SAPIT 6
Ki mannyer pour swazir nou divertisman?
“Fer tou pour laglwar Bondye.”—1 KORENTYEN 10:31.
1, 2. Akoz nou devret swazir byen nou divertisman?
FER konmsi ou pe al manz en fri me zis ler ou pe al morde, ou remarke ki i annan en bout ki’n pouri. Ki ou pou fer? Eski ou pou manze menm? Eski ou pou zet sa fri? Oubyen eski ou pou koup sa bout pouri e manz sa bout ki bon?
2 Dan en sans, divertisman i parey sa fri. Serten divertisman i kapab gou, me i annan en kantite ki dan en sans i pouri akoz i annan bann senn sèks e vyolan oubyen i annan bann keksoz demonyak ladan. Alor, ler ou pe swazir ou divertisman, eski ou dir: “Sa i mon swa. Mon swazir nenport divertisman ki mon anvi”? Oubyen eski ou pou dir: “Tou sa bann divertisman pa bon menm”? Oubyen eski ou pou byen swazir ou divertisman, par rezet sa ki move e swazir sa ki bon?
3. Ki nou devret reflesir lo la ler nou pe swazir nou divertisman?
3 Nou tou nou bezwen diverti oubyen detann, me nou bezwen byen swazir ki mannyer nou fer li. Alor, i byen pour demann nou lekor, ki mannyer nou divertisman i afekte nou ladorasyon pour Zeova.
“FER TOU POUR LAGLWAR BONDYE”
4. Ki prensip Labib ki kapab ed nou pour byen swazir nou divertisman?
4 Ler nou dedye nou lavi avek Zeova, nou promet li ki nou pou servi nou lavi pour fer son lavolonte. (Lir Eklezyast 5:4.) Nou promet ki nou pou “fer tou pour laglwar Bondye.” (1 Korentyen 10:31) Sa i vedir ki nou pou viv nou lavi pour Bondye menm ler nou pe diverti oubyen detann, pa zis ler nou dan renyon oubyen predikasyon.
5. Ki kalite ladorasyon Zeova i aksepte?
5 Tou sa ki nou fer dan nou lavi i relye avek nou ladorasyon pour Zeova. Pol ti eksplik sa ler i ti dir “Ofer zot lekor konman en sakrifis vivan, sen e akseptab pour Bondye.” (Romen 12:1) Zezi ti dir: “Ou devret kontan Zeova ou Bondye avek tou ou leker, avek tou ou nanm, avek tou ou lespri e avek tou ou lafors.” (Mark 12:30) Nou toultan anvi donn Zeova nou meyer. Lontan Izrael, ler dimoun ti sakrifye en zannimo avek Zeova, zot ti bezwen donn en zannimo ki an bonn sante. Si sa sakrifis ti annan en defo, Bondye pa ti aksepte li. (Levitik 22:18-20) Dan menm fason, nou ladorasyon pour Zeova i kapab pa akseptab. Akoz?
6, 7. Ki mannyer nou divertisman i afekte nou relasyon avek Zeova?
6 Zeova i dir nou: “Zot devret sen, parski mwan mon sen.” (1 Pyer 1:14-16; 2 Pyer 3:11) Zeova pou aksepte nou ladorasyon si selman i sen oubyen pir. (Deterononm 15:21) Nou ladorasyon pa kapab pir si nou pe fer bann keksoz ki Zeova i deteste, par egzanp, bann keksoz ki imoral, vyolan oubyen demonyak. (Romen 6:12-14; 8:13) Me si nou kontan get bann keksoz koumsa osi, sa pa fer Zeova plezir. Sa i kapab fer nou ladorasyon enpir e pa akseptab pour Zeova e i kapab gat nou relasyon avek li.
7 Alor, ki mannyer nou kapab byen swazir nou divertisman? Ki prensip ki pou ed nou konn bann divertisman ki akseptab e sa ki pa akseptab?
DETESTE SA KI MAL
8, 9. Ki kalite divertisman ki nou devret rezete? Akoz?
8 I annan en kantite diferan kalite divertisman konmela. Serten i akseptab pour en Kretyen me en kantite pa akseptab. Premyerman, annou vwar ki kalite divertisman ki nou devret rezete.
