Pour bann ki kontan Zeova ek son Parol, Labib:

Zezi ti dir: “Zot pou konn laverite e laverite pou fer zot lib.” (Zan 8:32) Eski ou rapel ki mannyer ou ti santi ler ou ti fek aprann laverite ki dan Labib? I ti gou pour konnen ki menm si nou pe viv dan en lemonn ki ranpli avek mansonz, nou kapab konn laverite.​—2 Timote 3:1.

Nou Bondye, Zeova i anvi nou konn laverite. Vi ki nou kontan dimoun, nou anvi koz avek zot lo la. Me servi Bondye i enplik plis ki sa. Vi ki nou annan en gran respe pour bann prensip Bondye, nou devret fer nou mye pour viv konman bann Kretyen. Zezi ti eksplike ki mannyer nou kapab montre Bondye ki nou kontan li. I ti dir: “Si zot obei mon bann komannman, zot pou reste dan mon lanmour, zis parey mon’n obei komannman mon Papa e mon reste dan son lanmour.”​—Zan 15:10.

Zezi i vreman kontan son Papa e i fer tou sa ki son Papa i demann li pour fer. Si nou swiv legzanp Zezi dan nou lavi toulezour, Zeova pou kontan nou e nou pou vreman ere. Parey Zezi ti dir, “si zot konn sa bann keksoz, ere si zot fer li.”​—Zan 13:17.

Nou swete ki sa liv pou ed zot aprann viv annakor avek laverite ki dan Labib e vin zanmi Bondye. Nou priye ki zot lanmour pour Bondye i kontinyen vin pli for e ki zot reste “dan lanmour Bondye, anmezir zot espere . . . pour ki zot a ganny lavi eternel.”​—Zid 21.