. (a) Akoz nou devret felisit lezot? (b) Lekel ki nou kapab felisite?

¹⁶ Tou le de Zeova ek Zezi i kontan donn felisitasyon. Nou anvi imit zot. (Matye 3:17; 25:19-23; Zan 1:47) Pour felisit en dimoun dan en fason ankourazan, ou bezwen pran letan pour reflesir e demontre en lentere senser. Proverb 15:23 i dir: “En bon larepons i donn lazwa; en larepons apropriye i fer dibyen.” Nou ganny ankouraze ler en dimoun i senserman felisit nou pour nou travay dir oubyen montre lapresyasyon pour sa ki nou’n fer.​—Lir Matye 7:12; vwar Lezot lenformasyon nimero 27.

¹⁷ Si ou fer li en labitid pour toultan rod sa ki byen dan lezot, i pou pli fasil pour felisit en dimoun. Par egzanp, petet ou’n remarke ki en dimoun dan kongregasyon i prepar byen son diskour oubyen i fer zefor pour fer en komanter. En zenn i kapab defann laverite kot lekol oubyen en dimoun aze i kapab partisip dan predikasyon regilyerman. Petet zot zis bezwen en felisitasyon sorti kot ou pour ankouraz zot. I osi vreman enportan pour en msye dir son madanm ki i kontan li e apresye li. (Proverb 31:10, 28) Zis parey en plant i bezwen lalimyer ek delo, dimoun i bezwen santi ki zot ganny apresye. Sa i sirtou leka avek zanfan. Rod loportinite pour felisit zot pour zot bann bon kalite ek zefor. Felisitasyon i kapab fer en  dimoun annan plis kouraz ek konfyans e i menm kapab ankouraz zot pour fer plis zefor pour fer sa ki byen.

18, 19. Akoz nou devret fer nou mye pour ankouraz e rekonfort lezot? Ki mannyer nou kapab fer sa?

¹⁸ Ler nou ankouraz e rekonfort lezot, nou swiv legzanp Zeova. Zeova i vreman enterese avek bann “ki’n ganny kraze” ek “abese.” (Izai 57:15) Zeova i anvi ki nou “kontinyen ankouraz kanmarad” e “koz dan en fason ki pou konsol bann ki dan depresyon.” (1 Tesalonisyen 5:11, 14) Ler nou sey fer sa, Zeova i vwar e i apresye nou zefor.

 ¹⁹ Petet ou kapab remark en dimoun dan kongregasyon ki’n dekouraze oubyen dan depresyon. Ki ou kapab dir ki kapab ed sa dimoun? Petet ou pa kapab aranz sa problenm, me ou kapab montre sa dimoun ki ou enterese avek li. Par egzanp, ou kapab fer laranzman pour pas letan avek li. Ou kapab lir en verse Labib pour ankouraz li e menm fer lapriyer avek li. (Psonm 34:18; Matye 10:29-31) Toultan dir sa dimoun ki bann frer ek ser dan kongregasyon i kontan li. (1 Korentyen 12:12-26; Zak 5:14, 15) Koz dan en fason ki montre ki ou vreman senser e ki sa ki ou pe dir i sorti dan ou leker.​—Lir Proverb 12:25.

20, 21. Kwa ki fer li pli fasil pour dimoun aksepte konsey?

 ²⁰ Nou batir lezot osi ler nou donn zot bann bon konsey. Konman bann imen enparfe, nou tou nou bezwen konsey detanzaot. Proverb 19:20 i dir: “Ekout bann konsey e aksepte lenstriksyon; koumsa, pli tar, ou ava vin en saz.” Pa zis bann ansyen ki kapab donn konsey. Paran i bezwen donn en bon gidans zot zanfan. (Efezyen 6:4) Bann ser osi i kapab konsey kanmarad. (Tit 2:3-5) Vi ki nou kontan nou bann frer ek ser, nou anvi fer sir ki nou donn konsey dan en fason ki pa pou dekouraz zot. Kwa ki kapab ed nou?

²¹ Petet ou ankor mazinen ler en dimoun ti donn ou en bon konsey dan en fason ki ti fasil pour aksepte. Kwa ki ti fer sa konsey sitan efikas? Petet i akoz ou ti santi ki sa dimoun ti vreman enterese avek ou. Petet sa frer oubyen sa ser ti koz dan en fason zantiy e avek bokou lanmour. (Kolosyen 4:6) Sa konsey ti bezwen baze lo Labib. (2 Timote 3:16) Ki swa nou sit direkteman sa ki dan Labib oubyen non, nenport konsey ki nou donnen i devret baze lo Labib. Personn pa devret enpoz son lopinyon lo lezot oubyen mal servi Labib pour siport son bann nide personnel. Ler ou mazin lafason ki ou ou ti ganny konseye, sa i kapab ed ou ler ou donn konsey lezot.

22. Ki mannyer ou ti a kontan servi ou abilite pour koze?

²² Abilite pour koze i en kado sorti kot Bondye. Nou lanmour pour li i devret motiv nou pour vey byen sa ki nou dir. Rapel ki sa ki nou dir i kapab ankouraz oubyen dekouraz en dimoun. Alor, annou fer tou nou posib pour servi nou parol pour batir e ankouraz lezot.