9 En kantite film, sit Enternet, progranm televizyon, zwe video ek sanson i imoral, vyolan oubyen demonyak. Souvan, bann move keksoz i ganny prezante dan en fason ki fer riye oubyen ki paret napa nanryen mal avek. Me bann Kretyen i bezwen rezet bann divertisman ki pa reflekte bann standar Zeova ki pir. (Akt 15:28, 29; 1 Korentyen 6:9, 10) Ler nou rezet sa bann kalite divertisman, nou montre Zeova ki nou deteste sa ki mal.—Psonm 34:14; Romen 12:9.
10. Ki i kapab arive si nou mal swazir nou divertisman?
10 Me serten dimoun i krwar ki napa nanryen mal avek bann divertisman ki vyolan, imoral oubyen demonyak. Zot mazinen: ‘I pa sitan grav. Mon pa pou zanmen fer sa bann keksoz.’ Si nou mazin koumsa, nou pe anbet nou prop lekor. Labib i dir: “Leker i pli tret ki okenn keksoz e i tre move.” (Zeremi 17:9, NWT) Si nou vwar li gou pour get bann keksoz ki pa akseptab pour Zeova, eski nou kapab dir ki nou deteste sa bann keksoz? Si nou vwar li gou pour get sa bann keksoz, i pou pli fasil pour nou konmans vwar zot konman en keksoz normal. Avek letan, nou konsyans pou nepli sansib e i pa pou averti nou ler nou pe al fer en move swa.—Psonm 119:70; 1 Timote 4:1, 2.
11. Ki mannyer Galat 6:7 i ed nou pour swazir nou divertisman?
11 Parol Bondye i dir nou: “Sa ki en dimoun pe senmen, sanmenm ki i pou rekolte osi.” (Galat 6:7) I vre ki si nou kontinyen get bann move keksoz dan nou bann divertisman, i tre probab ki avek letan, nou pou fer sa bann keksoz. Par egzanp, serten dimoun in sitan ganny enfliyanse avek bann divertisman imoral, ki avek letan zot in komet imoralite seksyel. Me Zeova i ed nou pour ki nou byen swazir nou bann divertisman.
SERVI BANN PRENSIP LABIB POUR FER DESIZYON
12. Kwa ki pou ed nou fer bann bon desizyon konsernan nou divertisman?
12 I kler ki serten divertisman pa akseptab pour Zeova e nou konnen ki nou devret rezet zot. Me ki nou pou fer si nou pa tro asire ki nou devret fer? Zeova pa donn nou en kantite lareg lo sa ki nou kapab oubyen pa kapab gete, ekoute oubyen lir. I plito anvi nou servi nou konsyans ki’n ganny antrennen par Labib. (Lir Galat 6:5.) Zeova i donn nou bann prensip, setadir bann laverite de baz ki montre nou son pwennvi lo serten keksoz. Sa bann prensip i ed nou pour antrenn nou konsyans. Zot ed nou konpran “kisisa lavolonte Zeova” pour ki nou kapab fer bann desizyon ki fer li plezir.—Efezyen 5:17.
Bann prensip Labib i ed nou pour byen swazir nou divertisman
13. Akoz bann Kretyen i annan diferan pwennvi lo divertisman? Kwa ki enportan pour tou Kretyen?
13 Divertisman ki en Kretyen i kontan i souvan diferan avek sa ki en lot i kontan. Akoz? Parski nou tou nou kontan diferan keksoz. Alor, sa ki en dimoun i vwar akseptab, i kapab pa akseptab pour en lot dimoun. Kantmenm sa, pour kapab fer bann bon desizyon, tou Kretyen i bezwen ganny gide par bann prensip Labib. (Filipyen 1:9) Sa bann prensip pou ed nou swazir bann divertisman ki akseptab pour Bondye.—Psonm 119:11, 129; 1 Pyer 2:16.
14. (a) Ki nou devret pran an konsiderasyon konsernan lafason ki nou servi nou letan? (b) Ki konsey Pol ti donn bann Kretyen?
