1-3. (a) Ki mannyer bokou dimoun i santi konsernan zot travay? (b) Ki kestyon nou pou egzaminen dan sa sapit?

 DIMOUN partou dan lemonn i travay dir pour pran swen avek zot lekor ek zot fanmir. En kantite dimoun pa kontan zot travay e pour serten, zis al travay sak zour i en traka. Si ou santi ou koumsa, ki ou kapab fer pour ki ou travay i pli gou? Ki mannyer ou kapab kontan ou travay?

² Zeova i dir nou: “I en kado Bondye pour en zonm manze, bwar e pran plezir dan rezilta son travay.” (Eklezyast 3:13) Zeova ti kree nou avek sa bezwen ek dezir pour travay. I anvi nou kontan sa ki nou fer.​—Lir Eklezyast 2:24; 5:18, NWT.

³ Alor, kwa ki kapab ed nou trouv plezir dan nou travay? Ki kalite travay ki bann Kretyen pa devret fer? Ki mannyer nou kapab annan en bon balans ant nou travay ek nou ladorasyon pour Zeova? Lekel sa travay pli enportan ki nou devret fer?

4, 5. Ki pwennvi Zeova lo travay?

⁴ Zeova li menm i kontan travay. Zenez 1:1 i dir: “O konmansman, Bondye ti kree lesyel ek later.”  Apre ki Bondye ti’n fini kree later e tou sa ki lo la, i ti dir ki tou sa ki i ti’n kree ti “tre bon.” (Zenez 1:31) Nou Kreater ti satisfe avek sa ki i ti’n fer.​—1 Timote 1:11.

⁵ Zeova pa’n zanmen aret travay. Zezi ti dir: “Mon Papa in kontinyen travay ziska prezan.” (Zan 5:17) I vre nou pa konn tou sa bann keksoz merveye ki Zeova in fer, me i annan serten keksoz ki nou konnen. I’n swazir bann ki pou dirize ansanm avek son Garson, Zezi Kri, dan son Rwayonm. (2 Korentyen 5:17) Zeova pe osi gid e pran swen avek bann imen. Gras a sa travay predikasyon ki pe ganny fer dan lemonn antye, plizyer milyon dimoun pe aprann konn Zeova e zot annan lespwar pour viv pour touzour dan Paradi lo later.​—Zan 6:44; Romen 6:23.

6, 7. Ki kalite travayer Zezi i ete?

⁶ Parey son Papa, Zezi osi i kontan travay. Avan i ti vin lo later, Bondye ti servi Zezi konman son “zouvriye abil” ler i ti pe kree tou sa ki dan lesyel e lo later. (Proverb 8:22-31, NWT; Kolosyen 1:15-17) Ler i ti lo later, Zezi ti kontinyen travay dir. Ler i ti en zenn onm, i ti vin en bon sarpantye e i posib ki i ti fer bann meb ek lakaz. Zezi ti sitan fer byen son travay ki dimoun ti konn li konman en “sarpantye.”​—Mark 6:3.

⁷ Me sa travay pli enportan ki Zezi ti fer ler i ti lo later ti pres sa bon nouvel e ansenny dimoun lo Zeova. I ti annan trwa-z-an edmi pour fini son minister e i ti travay vreman dir depi bomaten ziska tar aswar. (Lik 21:37, 38; Zan 3:2) Zezi ti mars plizyer  santenn kilomet lo bann semen ranpli avek lapousyer pour anons sa bon nouvel avek otan dimoun posib.​—Lik 8:1.

8, 9. Akoz Zezi ti kontan son travay?

⁸ Pour Zezi, fer travay Bondye ti parey manze. Travay pour Bondye ti donn li lafors ek lenerzi. I annan zour ki Zezi ti travay sitan dir ki i pa ti ni menm ganny letan manze. (Zan 4:31-38) I ti servi sak loportinite ki i ti gannyen pour ed lezot konn son Papa. Sanmenm sa i ti kapab dir Zeova: “Mon’n fini sa travay ki ou’n donn mwan pour fer e mon’n glorifye ou lo later.”​—Zan 17:4.

⁹ I kler ki Zeova ek Zezi i travay vreman dir e zot trouv lazwa ek satisfaksyon dan zot travay. Nou oule “swiv legzanp Bondye” e nou anvi “swiv lepa [Zezi] fidelman.” (Efezyen 5:1; 1 Pyer 2:21) Sanmenm sa nou esey travay dir e fer nou mye dan tou sa ki nou fer.

10, 11. Kwa ki kapab ed nou pour annan en latitid pozitif lo nou travay?

