1-3. (a) Ki nou aprann dan Proverb 13:20? (b) Akoz nou bezwen swazir byen nou zanmi?

 ESKI ou’n deza remarke ki mannyer en pti baba i get son paran? Menm avan i konmans koze, sa pti baba i esey konpran tou sa ki i tande e vwar. Anmezir i grandi, i konmans imit son paran, menm san realize. I pa drol alor ki menm bann adilt i kapab konmans mazin e azir parey bann dimoun ki zot pas bokou letan avek.

² Proverb 13:20 (NWT) i dir: “Sa ki mars avek dimoun saz pou vin saz.” “Mars” avek en dimoun i enplik swazir pour pas letan avek sa dimoun. Ou pa zis la avek sa dimoun, me parey en spesyalis Labib ti dir, ou kontan e santi ou pros avek sa dimoun. Nou pli ganny enfliyanse avek bann dimoun ki nou pas en kantite letan avek sirtou si nou santi nou pros avek zot.

³ Nou bann zanmi i kapab enfliyans nou swa pour fer sa ki byen ouswa sa ki mal. Proverb 13:20 (NWT) i osi dir: “Sa ki frekant en lenbesil pou mal  pase.” Sa mo Ebre ki’n ganny tradwir “frekant” i kapab vedir “asosye,” setadir vin zanmi avek sa dimoun. (Proverb 22:24; Ziz 14:20) Nou bann zanmi ki kontan Bondye pou ankouraz nou pour reste fidel avek li. Pour ed nou byen swazir nou zanmi, annou vwar ki kalite dimoun Zeova i swazir konman son zanmi.

4. Akoz i en gran privilez pour vin zanmi Bondye? Akoz Zeova ti apel Abraam “mon zanmi”?

⁴ Zeova, Souvren Liniver, i donn nou loportinite pour vin son zanmi. Sa i en gran privilez. Zeova i swazir byen son bann zanmi. I swazir bann ki kontan li e annan lafwa dan li. Mazin Abraam. I ti pare pour fer tou sa ki Bondye ti demann li. Plizyer fwa, Abraam ti montre ki i ti obeisan e annan lafwa dan Zeova. I ti menm pare pour sakrifye son garson Izaak. Abraam ti annan lafwa ki “Bondye ti kapab resisit son garson.” (Ebre 11:17-19; Zenez 22:1, 2, 9-13) Abraam ti fidel e obeisan e Zeova ti apel li “mon zanmi.”​—Izai 41:8; Zak 2:21-23.

5. Ki mannyer Zeova i santi anver bann ki fidel avek li?

⁵ Pour Zeova, son bann zanmi i presye. Pour son bann zanmi, reste fidel avek Zeova i sa keksoz ki pli enportan pour zot. (Lir 2 Samyel 22:26.) Zot fidel e obeisan akoz zot kontan li. Labib i dir ki Bondye i “bon zanmi avek dimoun ki drwat,” andotmo avek bann ki obei li. (Proverb 3:32, NWT) Zeova i envit son bann zanmi pour vin son bann envite spesyal  dan son latant. I envit zot pour ador li e pour priy avek li nenport ki ler.​—Psonm 15:1-5, NWT.

6. Ki mannyer nou kapab montre ki nou kontan Zezi?

⁶ Zezi ti dir: “Si en dimoun i kontan mwan, i pou obei mon parol e mon papa pou kontan li.” (Zan 14:23) Alor, pour vin zanmi Zeova, nou bezwen kontan Zezi e fer sa ki i demann nou pour fer. Par egzanp, nou obei lord Zezi pour pres sa bon nouvel e fer disip. (Matye 28:19, 20; Zan 14:15, 21) Vi ki nou kontan Zezi, nou “swiv son lepa fidelman.” (1 Pyer 2:21) Zeova i kontan ler i vwar nou pe fer nou mye pour swiv legzanp son Garson dan tou sa ki nou dir oubyen fer.

