1. Akoz Zezi ti enkyet sa zour swar avan son lanmor?

 SA ZOUR swar avan son lanmor, Zezi ti konnen ki i ti pros pour kit son bann disip e i ti enkyet pour zot lavenir. I ti dir zot: “Zot pa form parti sa lemonn.” (Zan 15:19) Pli tar, i ti priy pour zot. I ti dir son Papa: “Zot pa form parti lemonn, parey mwan mon pa form parti lemonn.” (Zan 17:15, 16) Ki Zezi ti pe sey dir?

2. Kisisa sa “lemonn” ki Zezi ti koz lo la?

² La, sa mo “lemonn” pe refer avek bann dimoun ki pa konn Bondye e ki les Satan diriz zot lavi. (Zan 14:30; Efezyen 2:2; Zak 4:4; 1 Zan 5:19) Ki mannyer nou kapab “pa form parti sa lemonn”? Dan sa sapit, nou pou koz lo sa bann diferan laspe: Reste fidel avek Rwayonm Bondye, pa pran kote dan politik e rezet leta lespri sa lemonn. Nou pou osi koz lo laparans ek fason sanze ki bezwen respektab, annan en pwennvi rezonnab lo larzan e met sa lekipman batay spirityel ki Bondye i donn nou.​—Vwar Lezot lenformasyon nimero 16.

3. Ki ti pwennvi Zezi lo politik?

³ Ler Zezi ti lo later, i ti remarke ki bann dimoun ti annan en kantite problenm e ki zot lavi ti difisil. Zezi ti vreman enterese avek zot e i ti anvi ed zot. Eski i ti vin en lider politik? Non. I ti konnen ki sa ki dimoun ti vreman bezwen ti Rwayonm oubyen gouvernman Bondye. Zezi ti pou vin Lerwa dan Rwayonm Bondye. Alor, i ti koz lo sa Rwayonm ler i ti pe prese. (Danyel 7:13, 14; Lik 4:43; 17:20, 21) Zezi pa ti mel dan politik ler i ti lo later e i pa ti zanmen pran kote dan politik osi. Ler Zezi ti devan Gouverner Romen Pons Pilat, i ti dir: “Mon Rwayonm pa form parti sa lemonn.” (Zan 18:36) Son bann disip osi pa ti pran kote dan politik. Sa liv On the Road to Civilization ti dir ki bann Kretyen dan premye syek “pa ti aksepte okenn pozisyon dan politik.” Ozordi, bann Kretyen osi i santi parey. Nou fidelman siport Rwayonm Bondye e nou pa pran okenn kote dan bann zafer politik sa lemonn.​—Matye 24:14.

4. Ki mannyer bann vre Kretyen i siport Rwayonm Bondye?

⁴ Vi ki bann anbasader i reprezant zot gouvernman dan en pei etranze, zot pa mel dan zafer politik sa pei kot zot ete. Bann Kretyen swazir, ki annan lespwar pour dirize ansanm avek Kris dan lesyel, i dan menm sityasyon. Pol ti ekri bann Kretyen swazir: “Nou bann anbasader dan plas Kris.” (2 Korentyen 5:20) Bann Kretyen swazir i reprezant gouvernman Bondye. Zot pa mel dan bann zafer politik e  gouvernmantal sa lemonn. (Filipyen 3:20) Me bann Kretyen swazir in ed plizyer milyon dimoun pour konn gouvernman Bondye. “Lezot mouton” ki annan lespwar pour viv pour touzour dan nouvo lemonn i siport bann Kretyen swazir. Zot osi zot pa pran kote dan bann zafer politik sa lemonn. (Zan 10:16; Matye 25:31-40) Alor, i kler ki bann vre Kretyen pa mel dan politik sa lemonn.​—Lir Izai 2:2-4.

5. Akoz bann vre Kretyen pa partisip dan lager?

⁵ Bann vre Kretyen i konsider tou lezot Kretyen dan lemonn konman zot fanmir. Zot ini menm si zot pa reste dan menm pei e annan menm kiltir. (1 Korentyen 1:10) Si nou deside pour partisip dan en lager, i ti pou konmsi nou pe lager avek nou prop  fanmir, setadir nou bann frer ek ser Kretyen, ki Zezi in demann nou pour kontan. (Zan 13:34, 35; 1 Zan 3:10-12) Deplis, Zezi ti demann son bann disip pour kontan menm zot lennmi.​—Matye 5:44; 26:52.