14 En lot keksoz ki nou devret pran an konsiderasyon i ki kantite letan ki nou pase dan bann divertisman. Sa pou montre ki kantite enportan bann divertisman i ete pour nou. Konman bann Kretyen, nou servis pour Zeova i devret sa keksoz pli enportan dan nou lavi. (Lir Matye 6:33.) Me san realize, ptitapti, nou kapab pe pas plis letan dan bann divertisman. Pol ti konsey bann Kretyen: “Kontinyen vey byen ki mannyer zot viv, pa viv parey dimoun bet me parey dimoun saz. Servi byen zot letan.” (Efezyen 5:15, 16) Alor, nou bezwen kontrol kantite letan nou pase dan bann divertisman e fer sir ki nou servis pour Zeova i touzour premye dan nou lavi.—Filipyen 1:10.
15. Ki mannyer nou kapab rezet bann divertisman ki kapab gat nou relasyon avek Zeova?
15 I kler ki nou devret rezet bann divertisman ki nou konnen Zeova pa kontan. Me ki nou pou fer konsernan bann divertisman ki nou pa tro asire si i bon oubyen non? Eski nou bezwen veye menm? Meton ou pe marse lo en pti santye dan montanny kot i annan en gran ranpar, eski ou pou mars zis o bor sa ranpar? Non. Si ou kontan ou lavi, ou pou reste byen lwen avek danze. I parey ler nou pe swazir nou divertisman. Parol Bondye i dir nou: “Elwanny ou lipye devan sa ki mal.” (Proverb 4:25-27) Alor nou pa zis rezet bann divertisman ki nou konnen i mal, me nou osi reste lwen avek okenn divertisman ki nou krwar i kapab pa bon pour nou e ki kapab gat nou relasyon avek Zeova.
ROD PWENNVI ZEOVA
16. (a) Ki serten keksoz Zeova i deteste? (b) Ki mannyer nou montre ki nou deteste sa ki Zeova i deteste?
16 Psonm 97:10 i dir: “Ou ki kontan [Zeova]! Deteste lemal.” Labib i ed nou konpran pwennvi ek santiman Zeova. Demann ou lekor ki mannyer sa ki ou aprann i kapab ed ou annan menm pwennvi avek Zeova. Par egzanp, nou’n aprann ki Zeova i deteste “en labous mansonz, lanmen ki fer koule disan inosan; en leker ki prepar bann move kou [e] lipye ki depese pour fer sa ki mal.” (Proverb 6:16-19) Nou’n aprann ki nou devret rezet “imoralite seksyel, . . . ador zidol, pratik demonyak, . . . zalouzi, bann lakoler, . . . groker, bwar pour sou, parti san kontrol ek lezot kondwit parey.” (Galat 5:19-21) Eski ou konpran ki mannyer sa bann prensip Labib i kapab ed ou pour swazir ou divertisman? Nou anvi swiv bann standar Zeova dan tou sa ki nou fer dan nou lavi, ki swa ler nou tousel oubyen avek lezot dimoun. (2 Korentyen 3:18) Anfet, bann desizyon ki nou fer ler nou tousel i souvan montre ki kalite dimoun nou vreman ete.—Psonm 11:4; 16:8.
17. Avan nou swazir en divertisman, ki kestyon nou devret demann nou lekor?
17 Alor, ler ou swazir ou divertisman, demann ou lekor: ‘Ki mannyer mon desizyon i afekte mon relasyon avek Zeova? Ki lefe i pou annan lo mon konsyans?’ Annou vwar lezot prensip ki kapab ed nou ler nou pe swazir bann divertisman.
18, 19. (a) Ki konsey Pol ti donn bann Kretyen? (b) Ki prensip ki pou ed nou byen swazir nou bann divertisman?
18 Ler nou swazir en divertisman, nou swazir sa ki pou antre dan nou lespri. Pol ti ekri: “Tou sa ki vre, tou sa ki serye, tou sa ki drwat, tou sa ki pir, tou sa ki ankouraz pour annan lanmour, tou sa ki onorab, tou sa ki byen e tou sa ki merit felisitasyon, kontinyen mazin sa bann keksoz.” (Filipyen 4:8) Ler nou ranpli nou lespri avek bann bon keksoz koumsa, nou kapab dir: “O Zeova mon Ros e mon Sover, ki parol sorti dan mon labous e meditasyon sorti dan mon leker i fer ou plezir.”—Psonm 19:14, NWT.