7. Akoz nou devret fer sir ki nou zanmi i osi zanmi Zeova?

⁷ Bann zanmi Zeova i fidel, obeisan e kontan son Garson. Eski nou swazir menm kalite zanmi parey Zeova? Si ou bann zanmi i swiv legzanp Zezi e kontan ansenny lezot konsernan Rwayonm Bondye, zot kapab ed ou pour vin en pli bon dimoun e reste fidel avek Zeova.

8. Ki ou kontan avek lanmitye Rit ek Naomi?

⁸ Dan Labib, i annan en kantite legzanp lo lanmitye. Par egzanp, nou kapab lir lo Rit ek son belmer, Naomi. Sa de madanm ti sorti dan diferan pei ek lanvironnman. Naomi ti bokou pli vye ki Rit me zot ti vin bann bon zanmi akoz zot tou le de ti kontan Zeova. Ler Naomi ti pe al kit Moab pour  retourn Izrael, “Rit ti reste avek son belmer.” I ti dir Naomi: “Ou pep pou vin mon pep e ou Bondye, pou vin mon Bondye.” (Rit 1:14, 16) Rit ti vreman bon anver Naomi. Ler zot ti ariv Izrael, Rit ti travay dir pour pran swen avek son zanmi. Naomi ti kontan Rit en kantite e i ti donn li bann bon konsey. Rit ti ekout son konsey e akoz sa, zot tou le de ti ganny en kantite benediksyon.​—Rit 3:6.

9. Ki ou kontan avek lanmitye David ek Zonatan?

⁹ David ek Zonatan osi ti de bon zanmi ki ti fidel avek Zeova. Zonatan ti apepre 30 an pli vye ki David e Zonatan ti pou vin lerwa Izrael apre lanmor son papa. (1 Samyel 17:33; 31:2; 2 Samyel 5:4) Me pli tar ler i ti konnen ki Zeova ti’n swazir David pour vin lerwa, Zonatan pa ti ni zalou ni esey pran plas David. O kontrer, Zonatan ti fer tou sa ki i ti kapab pour ed David. Par egzanp, ler lavi David ti an danze, Zonatan ti “ankouraz li pour met son konfyans” dan Zeova. I ti menm riske son prop lavi pour ed David. (1 Samyel 23:16, 17) David osi ti en zanmi fidel. I ti promet pour pran swen avek fanmir Zonatan e i ti gard sa promes menm apre lanmor Zonatan.​—1 Samyel 18:1; 20:15-17, 30-34; 2 Samyel 9:1-7.

10. Ki nou aprann lo lanmitye atraver legzanp sa trwa Ebre?

¹⁰ Sadrak, Mesak ek Abednego ti trwa zenn Ebre ki ti zanmi. Zot ti ganny pran kot zot lakour ler zot ti ankor zenn. Vi ki zot ti lwen avek zot fanmir, zot ti ed kanmarad pour reste fidel avek Zeova. Pli tar  ler zot ti’n vin adilt, zot lafwa ti ganny teste ler Lerwa Neboukadnezar ti donn zot lord pour ador en stati an annor. Sadrak, Mesak ek Abednego ti refize ador sa zidol e zot ti dir lerwa: “Nou pa pou servi ou bann bondye e nou pa pou ador sa stati annor ki ou’n fer.” Ler zot lafwa ti ganny teste, sa trwa zanmi ti reste fidel avek zot Bondye.​—Danyel 1:1-17; 3:12, 16-28.

11. Ki mannyer Pol ek Timote ti vin de bon zanmi?

¹¹ Ler zapot Pol ti zwenn Timote, ki ti ankor zenn, i ti remarke ki Timote ti kontan Zeova e i ti pare pour ede dan kongregasyon. Alor, Pol ti form Timote pour ed bann frer ek ser dan en kantite landrwa. (Akt 16:1-8; 17:10-14) Timote ti travay sitan dir ki Pol ti dir: “I’n servi parey en lesklav avek mwan pour propaz sa bon nouvel.” Pol ti konnen ki Timote ti pou ‘vreman enterese avek byennet’ bann frer ek ser. Anmezir ki zot ti travay dir ansanm dan servis Zeova, Pol ek Timote ti vin de bon zanmi.​—Filipyen 2:20-22; 1 Korentyen 4:17.

