1, 2. (a) Ki bann nouvo koup ki’n marye ti a kontan? (b) Ki kestyon nou pou diskite dan sa sapit?

 IMAZIN en nouvo ek nouvel marye zour zot maryaz. Zot vreman kontan pour konmans en nouvo lavi ansanm e zot lavenir i ranpli avek lespwar.

² Kantmenm sa, en kantite maryaz ki byen konmanse i souvan mal fini. Pour en maryaz reisi e ere, en koup i bezwen gidans Bondye. Annou vwar larepons ki Labib i donnen pour sa bann kestyon swivan: Ki byenfe i annan dan maryaz? Si ou deside marye, ki mannyer ou kapab swazir byen sa dimoun ki ou pou marye avek? Ki mannyer ou kapab vin en bon msye oubyen madanm? Kwa ki kapab ede pour ki en maryaz i reisi?​—Lir Proverb 3:5, 6.

3. Eski ou krwar ki en dimoun i bezwen marye pour li ere? Eksplike.

³ Serten dimoun i krwar ki en dimoun pa kapab ere amwen ki i marye. Me sa pa vre. Zezi ti dir ki lavi en selibater i en don oubyen en kado. (Matye 19:11, 12) Zapot Pol osi ti koz lo lavantaz ki i annan  pour viv en lavi selibater. (1 Korentyen 7:32-38) Me maryaz i en desizyon personnel. Ou pa devret les ou zanmi, fanmir oubyen kiltir met presyon lo ou pour marye.

4. Ki serten lavantaz en bon maryaz?

⁴ Labib i dir ki maryaz osi i en kado sorti kot Bondye e ki i annan serten lavantaz pour marye. Zeova ti dir sa konsernan sa premye zonm, Adan: “I pa bon pour zonm reste tousel. Mon pou fer en led ki [“al byen,” NWT] avek li konman son konpanyon.” (Zenez 2:18) Zeova ti kree Ev pour vin madanm Adan e zot ti vin sa premye fanmir lo later. Si en koup marye i ganny zanfan, bann zanfan pou grandi dan en lanvironnman stab e an sekirite. Me annan zanfan pa sa sel rezon ki de dimoun i devret marye.​—Psonm 127:3; Efezyen 6:1-4.

5, 6. Ki mannyer en maryaz i kapab parey “en lakord ki’n tres an trwa”?

⁵ Lerwa Salomon ti ekri: “De i pli bon ki enn, akoz zot annan en bon rekonpans pour travay dir ki zot in fer. Akoz si enn i tonbe, sa lot i kapab lev son konpanyon. Me ki pou arive avek sa enn ki tousel e ki tonbe si napa en lot pour lev li? . . . Deplis, i pa fasil pour kas en lakord ki’n tres an trwa.”​—Eklezyast 4:9-12, NWT.

⁶ De dimoun ki’n marye i kapab vin de zanmi vreman pros ki ed, konsol e protez kanmarad. Lanmour i kapab fer en maryaz vreman for, me i pou vin pli for ankor ler sa msye ek sa madanm i ador Zeova. Dan sa ka, zot maryaz pou vin parey “en lakord ki’n  tres an trwa,” ki byen sere. En lakord koumsa i pli for ki en lakord ki’n tres an de. En maryaz pou vin pli for si Zeova i form parti sa maryaz.

7, 8. Ki konsey Pol ti donnen lo maryaz?

⁷ Ler en koup i marye, zot kapab satisfer zot dezir seksyel dan en fason apropriye. (Proverb 5:18) Me si en dimoun i marye zis pour li satisfer son bann dezir, i kapab mal swazir son konzwen. Sanmenm sa, Labib i dir ki en dimoun i devret marye si i “pa tro zenn,” savedir ler i’n depas sa letan kot son dezir seksyel i vreman for. (1 Korentyen 7:36) I pli bon espere ziska ki sa bann dezir in pas en pe. Si i fer sa, i kapab pli byen reflesir e fer en pli bon swa.​—1 Korentyen 7:9; Zak 1:15.

