NOU zanmi i bann dimoun ki nou kontan koz avek e pas letan avek. Me i enportan pour nou annan bann bon zanmi. Lekel sa pli bon zanmi ki nou devret annan?— Zeova.

Eski nou vreman kapab vin zanmi Bondye?— Labib i dir ki Abraam, ki ti viv byen lontan, ti “zanmi Bondye.” (Zak 2:23) Ou konnen akoz i ti zanmi Bondye?— Labib i dir akoz Abraam ti obeir Bondye. I ti obeir Bondye menm letan i ti demann li pour fer bann keksoz ki ti difisil. Alors pour vin zanmi Bondye, nou bezwen fer keksoz ki fer li plezir, parey  Abraam ek sa Gran Ansennyan ti fer.—Zenez 22:1-14; Zan 8:28, 29; Ebre 11:8, 17-19.

Zezi ti dir son bann zapot: ‘Zot mon bann zanmi, si zot obei mon konmannman.’ (Zan 15:14) Tou sa ki Zezi ti dir ti sorti kot Zeova. Alor i ti pe dir son bann zanmi i fer sa ki Bondye i demande. Wi, Zezi ti fer zanmi avek bann ki ti kontan Bondye.

Bann zapot Zezi, ki ou kapab vwar lo paz 75, ti parmi son bann pli bon zanmi. Zot ti al partou avek li e ed li pour prese. Zezi ti pas bokou son letan avek zot. Zot ti manz ansanm. Zot ti koz lo Bondye ansanm. E zot ti fer lezot keksoz ansanm. Me Zezi ti annan bokou lezot zanmi. I ti abitye reste kot zot e pas bann bon moman ansanm avek zot.

Ti annan en fanmiy ki Zezi ti kontan reste kot zot. Zot ti  reste dan en pti lavil Betani zis obor lavil Zerizalenm. Ou rapel lekel sa fanmiy?— Mari, Mart, ek zot frer Lazar. Zezi ti dir Lazar i son zanmi. (Zan 11:1, 5, 11) Zezi ti kontan sa fanmiy e kontan pas letan avek zot akoz zot ti kontan Zeova e servi Li.

Sa pa vedir Zezi pa ti zantiy avek bann dimoun ki pa ti servi Bondye. I ti zantiy avek zot. I ti menm al kot zot e manz avek zot. Ler serten dimoun ti vwar sa, zot ti dir Zezi i “zanmi avek bann kolekter taks ek bann dimoun move repitasyon.” (Matye 11:19) Me Zezi pa ti al kot sa bann dimoun akoz i ti kontan zot fason viv. I ti al kot zot pour koz avek zot lo Zeova. I ti sey ed zot sanz zot move lavi e servi Bondye.

Sanmenm ki ti arive en zour dan lavil Zeriko. Zezi ti pe pas dan sa lavil pour al Zerizalenm. Ti annan en lafoul dimoun la, e en zonm ki ti apel Zase ti la dan sa lafoul. I ti anvi vwar Zezi. Me Zase ti ptipti e i pa ti kapab vwar akoz lafoul ti bar li. Alors i ti taye e mont lo en pye dibwa pour li kapab vwar Zezi ler i pase.

Ler Zezi ti ariv kot sa pye dibwa, i ti get anler e dir: ‘Zase, depese, desann; akoz  ozordi mon pou reste kot ou.’ Me Zase ti en zonm ris ki ti’n fer bann move keksoz. Akoz Zezi ti anvi al kot li?—

Zezi pa ti al kot Zase akoz i ti kontan son fason viv. I ti al laba pour koz avek Zase lo Bondye. I ti vwar ki mannyer Zase ti’n sey fer bokou zefor pour kapab vwar li. Alors i ti konnen ki Zase ti kapab ekout li. Sa ti en bon moman pour koz avek li lo fason ki Bondye i dir nou devret viv.

Ki nou vwar pe arive la?— Zase ti kontan sa ki Zezi ti ansenny li. I ti regrete ki i ti’n trik bann dimoun, e i ti promet pour rann sa larzan ki i ti’n vole. Apre i ti vin en disip Zezi. Selman apre sa ki Zezi ek Zase ti vin zanmi.—Lik 19:1-10.

Si nou swiv legzanp sa Gran Ansennyan, eski nou pou rann vizit bann dimoun ki pa nou zanmi?— Wi. Me nou pa pou al kot zot akoz nou kontan zot fason viv. E nou pa pou fer bann keksoz mal ansanm avek zot. Nou pou rann zot vizit pour koz avek zot lo Bondye.

 Me nou bann bon zanmi i bann dimoun ki nou kontan pas letan avek. Pour zot vin bann bon zanmi pour nou, fodre zot sa kalite zanmi ki Bondye i kontan. I annan dimoun ki pa ni konnen lekel Zeova. Me si zot anvi konn li, nou kapab ed zot. E ler zot kontan Zeova parey nou kontan li, zot kapab vin nou bon zanmi.

I annan en lot fason ki nou kapab konnen si en dimoun i en bon zanmi. Get bann keksoz ki i fer. Eski i fer malis lezot dimoun, apre pour li riye? I pa byen fer sa, non?— Eski toultan i dan problenm? Nou pa ti a kontan bag dan problenm ansanm avek li, non?— Oubyen eski i fer bann keksoz ki i konnen i pa devret fer akoz i krwar i tro malen e pa pou ganny atrape? Kantmenm i pa ganny atrape, pa Bondye in vwar sa ki i’n fer?— Eski ou krwar bann dimoun ki fer sa bann keksoz i kapab vin bann bon zanmi pour nou?—

Pran ou Labib e nou a vwar ki mannyer bann dimoun ki nou frekante i kapab enfliyans nou. Nou pou lir dan 1 Korentyen sapit 15, verse 33. Ou’n vwar li?— I dir: “Pa les zot ganny anbete: ‘Move frekantasyon, i gat repitasyon.’” Savedir si nou pas letan avek bann move dimoun, nou kapab vin move. Me letan nou annan bann bon zanmi, i ed nou osi pour aprann bann bon mannyer.

Annou pa zanmen bliye ki Zeova i dimoun pli enportan dan nou lavi. Nou pa anvi gat nou lanmitye avek li, pa i vre?— Alors nou bezwen fer sir ki nou fer zanmi zis avek bann ki kontan Bondye.