1, 2. Akoz ou ti pou bezwen en gid si ou ti pe marse dan en landrwa ki ou pa konnen? Ki Zeova in donn nou pour gid nou?

 FER konmsi ou pe mars dan en gran dezer. Divan i soufle dan diferan direksyon e i fasil pour ou perdi. Ki mannyer ou pou konnen dan ki direksyon ou pou ale? Ou bezwen en keksoz pour gid ou. Petet ou kapab servi en konpa, en map, en GPS (Global Positioning System) oubyen menm en dimoun ki konn byen sa dezer. I enportan pour annan en gid,  akoz ou bezwen konnen kot ou pe ale si non ou kapab perdi ou lavi.

² Nou tou nou fer fas avek problenm dan lavi e parfwa nou kapab santi ki nou pa konnen ki pour fer. Me, Zeova in donn nou tou en konsyans pour gid nou. (Zak 1:17) Annou vwar kisisa konsyans e ki mannyer i marse. Apre nou pou vwar ki mannyer nou kapab konn byen servi nou konsyans, akoz nou devret pran an konsiderasyon konsyans lezot dimoun e ki mannyer en konsyans kler i kapab ed nou viv en pli bon lavi.

3. Kisisa konsyans?

³ Nou konsyans i en zoli kado ki Zeova in donn nou. I en keksoz dan nou ki ed nou konn sa ki byen ek sa ki mal. Sa mo Grek dan Labib ki’n ganny tradwir “konsyans” pe refer avek abilite ki dimoun i annan pour ziz son prop lekor. Ler nou konsyans i mars byen, i kapab ed nou pour egzamin onnetman sa ki nou vreman ete, nou bann panse ek santiman pli profon. I kapab gid nou pour fer sa ki byen e rezet sa ki mal. Ler nou fer en bon desizyon, nou konsyans i kapab fer nou santi nou byen e ler nou fer en move desizyon, i fer nou santi nou koupab.​—Vwar Lezot lenformasyon nimero 5.

4, 5. (a) Ki ti arive ler Adan ek Ev pa ti ekout zot konsyans? (b) Ki serten legzanp dan Labib ki montre ki mannyer konsyans i marse?

⁴ Nou tou nou kapab deside si nou pou ekout nou konsyans oubyen non. Adan ek Ev ti deside pour pa ekout zot konsyans e finalman zot ti fer  pese. Apre zot ti santi zot koupab, me i ti’n fini tro tar. Zot ti’n fini dezobei Bondye. (Zenez 3:7, 8) Menm si zot tou le de zot ti annan en konsyans parfe e zot ti konnen ki i mal pour dezobei Bondye, zot ti swazir pour pa ekout zot konsyans.

⁵ Par kont, i annan en kantite dimoun ki enparfe me ki ekout zot konsyans. Zob i en bon legzanp. Vi ki i ti fer bann bon desizyon, i ti dir: “Tan ki mon ankor vivan, mon leker pa pou kondann mwan.” (Zob 27:6, NWT) Ler Zob ti koz lo son “leker,” i ti pe refer avek son konsyans, sa ki fer li santi si en keksoz i byen ouswa mal. Par kont, par ler David pa ti ekout son konsyans e i ti dezobei Zeova. Apre sa, i ti santi li sitan koupab e son leker ti “konmans bat vit.” (1 Samyel 24:5) Sa ti konsyans David ki ti fer li santi ki sa ki i ti’n fer ti mal. Me ler i ti ekout son konsyans, i ti aprann pour pa repet menm fot ankor.

6. Akoz nou kapab dir ki nou konsyans i en kado ki Bondye in donn nou?

⁶ Menm dimoun ki pa konn Zeova i kapab konpran sa ki byen ek sa ki mal. Labib i dir: “Zot prop panse i akiz zot oubyen menm eskiz zot.” (Romen 2:14, 15) Par egzanp preski tou dimoun i konnen ki i mal pour touy en dimoun oubyen pour vole. Menm si zot pa realize, zot pe ekout zot konsyans, setadir, sa abilite ki Bondye in donn tou dimoun pour konn sa ki byen ek sa ki mal. Zot pe osi swiv bann prensip Bondye, setadir bann laverite de baz ki Zeova in donn nou pour ed nou fer bann bon swa dan lavi.