¹⁰ Konman pep Zeova, nou travay dir pour pran swen avek nou lekor ek nou fanmir. Nou anvi trouv lazwa dan nou travay, me sa i kapab en defi. Alor, ki nou kapab fer si nou pa kontan nou travay?

¹¹ Devlop en latitid pozitif. Petet nou pa kapab sanz nou travay oubyen lakantite travay ki nou fer, me nou kapab sanz nou latitid. Ler nou konpran sa ki Zeova i ekspekte avek nou, sa i kapab ede. Par  egzanp: Zeova i ekspekte ki en sef fanmir i fer tou sa ki i kapab pour pran swen avek bezwen son fanmir. Anfet, Labib i dir ki en dimoun ki pa pran swen avek son fanmir “i pli pir ki en dimoun ki napa lafwa.” (1 Timote 5:8) Si ou en sef fanmir, ou bezwen travay dir pour pran swen avek ou fanmir. Ki swa ou kontan oubyen ou pa kontan sa travay ki ou pe fer, ou konnen ki ler ou pran swen avek ou fanmir, ou fer plezir Zeova.

12. Ki byenfe nou gannyen ler nou onnet e travay dir?

¹² Ou bezwen onnet e travay dir. Sa i kapab fer li pli fasil pour ou kontan ou travay. (Proverb 12:24; 22:29) Deplis, ou anplwayer pou annan konfyans dan ou. Bann anplwayer i kontan bann anplwaye ki onnet akoz zot pa vol larzan, materyo oubyen letan. (Efezyen 4:28) Pli enportan ankor, Zeova i konnen ler ou onnet e travay dir. Ou kapab annan en “bon konsyans” parski ou konnen ou pe fer plezir sa Bondye ki ou kontan.​—Ebre 13:18; Kolosyen 3:22-24.

13. Ki i kapab arive si nou onnet?

¹³ Ou kondwit kot travay i kapab glorifye Zeova. Sa i donn nou en lot rezon pour nou kontan nou travay. (Tit 2:9, 10) I kapab arive ki enn ou koleg travay pou anvi etidye Labib akoz ou bon legzanp.​—Lir Proverb 27:11; 1 Pyer 2:12.

14-16. Ki nou bezwen reflesir lo la ler nou pe rod en travay?

¹⁴ Dan Labib, napa en lalis tou travay ki en Kretyen i kapab fer oubyen pa kapab fer. Me i annan bann prensip ki kapab ed nou pour fer bann bon  desizyon konsernan travay. (Proverb 2:6) Par servi bann prensip Labib, reponn sa bann kestyon:

¹⁵ Eski mon pou bezwen fer en keksoz ki Zeova pa kontan dan sa travay? Nou’n aprann konsernan bann pratik ki Zeova pa kontan, parey vole e koz manti. (Egzod 20:4; Akt 15:29; Efezyen 4:28; Revelasyon 21:8) Alor nou bezwen veye ki nou pa fer okenn travay ki kont bann standar Zeova.​—Lir 1 Zan 5:3.

 ¹⁶ Eski sa travay i siport oubyen promot en pratik ki Zeova i kondannen? Par egzanp, ki ou ti pou fer si ou ti ganny ofer pour travay konman en sekreter dan en landrwa kot i zwe larzan? I napa nanryen mal avek sa travay konman en sekreter. Me ou konnen ki mannyer Zeova i santi konsernan zwe larzan. Alor, menm si ou pa personnelman enplike dan sa bann zwe larzan, eski dan en sans ou pe partisipe pour siport zwe larzan ek vorasite, en keksoz ki mal dan lizye Bondye?​—Efezyen 5:3-5.

17. Kwa ki kapab ed nou pour fer bann desizyon ki fer plezir Bondye?

¹⁷ Ler nou swiv bann prensip Labib, parey Ebre 5:14 i dir, nou pou “aprann servi [nou] abilite pour zize pour [nou] kapab fer diferans ant sa ki byen ek sa ki mal.” Demann ou lekor: ‘Si mon aksepte sa travay, eski sa i kapab afekte lezot dan kongregasyon? Eski sa travay pou fer mwan kit mon konzwen ek zanfan e al dan en lot pei? Ki mannyer sa pou afekte zot?’

