1, 2. Kwa ki fer dimoun soufer ozordi, e ki kestyon sa i fer nou demande?

 DAN en pei desire par lager, plizyer milye madanm ek zanfan ki ti’n ganny touye dan lager ti ganny antere ansanm dan en gran transe. Otour sa transe ti annan bann pti lakrwa e lo sak lakrwa ti ekrir: “Akoz?” Sa i kestyon pli fer mal ki dimoun i demande. Dimoun i demann sa kestyon ler lager, dezas, maladi oubyen krim i pran lavi bann ki zot kontan, detrir zot lakaz oubyen fer zot soufer dan lezot fason. Zot anvi konnen akoz sa bann maler i ariv lo zot.

² Akoz Bondye i les nou soufer? Si Zeova i en Bondye ki annan tou pouvwar, i bon, saz, e zis, akoz sa lemonn i ranpli avek laenn ek lenzistis? Ou’n deza demann ou lekor sa?

3, 4. (a) Kwa ki montre i pa mal pour demande akoz Bondye i les nou soufer? (b) Ki mannyer Zeova i santi ler i vwar mesanste ek soufrans?

³ Eski i mal pour demande akoz Bondye i les nou soufer? Serten i krwar si ou demann en kestyon parey,  ou napa ase lafwa oubyen respe pour Bondye. Me dan Labib, ou pou vwar ki bann serviter fidel Bondye ti demann bann kestyon parey. Par egzanp, profet Abakouk ti demann Zeova: “Akoz ou fer mwan vwar sa ki fer mal, e ou kontinyen get zis problenm menm? Akoz depouyman ek vyolans i la devan mwan? Akoz dispit i arive e akoz i annan konfli?”—Abakouk 1:3.

⁴ Eski Zeova ti ankoler avek Abakouk akoz i ti demann li sa bann kestyon? Non. Okontrer Bondye ti fer Abakouk ekrir sa bann kestyon fran dan son Parol enspire, Labib. Bondye ti osi ed li konpran pli byen keksoz e ganny plis lafwa. Zeova i anvi menm keksoz pour ou. Pa bliye ki Labib i dir Bondye i pran nou lentere aker. (1 Pyer 5:7) Napa personn ki pli ay mesanste ek soufrans ki Bondye li menm. (Izai 55:8, 9) Be alor, akoz sitan bokou dimoun partou dan lemonn pe soufer?

5. Ki leksplikasyon dimoun i gannyen ler zot demande akoz nou soufer, me ki Labib i dir?

⁵ Dimoun dan diferan larelizyon in al vwar zot pret  pour demande akoz i annan sa kantite soufrans lo later. Souvan larepons ki zot gannyen se ki sa i lavolonte Bondye, depi byen lontan Bondye in fini desid tou sa ki pou arive, enkli maler. I annan osi ki dir fason ki Bondye i azir i en mister. Oubyen lezot i dir Bondye i pran lavi en dimoun, menm bann zanfan, akoz i bezwen zot dan lesyel. Me parey ou’n aprann, Bondye pa zanmen responsab pour bann move keksoz. Labib i dir: “Zanmen sa vre Bondye pou azir dan en move fason, e zanmen Tou Pwisan pou azir dan en fason enzis!”—Zob 34:10.

6. Akoz bokou dimoun i fer sa fot pour blanm Bondye pour sa bann soufrans dan lemonn?

⁶ Eski ou konnen akoz dimoun i fer sa fot pour blanm Bondye pour tou soufrans ki egziste dan sa lemonn? Laplipar-di-tan zot blanm Bondye Tou Pwisan akoz zot krwar li ki pe diriz sa lemonn. Labib i dir en keksoz enportan ki zot zot pa okouran. Ou ti aprann sa dan trwazyenm sapit sa liv. Se Satan ki pe vreman kontrol sa lemonn.

7, 8. (a) Ki mannyer sa lemonn i parey sa enn ki pe kontrol li? (b) Ki mannyer lenperfeksyon imen ek “letan ek levennman san ekspekte” in anmenn soufrans?

⁷ Labib i montre klerman ki: “Lemonn antye i dan pouvwar dyab.” (1 Zan 5:19) Pa sa i fer sans ler ou mazin lo la? Sa lemonn i annan bann move tre Satan, ki pe “tronp lemonn antye.” (Revelasyon 12:9) Satan i ranpli avek laenn, riz, e i kriyel. Se pour sa ki lemonn, anba son pouvwar, i ranpli avek laenn, mansonz, ek kriyote. Sa i en rezon akoz i annan sa kantite soufrans.