7. Akoz parfwa nou konsyans i kapab mal?

 ⁷ Me parfwa, nou konsyans i kapab mal. Par egzanp, nou panse oubyen santiman enparfe i kapab anpes nou konsyans fer en bon desizyon e anmenn nou dan en move direksyon. En konsyans ki ed nou pour fer bann bon desizyon pa vin koumsanmenm. (Zenez 39:1, 2, 7-12) Nou bezwen antrenn li. Pour ed nou fer sa, Zeova in donn nou son lespri sen ek bann prensip Labib. (Romen 9:1) Annou vwar ki mannyer nou kapab antrenn nou konsyans.

8. (a) Akoz nou konsyans i kapab fer nou fer bann move desizyon? (b) Avan fer en desizyon, ki nou devret demann nou lekor?

⁸ Serten dimoun i krwar ki ekout zot konsyans i senpleman vedir fer sa ki zot santi i byen dapre zot. Zot krwar ki zot kapab fer sa ki zot anvi tan ki zot santi zot byen. Me nou pa parfe e nou kapab anbet nou prop lekor pour fer sa ki mal. Sa ki en dimoun i anvi i kapab afekte lafason ki son konsyans i marse. Labib i dir: “Leker i pli tret ki okenn keksoz e i tre move. Lekel ki kapab konn li?” (Zeremi 17:9, NWT) Alor, nou kapab konmans krwar ki en keksoz i byen menm si i mal. Par egzanp, avan Pol ti vin en Kretyen, i ti persekit pep Bondye e i ti krwar ki sa ki i ti pe fer ti byen. Pour li, son konsyans ti kler. Me pli tar i ti dir: “Zeova i sa enn ki ziz mwan.” (1 Korentyen 4:4; Akt 23:1; 2 Timote 1:3) Ler Pol ti aprann ki Zeova pa ti kontan sa ki i ti pe fer, i ti realize ki i bezwen sanze. I kler ki avan nou fer en keksoz, nou  bezwen demann nou lekor, ‘Ki Zeova ti a kontan mon fer?’

9. Ki savedir annan en gran respe pour Bondye?

⁹ Ler ou kontan en dimoun, ou pa anvi depler li. Alor, vi ki nou kontan Zeova, nou pa anvi fer nanryen ki pou depler li. Nou devret annan en gran respe pour Zeova e se sa ki pou fer nou pa depler li. Nou vwar sa atraver legzanp Neemya. I ti refize pour servi son pozisyon konman gouverner pour vin ris. Akoz? I ti dir ki i pa ti fer sa, “par respe pour Bondye.” (Neemya 5:15) Neemya pa ti oule fer nanryen ki ti pou fer Zeova mekontan. Parey Neemya, nou osi nou pa anvi fer nanryen ki pou depler Zeova akoz nou annan en gran respe pour li. Nou kapab konn bann keksoz ki fer Zeova plezir par lir Labib.​—Vwar Lezot lenformasyon nimero 6.

10, 11. Ki prensip Labib ki kapab ed nou fer bann bon desizyon lo lalkol?

¹⁰ Par egzanp, en Kretyen i bezwen deside si i pou bwar lalkol oubyen non. Ki prensip dan Labib ki pou ed li fer en bon desizyon? La detrwa: Labib pa defann bwar lalkol. Anfet, i dir nou ki diven i en kado sorti kot Bondye. (Psonm 104:14, 15) Par kont, Zezi ti dir son bann disip ki zot pa devret “bwar tro bokou.” (Lik 21:34) Pol ti demann bann Kretyen pour “pa partisip dan bann parti san kontrol [e pour] pa bwar pour sou.” (Romen 13:13) I ti dir ki bann soular “pa pou antre dan Rwayonm Bondye.”​—1 Korentyen 6:9, 10.