⁸ Si ou pe mazin marye, i bon si ou realistik e ki ou konsyan ki dan sak maryaz, i annan problenm. Pol ti dir ki bann ki marye “pou ganny problenm dan zot lavi.” (1 Korentyen 7:28) Menm dan sa pli bon maryaz, i pou annan problenm. Alor, si ou deside marye, fer sir ki ou byen swazir ou konzwen.

9, 10. Ki kapab arive si nou marye avek en dimoun ki pa servi Zeova?

⁹ La en prensip Labib ki vreman enportan pour mazinen ler ou pe rod en msye oubyen en madanm: “Pa bezwen asosye zot avek dimoun ki pa krwar dan Bondye.” (2 Korentyen 6:14, not) Dan sa verse dan langaz Grek, Pol ti servi sa mo “zoug” ki fer nou mazin sa ki pase lo en laferm. En fermye pa ti pou  met de zannimo ki pa menm groser ek lafors anba menm zoug pour trenn en keksoz. I pa ti pou bon parski tou le de zannimo ti pou soufer. Pareyman, si en dimoun ki ador Zeova i marye avek en dimoun ki pa servi li, i tre probab ki zot pou ganny en kantite problenm. Se pour sa rezon ki Labib i donn nou sa bon konsey pour marye “selman avek en disip Senyer.”​—1 Korentyen 7:39.

¹⁰ Parfwa serten Kretyen i krwar ki i pli bon marye avek en dimoun ki pa servi Zeova plito ki reste tousel. Me, si nou pa ekout konsey ki Labib i donnen, souvan nou soufer e nou malere. Konman bann adorater Zeova, servi li i sa keksoz pli enportan dan nou lavi. Ki mannyer ou pou santi si ou pa kapab partaz bann keksoz pli enportan dan ou lavi avek ou konzwen? En kantite dimoun i deside reste selibater plito ki marye avek en dimoun ki pa kontan Zeova e ki pa servi li.​—Lir Psonm 32:8.

11. Ki mannyer ou kapab byen swazir ou msye oubyen madanm?

¹¹ Me sa pa vedir ki nenport ki dimoun ki servi Zeova pou vin en bon msye oubyen en bon madanm pour ou. Si ou pe mazin marye, rod en dimoun ki ou vreman kontan e ki annan en personnalite ki ou kapab adapte avek. Pran letan pour zwenn en dimoun ki anvi fer menm keksoz avek ou dan lavi e ki met servis Bondye premye. Osi, lir e medit lo bann bon konsey lo maryaz ki ganny trouve dan bann piblikasyon sorti kot lesklav fidel e pridan.​—Lir Psonm 119:105.

12. Ki nou aprann atraver sa koutim dan Labib, kot paran ti swazir msye oubyen madanm pour zot zanfan?

 ¹² Dan serten kiltir, i en koutim pour paran swazir en konzwen pour zot garson oubyen fiy. Dimoun ki swiv sa koutim i santi ki paran i konn sa ki pli byen pour zot zanfan. Sa ti osi leka dan letan Labib. Alor, si ou fanmir i swiv en koutim koumsa, Labib i kapab ed paran pour konnen ki kalite pour rode dan en dimoun. Par egzanp, ler Abraam ti swazir en madanm pour son garson Izaak, sa ki ti pli enportan, pa ti larzan oubyen ran sosyal, me ki sa madanm ti  kontan Zeova.​—Zenez 24:3, 67; vwar Lezot lenformasyon nimero 25.

13-15. (a) Ki mannyer en zonm i kapab prepar li pour vin en bon msye? (b) Ki mannyer en madanm i kapab prepar li pour vin en bon madanm?

¹³ Si ou pe mazin marye, fer sir ki ou’n pare. Petet ou krwar ki ou’n pare, me annou vwar ki mannyer nou kapab vreman prepar nou pour maryaz. Larepons i kapab sirprann ou.

