OU VWAR li fasil pour servi Zeova ou?— Sa Gran Ansennyan pa ti dir i pou fasil. Lavey ki i ti mor, i ti dir son bann zapot: “Si lemonn i ay zot, mazinen ki i’n ay mwan avan zot.”—Zan 15:18.

Pyer ti ensiste ki i pa pou kit Zezi. Me Zezi ti dir ki tanto menm Pyer ti pou dir i pa konn li trwa fwa. Vre sa ti arive! (Matye 26:31-35, 69-75) Akoz Pyer ti fer sa?— Akoz i ti per. Lezot zapot osi ti per.

Ou konnen akoz bann zapot ti per?— Akoz zot pa ti fer en keksoz tre enportan. Zot pa ti priye. Sa i en keksoz enportan pour nou konnen si nou oule kontinyen servi Zeova, kantmenm lezot dimoun i kapab dir oubyen fer nenport kwa avek nou. Me pour konmanse, annou vwar ki ti arive sa dernyen swar ki Zezi ti pase avek son bann zapot.

Premyerman zot ti selebre Lapak ansanm. Sa ti en repa spesyal ki pep Bondye ti fer tou le zan pour rapel zot zot delivrans dan lesklavaz Lezip. Apre Zezi ti entrodwir en lot repa spesyal avek zot. Nou pou diskit sa plitar dan en lot sapit e nou pou vwar ki mannyer sa repa i ed nou pour rapel Zezi. Apre repa e apre ki i ti’n ankouraz son bann zapot, Zezi ti anmenn zot dan zarden Zetsemane. Sa ti zot landrwa prefere kot zot ti kontan ale.

 Dan zarden, Zezi ti rod en landrwa trankil pour li priye li tousel. I ti osi dir Pyer, Zak, ek Zan priye. Me zot ti tonm dormi. Trwa fwa Zezi ti al priye li tousel, e tou le trwa fwa ler i ti retournen, i ti vwar Pyer ek lezot pe dormi! (Matye 26:36-47) Ou konnen akoz zot ti’n devret reste eveye e priye?— Annou vwar akoz.

Pli boner, Zida Iskaryot ti avek Zezi ek lezot zapot ler zot ti pe selebre Lapak. Ou rapel Zida, ki ti’n vin en voler? Aprezan i ti pe al trai Zezi. I ti konnen ki Zezi ek son bann zapot ti kontan al dan zarden Zetsemane. Alors Zida ti anmenn bann solda la pour aret Zezi. Ler zot ti arive, Zezi ti demande: “Lekel ki zot pe rode?”

Bann solda ti reponn: “Zezi.” Zezi pa ti per, i ti reponn: “Mwanmenm mwan.” Bann solda ti telman sirprann pour vwar sa kouraz ki Zezi ti annan ki zot ti rekil deryer e tonm ater. Apre Zezi ti dir: ‘Si mwan ki zot pe rode, les mon bann zapot ale.’—Zan 18:1-9.

Ler bann solda ti tyonbo Zezi e anmar li, bann zapot ti per e zot ti taye. Me Pyer ek Zan ti anvi konnen ki pou arive avek Zezi. Alors zot ti swiv group, an misouk. Finalman, Zezi ti ganny anmennen kot lakaz Kaif, ki ti gran pret. Vi ki gran pret ti konn Zan, sa servant kot baro ti les li ek Pyer antre anndan.

Bann pret ti’n fini ariv kot lakaz Kaif pour ziz Zezi. Zot ti anvi touy li. Alors zot ti’n anmenn bann temwen pour koz manti lo li. Bann dimoun ti tap Zezi koud-pwen e kalot li dan son figir. Pyer ti lanmenm la kan tousala ti pe arive.

 Sa servant ki ti fer Pyer ek Zan antre ti remark Pyer e dir: “Ou osi ou ti avek Zezi.” Me Pyer ti dir i pa ni menm konn Zezi. Apre en lot fiy ti rekonnet Pyer e dir bann dimoun ki ti la: “Sa zonm ti avek Zezi.” Ankor enn fwa Pyer ti dir i pa konn Zezi. Plitar en group dimoun ti vwar Pyer e dir li: “Nou asire ki ou osi ou enn parmi zot.” Pour en trwazyenm fwa, Pyer ti dir: “Mon pa konn sa zonm!” Pyer ti menm fer serman pour lezot krwar i pe dir laverite. Zezi ti vire e get li.—Matye 26:57-75; Lik 22:54-62; Zan 18:15-27.

Ou konnen akoz Pyer ti koz manti?— Akoz i ti per. Be akoz i ti per? Ki i ti’n devret fer pour li ganny plis kouraz? Reflesir. Ki Zezi ti’n fer pour li ganny kouraz?— I ti’n priy Bondye, e Bondye ti ed li pour ganny kouraz. Ou rapel trwa fwa Zezi ti dir Pyer priye, pa tonm dormi, e veye? Eski i ti fer li?—

 Tou le trwa fwa, Pyer ti tonm dormi. I pa ti priye e i pa ti veye. Alors ler Zezi ti ganny arete, sa ti sirprann li. Plitar ler zot ti pe tap Zezi e fer plan pour touy li, Pyer ti per. Pourtan ki Zezi ti’n fek dir zot?— Zezi ti’n dir zot ki lemonn pou ay zot, zis parey i’n ay li.

Aprezan, annou mazin en keksoz ki kapab ariv avek nou en pe parey sa ki ti ariv avek Pyer. Fer konmsi ou dan laklas e lezot manrmay i konmans mal koz lo bann dimoun ki pa salye paviyon oubyen ki pa fet Nwel. Si enn sa  bann manrmay i get ou e dir: “Ou osi ou pa salye paviyon, non?” Oubyen lezot i dir: “Ni nwel ou pa fete ou!” Eski ou pou per pour dir laverite?— Ou pou koz manti, parey Pyer?—

Apre Pyer ti regrete akoz i ti’n dir i pa konn Zezi. Ler i ti realize ki i ti’n fer, i ti al deor e konmans plere. Wi, Pyer ti retourn ver Zezi. (Lik 22:32) Aprezan reflesir. Kwa ki kapab ed nou pour pa per e dir en keksoz parey Pyer ti dir?— Pa bliye Pyer pa ti priye e kontinyen veye. Alors ki nou devret fer pour nou vin en disip sa Gran Ansennyan?—

Nou bezwen priy Zeova pour li ed nou. Ou konnen ki Bondye ti fer pour Zezi ler i ti priye?— I ti anvoy en lanz pour donn li lafors. (Lik 22:43) Eski lanz Bondye i kapab ed nou?— Labib i dir: ‘Lanz Zeova pe kanpe toultour bann ki anvi fer li plezir, e i sov zot.’ (Psonm 34:7) Me apard ki priye, nou bezwen fer ankor en lot keksoz pour ganny led Bondye. Ou konnen ki nou bezwen fer?— Zezi ti dir son bann disip pa dormi e kontinyen veye. Ki mannyer nou kapab fer sa?—

Nou bezwen ekout byen dan renyon e byen konsantre ler nou lir Labib. Me nou osi bezwen priy Zeova toultan pour demann li pour ed nou servi li. Si nou fer sa, nou pou ganny led pour anpes lafreyer domin nou. Apre nou pou byen kontan ler nou ganny loportinite pour koz avek lezot lo sa Gran Ansennyan e lo son Papa.