OU KOZ avek Zeova ou?— Li i anvi ou koz avek li. Ler ou koz avek Bondye, savedir ou pe fer lapriyer. Souvan Zezi ti koz avek son Papa dan lesyel. Parfwa i ti anvi en moman li tousel pour li koz avek Bondye. Labib i dir, en fwa “i ti mont li tousel lo en pti montanny pour priye. Ler fernwanr ti fer, Zezi ti la li tousel.”—Matye 14:23.

Kote ou kapab ale pour priye ou tousel?— Petet ou kapab koz avek Zeova ou tousel avan ou al dormi aswar. Zezi ti dir: “Ler ou priye, antre dan ou lasanm, ferm laport e priy ou Papa la dan sa landrwa sekre.” (Matye 6:6) Ou priy Zeova tou le swar avan ou al dormi?— I byen pour fer li.

 Zezi ti osi priye ler lezot dimoun ti avek li. Ler son zanmi Lazar ti mor, Zezi ti priye devan bann dimoun ki ti la kot lekor Lazar ti’n ganny mete. (Zan 11:41, 42) Zezi ti osi priye ler i ti zwenn ansanm avek son bann disip. Pa ou al renyon kot lapriyer i ganny fer?— En gran dimoun ki abitye fer lapriyer dan renyon. Ekout byen sa ki i pe dir akoz i pe koz avek Bondye pour ou. Apre ou pou kapab dir “Amenn” ler lapriyer i fini. Ou konnen ki savedir ler ou dir “Amenn” alafen lapriyer?— Savedir ou dakor avek sa lapriyer e ou ti a kontan dir menm keksoz ou osi.

Zezi ti osi priye avan manze. I ti remersye Zeova pour sa manze. Eski ou fer lapriyer avan ou manze?— I byen remersye Zeova pour sa manze ki ou pe al manze. Ler ou manz ansanm avek lezot, petet en dimoun i fer lapriyer pour ou. Me ki ou pou fer si ou tousel? Oubyen si ou pe manz ansanm avek bann dimoun ki pa remersye Zeova?— Be ou bezwen fer ou lapriyer ou menm.

Eski ou bezwen toultan priy for oubyen Zeova i tann ou ler  ou priy dousman?— Annou vwar ki ti arive avek Neemya e nou a ganny larepons. Neemya ti en adorater Zeova. I ti travay dan pale en Lerwa Pers ki ti apel Artakzerzes. En zour Neemya ti vreman tris akoz i ti’n tande ki miray Zerizalenm ti’n kase. Zerizalenm ti lavil prensipal son pei.

Ler lerwa ti demann Neemya akoz i ti tris, Neemya ti fer en lapriyer dan son leker avan reponn. Apre Neemya ti dir lerwa akoz i ti tris e demann li si i kapab al Zerizalenm pour rekonstri sa miray. Ki ti arive?—

Bondye ti reponn lapriyer Neemya. Lerwa ti dir Neemya i kapab ale! Lerwa ti menm donn Neemya en kantite dibwa pour li servi pour konstri sa miray. Alors Bondye i vreman kapab  reponn nou lapriyer, menm ler nou fer li dousman dan nou leker.—Neemya 1:2, 3; 2:4-8.

En lot kestyon. Eski ou devret bes ou latet ler ou priye? Eski ou devret azenou? Ki ou dir?— Parfwa Zezi ti azenou letan i ti priye. I annan defwa i ti debout. E parler i ti lev son latet e get ver lesyel, parey ler i ti priye pour Lazar.

Ki sa i montre alor?— I montre ki pa pozisyon ki nou priye ki pli enportan. Parfwa i byen pour bes ou latet e ferm ou lizye. Annandeler, ou kapab azenou parey Zezi ti fer. Me pa bliye nou kapab priy Bondye nenport ler pandan lazournen oubyen aswar. I pou ekout nou. Sa ki pli enportan letan nou priye i ki nou vreman krwar Zeova pe ekout nou. Eski ou krwar Zeova i ekout ou lapriyer?—

Ki nou devret dir letan nou priye?— Dir mwan: Ler ou priye, ki ou dir Zeova?— Zeova in donn nou telman en kantite keksoz. Pa i byen ki nou remersye li?— Nou kapab remersye li pour sa manze ki nou manze. Me eski ou’n deza remersye li pour sa lesyel ble, sa bann pye dibwa ver, ek sa bann zoli fler?— Li ki’n fer tousala.

En fwa bann disip Zezi ti demann li pour montre zot ki mannyer pour priye. Sa Gran Ansennyan ti montre zot sa ki pli enportan pour priy lo la. Ou konnen ki sa bann keksoz enportan?— Pran ou Labib, e ouver li dan  Matye sapit 6. Dan verse 9 ziska 13, nou vwar sa ki bokou dimoun i apel lapriyer Notreper. Annou lir li ansanm.

La nou vwar ki Zezi ti dir nou priy konsernan non Bondye. I ti dir priye ki non sen Bondye i ganny glorifye oubyen sangtifye. Lekel non Bondye?— Wi, non Bondye i Zeova, e nou devret kontan sa non.

Dezyenmman, Zezi ti ansenny nou pour priye ki Rwayonm Bondye i vini. Sa Rwayonm i enportan akoz i pou anmenn lape lo later e fer li vin en paradi.

Trwazyenmman, sa Gran Ansennyan ti dir priye ki lavolonte Bondye i ganny fer lo later parey i’n ganny fer dan lesyel. Si nou priy konsernan sa, nou bezwen fer sa ki Bondye i oule nou fer.

Apre, Zezi ti dir nou priye pour nou ganny nou manze sak zour. I ti osi dir ki nou devret dir Bondye nou regrete kan nou’n fer en keksoz mal e demann li pardon. Me pour Bondye fer sa, nou osi nou devret pardonn lezot si zot in fer nou en keksoz mal. Eski sa i fasil pour ou fer?—

Finalman, Zezi ti dir nou devret priye ki Zeova i protez nou kont Satan, sa enn ki mesan. Tousala i bann bon keksoz ki nou kapab koz avek Bondye lo la.

Nou devret krwar ki Zeova i ekout nou lapriyer. Olye zis demann li pour ed nou, nou devret osi remersye li. I kontan ler nou serye dan sa ki nou dir dan nou lapriyer e ler nou demann li bann bon keksoz. I pou donn nou sa bann keksoz. Eski ou krwar sa ou?—