FER krwar en dimoun i donn ou en gro kado. Ki ou pou fer?— Eski ou pou dir li mersi e apre oubliy net sa dimoun ki’n donn ou sa kado? Oubyen ou pou mazin li e sa ki i ti fer pour ou?—

Zeova in donn nou en tre gro kado. I’n anvoy son Garson mor pour nou. Ou konnen akoz Zezi ti bezwen mor pour nou?— Sa i en keksoz tre enportan ki nou bezwen byen konpran.

Parey nou ti vwar dan Sapit 23, Adan ti fer pese ler i ti kas lalwa parfe Bondye. E vi ki Adan i papa nou tou, i’n pas pese avek nou. Alors, ki nou bezwen?— Nou kapab dir nou bezwen en nouvo papa, en papa ki’n viv en lavi parfe lo later. Lekel ki ou krwar i kapab vin sa kalite papa pour nou?— Zezi.

Zeova ti anvoy Zezi lo later pour li vin en papa pour nou dan plas Adan. Labib i dir: “‘Premye zonm, Adan, ti vin en et vivan.’ Dernyen Adan in vin en lespri ki donn lavi.” Lekel premye Adan?— Sa zonm ki Bondye ti kree avek lapousyer. Be lekel dezyenm Adan?— Zezi. Labib i montre nou sa, ler i dir: ‘Premye zonm [Adan] in sorti dan later, i’n ganny fer avek lapousyer. Dezyenm zonm [Zezi] in sorti dan lesyel.’—1 Korentyen 15:45, 47; Zenez 2:7.

 Bondye ti pran lavi Zezi dan lesyel e met li dan vant Mari. Alors Zezi pa’n ganny okenn pese avek Adan. Sanmenm sa Zezi ti en zonm parfe. (Lik 1:30-35) E sanmenm ler Zezi ti ne, en lanz ti dir avek bann berze: “Ozordi en Sover in ne.” (Lik 2:11) Me pour li vin nou Sover, ki sa pti baba ti bezwen fer premyerman?— I ti bezwen grandi avan e vin en zonm, zis parey Adan ti ete. Apre la i ti pou kapab vin ‘dezyenm Adan.’

Zezi ki nou Sover, pou osi vin nou “Papa Eternel.” I ganny apele koumsa dan Labib. (Izai 9:6, 7) Wi, Zezi ki parfe i kapab vin nou papa dan plas Adan ki ti fer pese e vin enparfe. Savedir nou kapab swazir ‘sa dezyenm Adan’ konman nou papa. Byensir, Zezi li menm i Garson Zeova.

Letan nou aprann konn Zezi, nou kapab aksepte li konman nou Sover. Ou rapel akoz nou bezwen ganny sove?— Akoz sa pese ek lanmor ki Adan in pas avek nou. Pour sov nou, Zezi ti sakrifye oubyen donn son lavi parfe pour nou. Sa lavi ki i’n donnen pour nou i apel en pri oubyen ranson. Zeova ti donn sa ranson pour pardonn nou nou pese.—Matye 20:28; Romen 5:8; 6:23.

Nou anvi toultan rapel sa ki Bondye ek son Garson in fer pour nou, pa i vre?— Zezi ti montre son  bann disip en bon fason pour zot rapel sa ki i ti fer. Annou vwar.

Fer konmsi ou dan en lasanm anler dan en lakaz Zerizalenm. I aswar. Zezi ek son bann zapot i atab. Lo latab i annan roti mouton, ennde dipen plat, ek diven rouz. Zot pe pran en repa spesyal. Ou konnen akoz sa repa i spesyal?—

Sa repa i rapel zot ki Zeova ti fer pour son pep, bann Izraelit, ler zot ti lesklav Lezip. Sa letan, Zeova ti dir son pep: ‘Sak fanmiy, touy en mouton, e met son disan lo lankadreman laport zot lakaz.’  Apre i ti dir: ‘Antre anndan kot zot, e manz sa lavyann mouton.’