¹¹ En Kretyen i kapab demann son lekor: ‘Ki  kantite enportan lalkol i ete dan mon lavi? Eski mon bezwen bwar lalkol pour mwan relaks? Eski mon bezwen bwar pour mwan annan lardyes? Eski mon kapab kontrol lakantite ki mon bwar? Eski mon kapab annan en kontrol lo kantite fwa ki mon bwar lalkol? * Eski mon kapab anmize avek mon bann zanmi menm si napa lalkol?’ Nou kapab demann Zeova pour ed nou fer bann bon desizyon. (Lir Psonm 139:23, 24.) Dan sa fason, nou antrenn nou konsyans pour konpran e aplik bann prensip Labib. Me parey nou pou vwar, i annan lezot fakter ki enplike.

12, 13. Akoz nou konsyans i kapab diferan avek konsyans lezot? Ki nou devret fer ler nou napa menm pwennvi avek lezot?

¹² Nou tou nou konsyans i diferan. Ou konsyans i kapab permet ou pour fer en keksoz me en lot dimoun i kapab santi ki i napa drwa fer sa. Par egzanp, ou kapab deside pour bwar lalkol me en lot dimoun i santi ki i pa devret. Kwa ki fer de dimoun annan diferan pwennvi lo la?

¹³ Pwennvi en dimoun lo serten keksoz i souvan ganny enfliyanse par landrwa kot i’n grandi, pwennvi son fanmir, sa ki i’n eksperyanse dan lavi ek lezot fakter. Par egzanp, konsernan lalkol, en dimoun ki pa ti kapab kontrol lakantite lalkol ki i ti  bwar i kapab deside pour pa bwar ditou. (1 Lerwa 8:38, 39) Alor, si ou ofer en dimoun lalkol e i refize bwar, ki ou pou fer? Eski ou pou ofanse? Eski ou pou ensiste? Eski ou pou demann li akoz i’n refize? Non, parski ou respekte son konsyans.

14, 15. Ki ti arive dan letan zapot Pol? Ki bon konsey Pol ti donnen?

¹⁴ Dan letan zapot Pol, i ti annan en sityasyon ki ti montre ki mannyer konsyans dimoun i diferan. Lavyann ki ti pe ganny vann dan bazar ti’n ganny sakrifye avek bann zidol dan fo ladorasyon. (1 Korentyen 10:25) Pol pa ti vwar li mal pour aste e manz sa lavyann. Pour li, tou manze ti sorti kot Zeova. Me serten frer ki dan lepase ti ador sa bann zidol ti annan en pwennvi diferan. Pour zot, i ti mal pour manz sa lavyann. Eski Pol ti mazinen: ‘Sa pa fatig mon konsyans. Mon annan drwa manz sa ki mon anvi.’

¹⁵ Pol pa ti mazin koumsa. Santiman son bann frer ti sitan enportan pour li ki i ti pare pour li met zot lentere avan sa ki pour li. Pol ti dir ki nou pa devret “fer plezir nou prop lekor.” I ti osi dir: “Parski menm Kris pa ti fer plezir son prop lekor.” (Romen 15:1, 3) Parey Zezi, Pol ti met lentere lezot avan sa ki pour li.​—Lir 1 Korentyen 8:13; 10:23, 24, 31-33.

16. Akoz nou pa devret ziz bann ki zot konsyans i permet zot fer keksoz ki dapre nou i mal?

¹⁶ Me ki pou arive si konsyans en lot dimoun i permet li pour fer en keksoz ki dapre nou i mal? Nou bezwen fer byen atansyon pour pa kritik lezot  oubyen ensiste ki nou nou byen e lezot i mal. (Lir Romen 14:10.) Zeova in donn nou en konsyans pour ziz nou prop lekor me pa pour ziz lezot. (Matye 7:1) Nou pa pou zanmen anvi ki nou swa personnel i kree okenn divizyon dan kongregasyon. Nou plito rod fason pour promot lanmour ek linite.​—Romen 14:19.