¹⁴ Labib i montre ki bann msye ek madanm i annan diferan rol dan fanmir. Alor, sa ki en msye ek en madanm i fer pour prepare pour maryaz i kapab diferan. Si en msye pe mazin marye, i bezwen demann son lekor si i pare pour vin sef en fanmir. Zeova i ekspekte en msye pran swen avek son madanm ek zanfan lo kote emosyonnel e materyel. Me pli enportan, i responsabilite en msye pour fer sir ki son fanmir i ador Bondye. Labib i dir ki en zonm ki pa pran swen avek son fanmir i “pli pir ki en dimoun ki napa lafwa.” (1 Timote 5:8) Alor, si ou en msye ki pe mazin marye, reflesir lo konman ou kapab aplik sa prensip Labib: “Prepar ou travay deor e met tou keksoz pare dan plantasyon. Apre, batir ou lakour.” Andotmo, avan ou deside marye, fer sir ki ou sa kalite msye ki Zeova i ekspekte.​—Proverb 24:27, NWT.

¹⁵ En madanm ki pe mazin marye i bezwen demann son lekor si i’n pare pour desarz responsabilite konman en madanm e petet menm konman  en manman. Labib i mansyonn serten fason ki en bon madanm i pran swen avek son msye ek zanfan. (Proverb 31:10-31) Konmela, en kantite msye ek madanm i mazin zis sa ki zot konzwen i kapab fer pour zot. Me Zeova i anvi nou reflesir lo sa ki nou nou kapab fer pour nou konzwen.

16, 17. Si ou pe mazin marye, ki ou devret reflesir lo la?

¹⁶ Avan ou deside pour marye, reflesir lo sa ki Zeova i dir konsernan bann msye ek madanm. I pa akoz en msye i sef fanmir ki vedir ki i kapab dominer e abiz son fanmir fizikman oubyen emosyonnelman. En bon sef fanmir i imit Zezi, ki toultan bon e kontan bann ki anba son responsabilite. (Efezyen 5:23) Lo lot kote, en madanm i bezwen reflesir lo si i pare pour siport desizyon son msye e korpere avek li. (Romen 7:2) I bezwen demann son lekor si i pou ere menm si i bezwen aksepte lotorite en dimoun enparfe. Si i pa krwar ki i pou kapab, petet i pli bon si i reste selibater pour lemoman.

¹⁷ Bann msye ek madanm i bezwen pli enterese avek byennet zot konzwen olye zot prop byennet. (Lir Filipyen 2:4.) Pol ti ekri: “Sakenn ant zot i devret kontan son madanm parey i kontan son lekor e en madanm li, i devret annan en gran respe pour son msye.” (Efezyen 5:21-33) Tou le de msye ek madanm i devret santi ki zot kontan e respekte kanmarad. Me pour en maryaz reisi, en msye i bezwen konnen ki son madanm i annan respe pour li e en madanm i sirtou bezwen konnen ki son msye i kontan li.

18. Akoz bann koup i bezwen fer atansyon ler zot pe pwente?

 ¹⁸ Ler de dimoun pe pwente, sa i devret en letan kot zot pas bann bon moman ansanm pour konn kanmarad pli byen. Zot bezwen onnet e realistik pour zot kapab deside si zot vreman anvi viv tou zot lavi ansanm. Ler en msye ek en madanm pe pwente, zot aprann kominik avek kanmarad e konn sa ki sa lot i vreman santi. Anmezir ki zot vin pli pros avek kanmarad, i toutafe normal ki zot pou anvi montre plis lafeksyon anver kanmarad. Me zot bezwen kontrol  lafason ki zot eksprim zot lanmour, pour ki zot pa fer bann keksoz imoral avan zot marye. Vre lanmour pou ed zot devlop kontrol lo zot prop lekor e sa pou anpes zot fer en keksoz ki pou gat zot relasyon avek kanmarad e avek Zeova.​—1 Tesalonisyen 4:6.