12, 13. (a) Akoz nou bezwen vey byen ler nou pe swazir nou bann zanmi menm dan kongregasyon? (b) Akoz zapot Pol ti donn sa lavertisman dan 1 Korentyen 15:33?

¹² Nou kapab aprann avek nou bann frer ek ser dan kongregasyon e ed kanmarad reste fidel. (Lir Romen 1:11, 12.) Menm dan kongregasyon, nou bezwen veye lekel ki vin nou zanmi pros. I gou akoz nou annan en kantite frer ek ser sorti dan  diferan lanvironnman ek kiltir. Serten i nouvo dan kongregasyon e lezot pe servi Zeova depi plizyer lannen. I pran letan pour devlop en bon relasyon avek Zeova, zis parey i pran letan pour en fri mir. Alor, nou bezwen annan pasyans e kontan kanmarad e toultan swazir byen nou zanmi.​—Romen 14:1; 15:1; Ebre 5:12–6:3.

¹³ Parfwa, en sityasyon serye i kapab leve dan kongregasyon e la nou bezwen vreman fer atansyon. I kapab ki en frer oubyen en ser pe fer bann  keksoz ki Labib i dir i mal. I kapab osi ki i annan dimoun ki kontan konplent, sa i kapab afekte kongregasyon. Sa pa devret sirprann nou, parski parfwa menm dan premye syek, i ti annan problenm dan kongregasyon. Anfet, zapot Pol ti averti bann Kretyen sa letan: “Pa les zot ganny anbete. Move frekantasyon i gat bann bon labitid.” (1 Korentyen 15:12, 33) Pol ti osi konsey Timote pour vey byen lekel i swazir konman son zanmi pros. Nou devret fer parey ozordi.​—Lir 2 Timote 2:20-22.

14. Ki mannyer nou bann zanmi i kapab annan en lefe lo nou relasyon avek Zeova?

¹⁴ Nou bezwen protez nou lanmitye avek Zeova. I sa keksoz pli presye ki nou annan. Alor, nou bezwen evite vin pros avek nenport dimoun ki kapab afebli nou lafwa e kas sa relasyon ki nou annan avek Zeova. Zis parey si nou tranp en leponz dan delo sal, nou pa kapab ekspekte ki i pou enbib delo prop, nou pa kapab annan zanmi ki fer sa ki mal e ekspekte ki i pou fasil pour nou fer bann bon keksoz. Nou bezwen vey byen lekel ki nou swazir pour vin nou zanmi pros.​—1 Korentyen 5:6; 2 Tesalonisyen 3:6, 7, 14.

15. Ki ou kapab fer pour ganny bann bon zanmi dan kongregasyon?

¹⁵ Ou kapab trouv bann dimoun ki vreman kontan Zeova dan kongregasyon. Zot kapab vin ou bann zanmi pros. (Psonm 133:1) Pa rod zanmi ki zis dan ou laz oubyen ki menm ras, nasyonalite oubyen kiltir avek ou. Pa bliye, Zonatan ti bokou pli  vye ki David e Rit ti bokou pli zenn ki Naomi. Nou anvi ekout sa konsey Labib: “Ouver gran zot leker.” (2 Korentyen 6:13; lir 1 Pyer 2:17.) Pli ou imit Zeova, pli lezot dimoun pou anvi vin ou zanmi.

16, 17. Si en dimoun dan kongregasyon i dezapwent nou, ki nou pa devret fer?

¹⁶ Dan sak fanmir, sakenn i annan son personnalite, lopinyon ek fason fer keksoz. Sa i osi leka dan kongregasyon. Sa i gou e nou kapab aprann en kantite keksoz avek kanmarad. Me parfwa, vi ki nou diferan, nou kapab mal konpran nou bann frer ek ser e konmans fatige avek zot. Par ler, zot kapab ofans nou oubyen bles nou santiman. (Proverb 12:18) Eski nou merit les sa bann problenm dekouraz nou oubyen anpes nou vin Lasal?