6. Ki mannyer bann serviter Zeova i konsider gouvernman?

⁶ Menm si nou pa pran kote dan politik, nou fer nou mye pour vin bann bon sitwayen. Par egzanp, nou respekte gouvernman par obei son lalwa e pey taks. Me nou toultan fer sir ki nou donn “sa ki pour Bondye avek Bondye.” (Mark 12:17; Romen 13:1-7; 1 Korentyen 6:19, 20) “Sa ki pour Bondye” i nou lanmour pour li, nou lobeisans ek ladorasyon. Nou ti pou menm pare pour perdi nou lavi olye dezobei Zeova.​—Lik 4:8; 10:27; lir Akt 5:29; Romen 14:8.

7, 8. Kisisa “leta lespri lemonn” e ki lefe i annan lo dimoun?

⁷ Reste separe avek sa lemonn i vedir ki nou pa les “leta lespri lemonn” kontrol nou. Sa leta lespri i sa fason panse ek konportman ki sorti kot Satan. Sa leta lespri i kontrol bann ki pa servi Zeova. Me bann Kretyen i rezet sa kalite latitid. Parey Pol ti dir, “nou pa’n ganny leta lespri lemonn, me nou’n ganny lespri sen sorti kot Bondye.”​—1 Korentyen 2:12; Efezyen 2:2, 3; vwar Lezot lenformasyon nimero 17.

⁸ Sa leta lespri lemonn i fer dimoun vin egois, vantar e rebel. I fer zot krwar ki zot pa bezwen obei Bondye. Satan i oule dimoun fer sa ki zot anvi san reflesir lo konsekans. I oule dimoun krwar ki “dezir lekor enparfe [ek] dezir lizye” i bann keksoz pli  enportan dan lavi. (1 Zan 2:16; 1 Timote 6:9, 10) Dyab i sirtou oule anbet bann serviter Zeova e fer nou krwar sa ki li i krwar.​—Zan 8:44; Akt 13:10; 1 Zan 3:8.

9. Ki mannyer leta lespri sa lemonn i kapab enfliyans nou?

⁹ Parey sa ler ki nou respire, leta lespri lemonn i partou kote. Si nou pa fer en kantite zefor pour rezet sa leta lespri, i pou afekte nou. (Lir Proverb 4:23.) Sa i kapab konmans devlope san ki nou realize. Par egzanp, nou kapab les nou ganny enfliyanse par fason panse ek latitid bann dimoun ki pa ador Zeova. (Proverb 13:20; 1 Korentyen 15:33) Nou kapab osi ganny afekte par lezot keksoz parey pornografi, bann aposta ki kritik Temwen Zeova oubyen bann sport kot i annan en kantite konpetisyon.​—Vwar Lezot lenformasyon nimero 18.

10. Ki mannyer nou kapab rezet leta lespri sa lemonn?

¹⁰ Ki mannyer nou kapab anpes leta lespri sa lemonn enfliyans nou? Nou bezwen reste pros avek Zeova e les son lasazes gid nou. Nou devret toultan priye pour ganny son lespri sen e reste byen okipe dan servis Bondye. Zeova i sa Enn ki pli for dan liniver antye. Nou asire ki Zeova pou kapab ed nou rezet leta lespri sa lemonn.​—1 Zan 4:4.

11. Ki mannyer leta lespri sa lemonn in enfliyans lafason ki dimoun i sanze?

¹¹ Nou osi montre ki nou pa form parti sa lemonn par nou fason sanze ek laparans. En kantite dimoun dan lemonn i sanz dan en fason ki atir latansyon lo  zot oubyen ki fer lezot annan bann panse imoral. Laparans bokou dimoun i montre ki zot pe rebel kont lotorite oubyen zot demonstre pour montre ki kantite larzan zot annan. Lezot dimoun pa fatig zot avek zot laparans. Zot sanz dan en fason devergonde oubyen sal. Nou pa devret les sa bann dimoun koumsa enfliyans nou fason sanze ek laparans dan okenn fason.