19, 20. Ki pwennvi bann Kretyen lo maryaz?

¹⁹ En kantite liv ek film i fini avek en gro maryaz. Me dan lavi reel, maryaz i zis en konmansman. Zeova ti anvi maryaz i dir pour touzour.​—Zenez 2:24.

²⁰ Ozordi, pour bokou dimoun, maryaz i en langazman tanporer. I fasil pour marye e i fasil osi pour divorse. Serten i krwar ki ler zot konmans ganny problenm, i’n ler pour kite e met en lafen avek sa maryaz. Me rapel sa legzanp dan Labib konsernan sa lakord ki’n tres an trwa. En lakord koumsa pa pou fasilman kase menm anba en kantite presyon. Ler nou rod led avek Zeova, nou lavi maryaz pou reisi. Zezi ti dir: “Sa ki Bondye in ini ansanm zonm pa devret separe.”​—Matye 19:6.

21. Kwa ki pou ed en msye ek en madanm pour kontan kanmarad?

²¹ Nou tou nou annan nou pwen for ek pwen feb. Me i fasil pour konsantre lo pwen feb lezot, sirtou pwen feb nou konzwen. Si nou fer sa, nou pa pou zanmen ere. De lot kote, si nou konsantre lo bann bon kalite ki nou konzwen i annan, nou kapab ere dan nou lavi maryaz. Eski sa i posib menm si nou konzwen pa parfe? Wi! Zeova i konnen ki nou enparfe, me i swazir pour li konsantre lo bann bon  kalite ki nou annan. Zis mazinen si i pa ti fer sa! En psalmis ti dir: “O Ya, O Zeova, si ou ti vey bann fot, lekel ki pa ti pou koupab?” (Psonm 130:3, NWT) Bann msye ek madanm i kapab imit Zeova par konsantre lo bann bon kalite ki zot konzwen i annan e zot devret pare pour pardonnen.​—Lir Kolosyen 3:13.

22, 23. Ki mannyer Abraam ek Sara in kit en bon legzanp pour bann koup marye?

 ²² Anmezir ki letan i pase, en maryaz i kapab vin pli for. Abraam ek Sara ti reisi dan zot lavi maryaz e zot ti ere. Ler Zeova ti demann Abraam pour kit zot lakour dan lavil Our, Sara ti bezwen apepre 60 an. Mazinen ki kantite i ti bezwen difisil pour li kit son lakour konfortab pour reste dan latant. Me Sara ti vreman siport Abraam, i ti en bon zanmi pour li e i ti vreman annan respe pour li. Alor i ti siport bann desizyon Abraam e i ti ed li pour ki zot reisi.​—Zenez 18:12; 1 Pyer 3:6.

²³ Byensir, en bon maryaz pa vedir ki en msye ek en madanm pou toultan tonm dakor lo tou keksoz. En fwa ler Abraam pa ti tonm dakor avek Sara, Zeova ti dir li: “Ekout tou sa ki Sara pou dir ou.” Abraam ti fer sanmenm e sa ti anmenn bann benediksyon. (Zenez 21:9-13) Si parfwa ou pa tonm dakor avek ou konzwen, pa dekouraze. Sa ki enportan se ki menm ler i annan bann dezakor, zot kontinyen demontre lanmour ek respe anver kanmarad.

24. Ki mannyer nou lavi maryaz i kapab anmenn loner pour Zeova?

²⁴ Dan kongregasyon Kretyen, i annan plizyer koup ki’n marye e ki ere. Si ou deside marye, mazinen ki swazir ou konzwen i enn parmi bann desizyon pli enportan ki ou pou fer dan ou lavi. I pou annan en lefe lo larestan ou lavi, alor rod gidans Zeova. Koumsa ou pou kapab swazir byen ou konzwen, prepar pour lavi maryaz e fer zefor pour batir en relasyon for kot i annan lanmour e sa pou anmenn loner pour Zeova.