⁸ Parey nou’n vwar dan Sapit 3, en dezyenm rezon akoz i annan sa kantite soufrans i ki depi rebelyon  dan zarden Edenn, dimoun in vin enparfe e zot fer pese. Akoz zot enparfe, zot tant pour oule domin lezot, ki anmenn lager, labi pouvwar, ek soufrans. (Eklezyast 4:1; 8:9) “Letan ek levennman san ekspekte” i en trwazyenm rezon akoz i annan soufrans. (Eklezyast 9:11) Akoz Zeova pa pe diriz e protez sa lemonn, dimoun i kapab soufer akoz par azar zot dan en landrwa ki en maler pe al arive.

9. Akoz nou asire Zeova i annan en bon rezon pour les soufrans kontinyen arive?

⁹ I rekonfort nou pour konnen ki Bondye pa fer nou soufer. I pa responsab pour sa bann lager, krim, labi, oubyen menm bann dezas natirel ki fer dimoun soufer. Toudmenm, nou bezwen konnen, Akoz Zeova i les nou soufer? Si i Tou Pwisan, i annan sa pouvwar pour met en lafen avek soufrans, non? Be akoz i pa fer li? I bezwen annan en bon rezon pour pa fer li parski parey nou konnen i en Bondye lanmour.—1 Zan 4:8.

10. Ki Satan ti kestyonnen, e konman i ti fer sa?

¹⁰ Pour konnen akoz Bondye i les nou soufer, nou bezwen mazin sa letan ki soufrans ti konmanse. Kan Satan ti fer Adan ek Ev dezobei Zeova, en kestyon enportan ti leve. Satan ti konnen ki Zeova i pli for ki li. Menm Satan i konnen ki lafors Zeova napa en limit. Alor i pa ti pe kestyonn sa. Plito, Satan ti kestyonn drwa Zeova pour dirize. Ler i ti dir Bondye i en manter e i priv son bann kreatir sa ki bon, Satan ti oule dir ki Zeova i en move dirizan. (Zenez 3:2-5) Dapre li, bann imen ti pou pli byen si Bondye i aret diriz zot. Sa ti en latak lo souvrennte Zeova, savedir son drwa pour dirize.

11. Akoz Zeova pa ti zis detri Adan ek Ev?

 ¹¹ Adan ek Ev ti rebel kont Zeova. Konmsi zot ti pe dir: “Nou pa bezwen Zeova pour diriz nou. Nou kapab desid lo nou menm sa ki byen ek sa ki mal.” Ki mannyer Zeova ti pou rezourd sa problenm? Ki mannyer i ti pou montre tou dimoun ki pou vini plitar ki Adan ek Ev ti’n mal fer e ki vreman son fason fer ki pli byen? Petet serten i kapab dir Bondye ti annan zis pour li detrir sa de zans e konmans en nouvo ras imen. Me Zeova ti oule ki later i ranpli avek desandans Adan ek Ev, e i ti anvi zot viv pour touzour dan paradi lo later. (Zenez 1:28) I touzour akonpli son plan. (Izai 55:10, 11) Tou fason, si i ti detri Adan ek Ev, sa pa ti pou’n reponn sa kestyon lo si Zeova i annan drwa dirize.

12, 13. Donn en legzanp pour montre akoz Zeova in les Satan diriz sa lemonn e akoz i’n les bann imen fer ki mannyer zot oule.

¹² Annou pran en legzanp. Meton en ansennyan lekol pe montre son bann zelev ki mannyer pou fer en kalkil difisil. Dan son laklas i annan en zelev ki malen  me i en fouter dezord. Sa zelev i dir ki lafason son ansennyan pe fer sa kalkil i mal. Dapre li, son ansennyan pa konn fer kalkil e i ensiste ki li i konn fer sa kalkil pli byen. Serten zelev i donn li rezon e pran kote avek li. Ki sa ansennyan pou fer? Si i fer zot sorti dan laklas, ki lezot zelev pou panse? Eski zot pa pou krwar sa bann manrmay i annan rezon? Tou lezot zelev dan laklas i kapab perdi respe pour sa ansennyan, e krwar i per pangar son zelev i montre ki i mal. Me meton sa ansennyan i les sa zelev montre laklas ki mannyer li i ti pou fer sa kalkil.

¹³ Zeova in fer parey sa ansennyan dan sa legzanp. Pa bliye ti annan lezot ki ti enplike dan sa zafer ki ti arive dan zarden Edenn. Plizyer milyon lanz ti pe gete. (Zob 38:7; Danyel 7:10) Lafason ki Zeova ti pou rezourd sa problenm ti pou afekte tou sa bann lanz e tou bann dimoun ki ti pou vini plitar. Alors ki Zeova ti fer? I’n les Satan montre ki mannyer i ti pou diriz limanite. Bondye in osi les bann imen fer ki mannyer zot oule anba gidans Satan.