18. Akoz i kapab difisil pour gard nou ladorasyon dan premye plas?

¹⁸ I pa toultan fasil pour gard nou ladorasyon pour Zeova dan premye plas dan sa “letan vreman difisil.” (2 Timote 3:1) Rod e gard en travay i kapab difisil. Nou bezwen pran swen avek nou fanmir, me nou konnen ki nou ladorasyon pour Bondye i pli enportan. Nou pa kapab les bann keksoz materyel vin sitan enportan dan nou lavi. (1 Timote 6:9, 10) Alor, ki mannyer nou kapab “verifye sa ki pli  enportan” e an menm tan pran byen swen avek nou fanmir?​—Filipyen 1:10.

19. Ki mannyer nou konfyans dan Zeova i kapab ed nou pour gard nou travay dan son plas apropriye?

¹⁹ Met tou ou konfyans dan Zeova. (Lir Proverb 3:5, 6.) Nou konnen ki Bondye i konn egzakteman sa ki nou bezwen e i vreman enterese avek nou. (Psonm 37:25; 1 Pyer 5:7) Son Parol Labib i dir nou: “Montre dan zot fason viv ki zot pa kontan larzan e kontant zot avek sa ki zot annan. Parski [Bondye] in dir: ‘Mon pa pou zanmen kit ou e mon pa pou zanmen abandonn ou.’” (Ebre 13:5) Zeova pa anvi ki nou toultan trakase lo konman pour okip nou fanmir. Plizyer fwa, i’n montre ki i kapab pran swen avek son pep. (Matye 6:25-32) Nenport ki travay ki nou annan, nou devret regilyerman etidye Parol Bondye, pres sa bon nouvel e asiste nou bann renyon Kretyen.​—Matye 24:14; Ebre 10:24, 25.

20. Ki mannyer nou kapab viv en lavi senp?

²⁰ Viv en lavi senp. (Lir Matye 6:22, 23.) Get en sel keksoz i vedir viv en lavi senp pour ki ou kapab konsantre lo servi Zeova. Nou konnen ki i pou bet pour nou les larzan, en lavi deliks oubyen bann keksoz dernyen model vin pli enportan ki nou relasyon avek Zeova. Alor, kwa ki pou ed nou met servis Zeova premye dan nou lavi? Nou devret fer nou mye pour pa andet nou lekor. Si ou deza annan en det, esey organiz ou pour redwir oubyen pey sa det konpletman. Si nou pa fer atansyon, bann keksoz materyel i kapab pran bokou nou letan ek lenerzi e  nou pa pou ganny letan pour priye, etidye oubyen prese. Olye les bann keksoz materyel konplik nou lavi, nou anvi aprann kontant nou avek bann keksoz de baz parey “manze ek lenz.” (1 Timote 6:8) Dan nenport ki sityasyon nou ladan, i byen pour egzamin nou detanzaot pour vwar ki mannyer nou kapab servi Zeova pli byen.

21. Akoz nou bezwen konn nou priyorite dan lavi?

²¹ Konn ou priyorite. Nou bezwen byen servi  nou letan, lenerzi ek keksoz materyel. Si nou pa fer atansyon, bann keksoz ki mwen enportan, parey ledikasyon oubyen larzan pou pran tou nou letan. Zezi ti dir: “Kontinyen rod Rwayonm . . . premye.” (Matye 6:33) Nou bann desizyon, labitid, lobzektif ek nou routin dan lavi toulezour pou montre sa ki premye dan nou leker.

22, 23. (a) Ki sa travay pli enportan ki bann Kretyen i annan? (b) Kwa ki pou ed nou kontan nou travay?

²² Travay pli enportan ki nou annan se servi Zeova e anons sa bon nouvel avek lezot. (Matye 24:14; 28:19, 20) Parey Zezi, nou anvi fer tou sa ki nou kapab dan sa travay. Serten i al servi dan bann landrwa kot i annan en bezwen pour plis dimoun pour anons sa bon nouvel. Lezot pe aprann en nouvo langaz pour ki zot kapab anons sa mesaz avek dimoun ki koz sa langaz. Koz avek bann dimoun ki’n deza fer sa. Zot pou dir ou ki zot pli ere e ki zot satisfe avek zot lavi.​—Lir Proverb 10:22.

²³ Ozordi, dimoun i bezwen pas en kantite letan dan en travay oubyen dan detrwa travay zis pour kapab donn zot fanmir bann keksoz de baz. Zeova i konn sa e i apresye tou sa ki nou pe fer pour pran swen avek nou fanmir. Annou kontinyen swiv legzanp Zeova ek Zezi par travay dir, dan nenport ki travay ki nou fer. Pa bliye ki sa travay pli enportan i pour servi Zeova e anons sa bon nouvel lo Rwayonm Bondye. Sa pou anmenn vre lazwa.