¹⁷ Non. Menm si en dimoun i dezapwent nou, nou devret kontinyen asosye avek kongregasyon. Pa Zeova ki’n ofans nou. I’n donn nou lavi ek tou lezot keksoz. I toultan merite ki nou kontan li e reste fidel avek li. (Revelasyon 4:11) Kongregasyon i en kado ki Zeova in donn nou pour batir nou lafwa. (Ebre 13:17) Nou pa pou zanmen rezet son kado zis akoz en dimoun in dezapwent nou.​—Lir Psonm 119:165.

18. (a) Kwa ki pou ed nou pour annan en bon relasyon avek nou bann frer ek ser? (b) Akoz nou devret pardonn lezot?

¹⁸ Nou kontan nou bann frer ek ser e nou pa anvi ganny problenm avek zot. Zeova pa ekspekte  ki nou parfe, alor nou osi nou pa ekspekte ki lezot i parfe. (Proverb 17:9; 1 Pyer 4:8) Nou tou nou fer fot, me lanmour pou ed nou pour kontinyen “pardonn kanmarad volonterman.” (Kolosyen 3:13) Lanmour pou anpes nou fer en pti zafer vin en gro problenm. I vre, ler en dimoun i fer nou ankoler, i kapab difisil pour nou aret mazin sa ki’n arive. I fasil pour ankoler e menm gard rankin avek sa dimoun. Me sa pou zis fer nou fristre e malere. Par kont, ler nou pardonn en dimoun ki’n ofans nou, nou kapab annan lape lespri, nou pou ini dan kongregasyon e pli enportan ankor, nou pou annan en bon relasyon avek Zeova.​—Matye 6:14, 15; Lik 17:3, 4; Romen 14:19.

19. Kan ki nou bezwen aret frekant en dimoun dan kongregasyon?

¹⁹ Dan en fanmir kot zot tou zot kontan kanmarad, sak manm fanmir i fer son par pour ki lezot i ere. Me fer konmsi en dimoun i konmans fer en kantite problenm dan sa fanmir. Tou dimoun i esey ed li plizyer fwa, me i refize ekoute. Petet i kit lakour oubyen sef fanmir i demann li pour ale. Sa i kapab arive dan kongregasyon osi. En dimoun i kapab deside pour kontinyen fer bann keksoz ki Zeova pa kontan e fer kongregasyon ditor. I refize aksepte konsey e atraver son bann aksyon i montre ki i nepli anvi form parti kongregasyon. I kapab deside kit kongregasyon li menm  oubyen i kapab ganny ekskli dan kongregasyon. Si sa i arive, Labib i dir klerman ki nou devret “aret frekant” li. (Lir 1 Korentyen 5:11-13; 2 Zan 9-11) Sa i kapab vreman difisil si i nou zanmi oubyen nou fanmir. Me dan en sityasyon koumsa, nou merit reste fidel avek Zeova.​—Vwar Lezot lenformasyon nimero 8.

20, 21. (a) Ki mannyer sa laranzman pour ekskli en dimoun ki pa repantir dan kongregasyon i montre lanmour ki Bondye i annan pour nou? (b) Akoz i enportan pour byen swazir nou zanmi?

²⁰ Sa laranzman pour ekskli en dimoun ki pa repantir dan kongregasyon i en laranzman ki montre lanmour ki Bondye i annan pour nou. I protez kongregasyon kont bann ki pa oule swiv bann lalwa Zeova. (1 Korentyen 5:7; Ebre 12:15, 16) I ed nou pour montre ki nou kontan non sen Zeova, son bann standar o nivo e Zeova li menm. (1 Pyer 1:15, 16) Sa laranzman i osi montre lanmour pour sa dimoun ki nepli en manm kongregasyon. Sa kalite disiplin i kapab ed li pour realize ki sa ki i pe fer i mal e i bezwen sanze. Bokou ki ti’n deza ganny ekskli dan kongregasyon in retourn kot Zeova e zot in ganny byen resevwar dan kongregasyon.​—Ebre 12:11.

²¹ Nou bann zanmi i kapab enfliyans nou pour fer swa sa ki byen ouswa sa ki mal. Alor i vreman enportan ki nou byen swazir nou zanmi. Si nou kontan bann ki Zeova i kontan, nou pou ganny antoure par bann dimoun ki kapab ed nou reste fidel avek li pour touzour.