Bann Izraelit ti fer sa ki Zeova ti’n dir zot. Son aswar, lanz Bondye ti pas partou dan Lezip. I ti touy premye ne dan laplipar lakaz. Me sa lanz ti sot bann lakaz ki i ti vwar disan mouton lo lankadreman laport. Bann zanfan dan sa bann lakaz pa ti mor. Faraon, lerwa Lezip, ti per ler i ti vwar sa ki lanz Zeova ti’n fer. Alors Faraon ti dir bann Izraelit: ‘Zot lib pour ale. Sorti la Lezip, ale!’ Deswit, bann Izraelit ti pran zot bann zafer, met lo zot samo ek bourik e ale.

Zeova pa ti oule son pep bliye ki mannyer i ti liber zot. Alors i ti dir: ‘En fwa dan en lannen, zot devret manz en repa parey zot in manze ozordi swar.’ Zot ti apel sa repa spesyal Lapak. Sa zour swar lanz Bondye ti sot bann lakaz ki ti’n ganny marke avek disan.—Egzod 12:1-13, 24-27, 31.

Zezi ek son bann zapot ti pe mazin sa ler zot ti pe manz sa repa Lapak. Apre, Zezi ti fer en keksoz tre enportan. Me avan i ti fer sa, i ti fer ale Zida, sa zapot ki pa ti reste fidel avek li. Apre Zezi ti pran bann dipen ki ti’n reste, priye, kas dipen e pas avek son bann disip. I ti dir: “Pran manze.” Apre i ti dir zot: ‘Sa dipen i reprezant mon lekor ki mon pou donnen ler mon mor pour zot.’

Apre Zezi ti pran en lakoup diven rouz. Apre ki i ti’n fer en lot lapriyer pour remersye Zeova, i ti pas diven e dir: “Bwar zot tou.” Apre i ti dir zot: ‘Sa diven i reprezant mon disan. Byento mon pou vers mon disan pour liber zot dan pese. Kontinyen fer sa pour mazin mwan.’—Matye 26:26-28; 1 Korentyen 11:23-26.

 Ou remarke Zezi ti dir son bann disip kontinyen fer sa pour mazin li?— Zot ti pou nepli fer repa Lapak ankor. Zot ti pou ranplas li par sa repa spesyal tou le zan pour mazin Zezi ek son lanmor. Sa repa i apel Repa Senyer. Ozordi nou apel li Memoryal. Akoz?— Akoz i fer nou mazin sa ki Zezi ek son Papa, Zeova, ti fer pour nou.

Sa dipen i devret fer nou mazin lekor Zezi. I ti pare pour donn son lekor pour nou ganny lavi eternel. E sa diven rouz, ki i fer nou mazinen?— I fer nou mazin valer disan Zezi. I pli presye ki sa disan mouton ki bann Izraelit ti servi Lezip pour Lapak. Ou konnen akoz?— Labib i dir ki disan Zezi i kapab fer nou ganny pardonnen nou pese. E ler tou nou pese pou ganny efase, nou pou nepli malad, vye, e mor. Nou devret mazin sa ler nou asiste Memoryal.

Eski tou dimoun i devret manz dipen e bwar diven zour Memoryal?— Zezi ti dir avek bann ki devret fer li: ‘Zot pou form parti mon Rwayonm e zot pou asiz lo tronn avek mwan dan lesyel.’ (Lik 22:19, 20, 30) Savedir zot pou al dan lesyel pour vin lerwa ansanm avek Zezi. Alors zis bann ki annan lespwar pour renny avek Zezi dan lesyel ki devret pran sa dipen ek diven.

Me menm bann dimoun ki pa manz sa dipen e bwar sa diven i devret asiste Memoryal. Ou konnen akoz?— Akoz Zezi ti donn son lavi pour nou osi. Ler nou al Memoryal, nou montre ki nou pa’n bliy sa. Nou pa’n bliy sa gro kado ki Bondye in donn nou.