OU’N manze ozordi?— Lekel ki ti kwi sa manze?— Petet ou manmi oubyen en lot dimoun. Be akoz nou devret remersye Bondye pour sa manze?— Akoz Bondye ki’n fer bann plant pouse pour nou ganny manze. Me nou devret osi dir mersi sa enn ki’n kwi sa manze oubyen sa enn ki’n tir nou manze.

Parfwa nou bliye pour dir mersi ler lezot i fer en bon keksoz pour nou, pa i vre? Kan sa Gran Ansennyan ti lo later, ti annan en bann lepre ki ti bliye dir li mersi.

Ou konnen kisisa en lepre?— En lepre i en dimoun ki ganny en maladi ki apel lalep. Sa maladi i kapab fer serten parti lekor en dimoun pouri. Kan Zezi ti lo later, bann lepre ti reste lwen avek lezot dimoun. Si en lepre ti vwar en lot dimoun pe vini, i ti bezwen kriye pour sa dimoun pa vin pros avek li pangar i atrap sa lalep.

Zezi ti byen zantiy avek bann lepre. En zour letan i ti pe al Zerizalenm, Zezi ti pas dan en pti vilaz. Ler i ti pe antre dan sa vilaz, dis lepre ti vin vwar li. Zot ti’n tande ki Bondye ti’n donn pouvwar Zezi pour geri tou kalite maladi.

Sa bann lepre pa ti vin obor Zezi. Zot ti debout lwen avek li. Me zot ti krwar Zezi ti kapab geri zot lalep. Alors ler sa  bann lepre ti vwar sa Gran Ansennyan, zot ti kriye: ‘Zezi, Met, ed nou!’

Eski ou pran lapenn pour bann dimoun malad?— Zezi ti santi koumsa. I ti konnen pa gou ler ou en lepre. Alors i ti reponn zot e dir: “Al montre zot avek bann pret.”—Lik 17:11-14.

Akoz Zezi ti dir zot fer sa? Akoz en lalwa ki Zeova ti’n donn Son pep konsernan bann lepre. Sa lalwa ti dir ki bann pret ti bezwen get en lepre e dir si son lalep in geri. Si sa lepre ti’n geri, i ti kapab al viv ankor parmi bann dimoun ki an bonn sante.—Levitik 13:16, 17.

 Me sa bann lepre ti ankor annan zot lalep. Eski zot ti al kot bann pret zis akoz Zezi ti’n dir zot fer sa?— Wi, zot ti ale deswit. Zot ti vreman krwar Zezi ti pou geri zot. Ki ti arive apre?

Avan zot ti ariv kot pret, zot lalep ti geri. Zot laser ti retourn normal. Zot ti’n byen! Zot ti ganny rekonpanse akoz zot ti krwar ki Zezi ti pou kapab geri zot. Pa zot ti kontan! Me aprezan, ki zot ti merit fer pour montre zot apresye sa ki Zezi ti’n fer? Ki ou ti pou’n fer ou?—

Enn sa lepre ki ti’n geri ti retourn kot Zezi. I ti donn Bondye laglwar, savedir dir bann bon keksoz lo Bondye. Sa ti byen akoz Bondye ki ti’n donn Zezi pouvwar pour geri li. Sa zonm ti osi tonm ater kot lipye sa Gran Ansennyan e remersye li. I ti telman apresye sa ki Zezi ti’n fer pour li.

Me lezot? Zezi ti demande: ‘Pa ti annan dis lepre ki’n geri? Oli sa nef lezot? Zis enn ki’n retournen pour vin donn laglwar Bondye?’

Wi, i vre. Zis enn dan sa dis  ki ti donn Bondye laglwar oubyen felisit li. Zis enn ki ti retournen pour remersye Zezi. Deplis, sa zonm ti en Samariten, i ti sorti dan en lot pei. Sa nef lezot zonm pa ti remersye Bondye ek Zezi.—Lik 17:15-19.

Lekel parmi sa bann zonm ki ou parey? Nou anvi parey sa zonm Samariten, non?— Alors, ler en dimoun i fer en bon keksoz pour nou, ki nou devret mazinen pour fer?— Nou devret remersye li. Souvan dimoun i bliye pour dir mersi. Me i byen pour dir mersi. Ler nou fer sa, Zeova ek son Garson Zezi i kontan.

Si ou reflesir, ou pou vwar ki dimoun i fer bokou keksoz pour ou. Annou vwar en legzanp. Eski ou’n deza malad?— Petet ou pa’n deza ganny en maladi grav parey lalep, me ou’n deza ganny en gro latou oubyen en vant fer mal. Ti annan en dimoun ki ti pran swen avek ou?— Petet i ti donn ou latizann e fer lezot keksoz pour ou. Pa ou ti kontan en dimoun ti la pour sonny ou?—

Sa zonm Samariten ti remersye Zezi pour fer li byen, e sa ti fer Zezi kontan. Ou krwar manmi ek dadi pou kontan si ou dir zot mersi ler zot fer keksoz pour ou?— Be wi.

I annan dimoun ki fer keksoz pour ou toulezour oubyen tou le semenn. Petet sa keksoz ki zot fer i zot travay. Zot kontan  pour fer li. Me petet ou bliye dir zot mersi. Petet ou mis i travay dir pour fer ou aprann. Sa i son travay. Me i pou byen kontan si ou dir li mersi pour ed ou aprann.

Parfwa serten dimoun i fer bann pti keksoz pour ou. Eski en dimoun in deza tenir laport pour ou pase? Oubyen eski en dimoun in deza pas en pla manze avek ou lo latab? Menm pour sa bann pti keksoz, i byen pour dir mersi.

Si nou mazinen pour dir mersi bann dimoun lo later, alor pou fasil pour nou mazinen pour dir mersi nou Papa dan lesyel. E i annan telman bokou keksoz pour nou remersye Zeova! I’n donn nou lavi e tou bann bon keksoz ki fer lavi gou. Alors nou annan tou rezon pour donn Bondye laglwar par dir bann bon keksoz lo li toulezour.