12, 13. Ki prensip ki pou ed nou deside kalite lenz ki nou pou mete?

¹² Konman bann serviter Zeova, nou toultan anvi  ki nou lenz i prop, byen drese, zoli e ki i apropriye pour sa lokazyon. Nou sanz dan en fason ki “respektab e avek bon zizman,” pour montre ki nou “ador Bondye.”​—1 Timote 2:9, 10; Zid 21.

¹³ Lafason ki nou sanze i kapab annan en lefe lo lafason ki lezot i vwar Zeova ek son pep. Nou anvi “fer tou pour laglwar Bondye.” (1 Korentyen 10:31) Ler nou sanz dan en fason ki respektab, nou montre ki nou annan respe pour santiman ek lopinyon lezot. Alor ler nou pe deside ki mannyer nou pou sanze, nou devret rapel ki nou fason sanze ek laparans i annan en lefe lo lezot dimoun.​—1 Korentyen 4:9; 2 Korentyen 6:3, 4; 7:1.

14. Ki nou devret mazinen ler nou pe swazir en lenz pour nou bann aktivite spirityel?

¹⁴ Ki mannyer nou sanze ler nou pe al renyon oubyen predikasyon? Eski nou atir tro bokou latansyon lo nou lekor? Eski nou fason sanze i anbaras lezot? Eski nou krwar ki personn napa drwa dir nou ki mannyer nou devret sanze? (Filipyen 4:5; 1 Pyer 5:6) I normal ki nou anvi met bann lenz ki nou kontan, me sa ki pou vreman fer nou zoli i nou bann kalite Kretyen. Sa i bann kalite ki Zeova i vwar ler i get nou. Sa bann kalite i montre sa ki nou “ete anndan dan [nou] leker . . . , ki annan en gran valer devan Bondye.”​—1 Pyer 3:3, 4.

15. Akoz Zeova pa donn nou en kantite lareg lo nou laparans e lafason ki nou devret sanze?

¹⁵ Zeova pa’n donn nou en kantite lareg lo sa ki nou devret e pa devret mete. Me i’n donn nou bann  prensip Labib ki kapab ed nou fer bann bon swa. (Ebre 5:14) I oule ki nou fer bann desizyon, ki swa gran oubyen pti, akoz nou kontan li ek lezot dimoun. (Lir Mark 12:30, 31.) Partou dan lemonn, pep Zeova pa sanz parey parski nou annan diferan kiltir oubyen akoz sa ki nou kontan personnelman. Me pa i gou e zoli pour vwar sa bann diferan fason sanze.

16. Ki mannyer sa ki Zezi ti dir lo larzan i diferan avek lafason ki lemonn i konsider larzan? Ki kestyon nou devret demann nou lekor?

¹⁶ Satan i anvi dimoun i krwar ki larzan ek bann  keksoz materyel ki pou fer zot ere. Me bann serviter Zeova i konnen ki sa pa vre! Nou annan konfyans dan sa ki Zezi ti dir: “Menm ler en dimoun i annan en kantite keksoz, pa sa bann keksoz ki donn li lavi.” (Lik 12:15) Larzan pa kapab fer nou vreman ere. I pa kapab donn nou bann vre zanmi, vre lape lespri oubyen lavi eternel. I vre, nou bezwen serten keksoz materyel e nou anvi ki nou lavi i gou. Me Zezi ti dir ki nou pou ere si nou annan en bon relasyon avek Bondye e si ador Bondye i sa keksoz pli enportan dan nou lavi. (Matye 5:3; 6:22, not) Demann ou lekor: ‘Eski lafason ki lemonn i konsider larzan i afekte mwan? Eski mon pe toultan mazin oubyen koz lo larzan?’​—Lik 6:45; 21:34-36; 2 Zan 6.

17. Ki mannyer ou lavi pou amelyore si ou rezet pwennvi sa lemonn lo larzan?

¹⁷ Si nou konsantre lo servi Zeova e rezet pwennvi lemonn lo larzan, nou lavi pou fer sans. (Matye 11:29, 30) Nou pou ere e nou pou santi nou anpe. (Matye 6:31, 32; Romen 15:13) Nou pa pou tro trakase akoz bann keksoz materyel. (Lir 1 Timote 6:9, 10.) Nou pou santi nou zwaye akoz nou kontan pour donnen. (Akt 20:35) Nou fason viv pou osi permet nou pas plis letan avek bann ki nou kontan. Nou menm kapab dormi pli byen aswar.​—Eklezyast 5:12.