19 Demann ou lekor: ‘Ki mon pe ranpli mon lespri avek? Apre ki mon’n get en film oubyen en progranm televizyon, eski sa ki mon mazinen i agreab e ankourazan? Eski mon santi mwan anpe? Eski mon konsyans i fatig mwan? (Efezyen 5:5; 1 Timote 1:5, 19) Eski mon santi mwan alez pour priy avek Zeova oubyen eski mon santi mwan anbarase? Eski sa divertisman in fer mwan mazin bann keksoz vyolan oubyen imoral? (Matye 12:33; Mark 7:20-23) Eski mon pe “les sa lemonn enfliyans” mwan atraver sa bann divertisman ki mon swazir?’ (Romen 12:2) Nou larepons onnet pou ed nou konnen sa ki nou bezwen fer pour nou gard en bon relasyon avek Zeova. Parey dan sa psonm, nou priye: “Anpes mon lizye kontinyen get sa ki napa valer.” *—Psonm 119:37, NWT.
NOU DESIZYON I AFEKTE LEZOT
20, 21. Akoz nou bezwen pran an konsiderasyon santiman lezot ler nou pe swazir nou divertisman?
20 En lot prensip ki nou devret gard antet i sa enn: “Nou ganny drwa fer tou keksoz, me pa tou keksoz ki batir. Fodre pa ki sakenn i rod son prop lentere, me lentere lezot.” (1 Korentyen 10:23, 24) Zis akoz nou annan drwa fer en keksoz pa vedir ki nou devret neseserman fer li. Nou devret reflesir seryezman lo ki mannyer nou bann desizyon i kapab afekte nou bann frer ek ser dan kongregasyon.
21 Nou tou nou konsyans i diferan. Par egzanp, meton ou konsyans i permet ou pour get en serten progranm televizyon. Me apre, ou tande ki ler serten frer ek ser in get sa menm progranm, sa in fatig zot konsyans. Ki ou pou fer? Menm si ou annan drwa get sa progranm, petet ou kapab deside pour pa gete. Akoz? Parski ou pa anvi “fer pese kont ou bann frer” oubyen menm “fer pese kont Kris.” (1 Korentyen 8:12) Nou pa anvi fer okenn keksoz ki pou vin en lobstak pour nou bann frer ek ser.—Romen 14:1; 15:1; 1 Korentyen 10:32.
22. Ki mannyer nou pou montre ki nou rezonnab konsernan desizyon ki lezot Kretyen i fer?
22 De lot kote, ki ou pou fer si ou konsyans pa permet ou pour gete, lir oubyen fer en keksoz ki en lot dimoun i vwar akseptab? Vi ki ou kontan e respekte ou frer, ou pa pou met presyon lo li pour fer menm swa avek ou. En dimoun ki pe dray son loto i konnen ki lezot drayver i kapab dray pli vit oubyen pli dousman ki li e kantmenm sa, zot bann bon drayver. Dan menm fason, i kapab ki ou ek en lot frer pe swiv bann prensip Labib me ki zot annan diferan pwennvi lo bann divertisman ki akseptab.—Eklezyast 7:16; Filipyen 4:5.
23. Kwa ki pou ed nou pour byen swazir nou divertisman?
23 Alor, kwa ki pou ed nou pour byen swazir nou divertisman? Ler nou servi nou konsyans ki’n ganny antrennen par bann prensip Labib e pran an konsiderasyon santiman nou bann frer ek ser, nou pou fer bann bon swa. Nou pou santi nou ere akoz nou pe fer “tou pour laglwar Bondye.”
^ Nou kapab trouv lezot prensip dan Labib ki kapab ed nou pour swazir bann divertisman dan Proverb 3:31; 13:20; Efezyen 5:3, 4 ek Kolosyen 3:5, 8, 20.