17. Ki’n arive avek konsyans serten dimoun?

¹⁷ Zapot Pyer ti ekri: “Gard en konsyans kler.”  (1 Pyer 3:16) Me malerezman, ler dimoun i kontinyen inyor bann prensip Zeova, avek letan zot konsyans i aret averti zot. Pol ti dir ki zot konsyans “i nepli sansib” oubyen “zot konsyans in ganny marke avek en feray so.” (1 Timote 4:2, not) Eski ou’n deza ganny brile? Ler sa i arive, ou lapo i ganny en sikatris e i nepli sansib. Si en dimoun i kontinyen fer bann move keksoz, son konsyans pou nepli “sansib” e avek letan i pou aret marse.

18, 19. (a) Ler nou santi nou koupab oubyen onte, ki sa i montre nou? (b) Ki nou kapab fer menm si apre ki nou’n repantir, nou ankor pe santi nou koupab?

¹⁸ Anfet, ler nou santi nou koupab, nou konsyans pe dir nou ki nou’n fer en keksoz mal. Sa  santiman i kapab ed nou idantifye sa ki nou’n fer e aret fer sa keksoz. Nou anvi aprann atraver nou fot pour nou pa repet sa menm fot. Par egzanp, menm si Lerwa David ti fer pese, son konsyans ti pous li pour repantir. Akoz sa ki i ti’n eksperyanse, David ti kapab dir ki Zeova i “bon e pare pour pardonnen.”​—Psonm 51:1-19; 86:5; vwar Lezot lenformasyon nimero 7.

¹⁹ Me menm plizyer lannen apre ki en dimoun in repantir, son konsyans i kapab fer li kontinyen santi li koupab. Sa santiman i kapab fatig li en kantite e fer li santi ki i pa vo nanryen. Si parfwa ou santi ou koumsa, rapel ki ou pa kapab sanz sa ki’n arive dan lepase. Menm si ou ti konn tre byen ki sa i mal,  Zeova in konpletman pardonn ou e i’n efas ou pese. Ou prop devan lizye Zeova e la aprezan ou pe fer sa ki byen. Kantmenm sa, petet ou leker i ankor pe kondann ou, me Labib i dir: “Bondye i pli gran ki nou leker.” (Lir 1 Zan 3:19, 20.) Savedir ki son pardon ek lanmour i pli for ki okenn santiman koupab oubyen laont ki nou kapab annan. Ou kapab asire ki Zeova in pardonn ou. Ler en dimoun i aksepte ki Zeova in pardonn li, i pou santi li anpe e i pou servi Bondye dan lazwa.​—1 Korentyen 6:11; Ebre 10:22.

20, 21. (a) Ki mannyer sa liv i kapab ed ou? (b) Ki liberte Zeova in donn nou? Ki mannyer nou devret servi sa liberte?

²⁰ Sa liv in ganny ekrir pour ed ou antrenn ou konsyans, pour ki i kapab averti e protez ou dan sa bann dernyen zour difisil. I pou osi ed ou aplik bann prensip Labib dan diferan sityasyon lavi. Byensir, sa liv pa pe donn nou en lalis bann lareg ki nou devret swiv dan sak sityasyon. Nou “obei lalwa Kris,” ki baze lo prensip Bondye. (Galat 6:2) Vi ki napa en lalwa spesifik lo tou keksoz, nou pa devret servi sa konman en leskiz pour fer sa ki mal. (2 Korentyen 4:1, 2; Ebre 4:13; 1 Pyer 2:16) Nou plito servi nou liberte pour montre ki nou kontan Zeova.

²¹ Ler nou medit lo bann prensip Labib e met zot an pratik, nou aprann servi nou ‘abilite pour ziz’ sa ki byen ek sa ki mal e annan menm pwennvi ki Zeova. (Ebre 5:14) Ler nou fer sa, nou pou annan en konsyans ki’n ganny byen antrennen ki pou gid nou e ed nou reste dan lanmour Bondye.