18. Ki Satan pe esey fer avek nou?

¹⁸ Satan pe esey kas nou relasyon avek Zeova, alor nou devret fer tou sa ki nou kapab pour protez sa relasyon. Nou bezwen lalit “avek bann demon.”  (Efezyen 6:12) Satan ek son bann demon pa anvi nou ere oubyen ki nou viv pour touzour. (1 Pyer 5:8) Sa bann lennmi pwisan pe lalit avek nou, me avek led Zeova nou kapab ranport laviktwar!

19. Ki mannyer Efezyen 6:14-18 i dekrir “lekipman batay”?

¹⁹ Dan letan lontan, bann solda ti met lo zot bann lekipman batay pour protez zot pandan lager. Dan menm fason, nou osi nou bezwen met lo nou sa “lekipman batay” ki Zeova in donn nou. (Efezyen 6:13) Sa pou protez nou. Nou lir lo sa lekipman batay dan Efezyen 6:14-18: “Reste ferm avek sang laverite byen sere dan zot leren, met ladrwatir konman en proteksyon pour zot pwatrin e met soulye dan zot lipye pour ki zot pare pour anons sa bon nouvel lape. Apard tousala, pran sa gran boukliye lafwa pour ki zot kapab tenny tou bann dart alimen sorti kot sa enn move. Osi, met kask delivrans lo zot latet e pran lepe lespri sen, setadir parol Bondye. An menm tan, kontinyen priye dan tou lokazyon, fer tou kalite lapriyer ek siplikasyon an armoni avek lespri sen.”

20. Ki nou devret fer pour ki sa “lekipman batay” i ed nou?

²⁰ Si en solda i oubliy en bout son lekipman batay e en parti son lekor pa ganny proteze, se la kot son lennmi pou atak li. Si nou anvi nou “lekipman batay” i protez nou, nou pa devret oubliy ni menm en bout. Nou bezwen toultan kit li lo nou e gard li dan en bon leta. Nou lalit pou kontinyen ziska ki lemonn Satan i ganny detrir e Satan ek son bann demon i ganny tire lo later. (Revelasyon 12:17; 20:1-3)  Alor, si nou pe lalit avek bann move dezir oubyen defo, nou pa devret zanmen bes lebra!​—1 Korentyen 9:27.

21. Ki mannyer nou kapab ranport laviktwar lo Satan ek son bann demon?

²¹ Lo nou menm, nou pa pli for ki Dyab. Me avek led Zeova, nou kapab pli for ki li! Pour reste fidel, nou bezwen priy Zeova, etidye son Parol e asosye avek nou bann frer ek ser. (Ebre 10:24, 25) Sa bann keksoz pou ed nou reste fidel avek Bondye e nou pou pare pour defann nou lafwa.

22, 23. (a) Ki mannyer nou kapab toultan pare pour defann nou lafwa? (b) Ki nou pou diskite dan lot sapit?

²² Nou bezwen toultan pare pour defann nou lafwa. (Zan 15:19) Dan serten sirkonstans, Temwen Zeova i fer desizyon ki konpletman diferan avek laplipar dimoun. Demann ou lekor: ‘Eski mon konpran akoz nou fer oubyen pa fer serten keksoz? Eski mon konvenki ki sa ki Labib ek lesklav fidel e pridan i dir i vre? Eski mon fyer ki mon en Temwen Zeova? (Psonm 34:2; Matye 10:32, 33) Eski mon kapab eksplik mon krwayans avek lezot?’​—Matye 24:45; Zan 17:17; lir 1 Pyer 3:15.

²³ Dan bokou sityasyon, i vreman kler sa ki nou devret fer pour reste separe avek sa lemonn. Me parfwa i pa sitan evidan. Satan i esey anbet nou dan diferan fason. En fason ki i fer sa i atraver bann divertisman. Ki mannyer nou kapab swazir byen nou bann divertisman? Nou pou vwar sa dan lot sapit.