14. Ki byenfe desizyon Zeova pour les imen fer ki mannyer zot oule pou anmennen?

¹⁴ Sa ansennyan dan nou legzanp i konnen ki sa fouter dezord ek son bann kanmarad i mal. Me i osi konnen si i donn zot sans prouv zot pwen, laklas antye pou benefisye. Ler zot pa pou reisi fer sa kalkil, tou zelev ki senser pou vwar ki zis sa ansennyan ki kapab ansenny laklas. Aprezan zot pou konpran akoz sa ansennyan i tir bann ki met dezord dan son laklas. Zeova in fer parey. I konnen bann dimoun ek lanz ki senser pou benefisye ler zot vwar ki Satan ek bann ki swiv li pa reisi e ki bann imen pa kapab depan lo zot menm. Parey Zeremi dan lepase, zot pou aprann en keksoz enportan: “Mon konnen,  O Zeova, ki semen en imen pa pour li. I pa pour en imen ki pe marse pour diriz son lepa.”—Zeremi 10:23.

15, 16. (a) Akoz Zeova in les soufrans ale pour tou sa letan? (b) Akoz Zeova pa’n anpes bann vilen krim arive?

¹⁵ Me akoz Zeova in les soufrans kontinyen pour tou sa letan? Akoz i pa anpes move keksoz arive? Bon, annou vwar de keksoz ki sa ansennyan dan nou legzanp pa ti pou fer. Premyerman, i pa ti pou anpes sa zelev prezant son solisyon pour sa kalkil. Dezyenmman, sa ansennyan pa ti pou ed sa zelev pour fer sa kalkil. Be Zeova osi parey. I annan de keksoz ki i’n determinen pour pa fer. Premyerman, i pa’n anpes Satan ek bann lo son kote sey prouve ki zot byen. Se pour sa ki i’n bezwen les letan pase. Toudilon listwar imen, zonm in esey tou sort kalite gouvernman. Zot in fer progre dan lasyans ek lezot domenn, me pli ale lenzistis, povrete, krim, ek lager i vin pli pir ankor. Ozordi i kler ki zonm pa kapab diriz lo zot menm.

¹⁶ Dezyenmman, Zeova pa’n ed Satan pour diriz sa lemonn. Par egzanp si Bondye ti anpes bann vilen krim arive, eski pa i ti pou pe ede montre ki Satan i byen? Eski Bondye pa ti pou pe fer dimoun krwar ki petet zonm i kapab diriz zot lekor san okenn move konsekans? Si Zeova ti fer sa, i ti pou vin konplis dan en mansonz. Me “Bondye pa kapab manti.”—Ebre 6:18.

17, 18. Ki Zeova pou fer avek tou sa dega ki dominasyon imen ek lenfliyans Satan in fer?

¹⁷ Me ki pou arive avek tou sa dega ki rebelyon kont Bondye in anmennen? Annou pa bliye ki Zeova i Tou Pwisan. Alor i kapab retir bann move lefe ki soufrans in anmennen. Parey nou’n aprann, sa later ki zonm pe detrir  pou sanze e vin en Paradi. Bann move lefe pese pou ganny efase akoz nou lafwa dan sakrifis Zezi. Soufrans ki lanmor i anmennen pou ganny ranplase par lazwa rezireksyon. Bondye pou servi Zezi “pour detri bann travay dyab.” (1 Zan 3:8) Zeova pou fer tousala ariv zis atan. Nou kontan ki i pa’n fer li depi avan, akoz son pasyans in donn nou loportinite pour aprann laverite e servi li. (2 Pyer 3:9, 10) Me antretan, Bondye pe rod bann ki senser e ed zot siport okenn soufrans ki zot pe pas ladan dan sa lemonn boulverse.—Zan 4:23; 1 Korentyen 10:13.

¹⁸ Petet serten i kapab demande, Si Bondye ti’n kree Adan ek Ev en fason ki zot pa ti pou kapab dezobei, pa sa ti a’n evit tou sa soufrans? Pour reponn sa, mazin sa kado presye ki Zeova in donn ou.

19. Ki kado presye Zeova in donn nou, e akoz nou devret apresye li?

¹⁹ Parey nou’n vwar dan Sapit 5, nou’n ganny kree avek sa liberte pour swazir. Eski ou realize ki kantite presye sa kado i presye? Tou sa bann zannimo ki Bondye in kree i ganny kontrole prensipalman par zot lensten. (Proverb 30:24) Zonm in fer bann robot ki kapab fer tou sa ki zot ganny progranmen pour fer. Eski nou ti pou kontan si Bondye ti’n fer nou koumsa? Non. Nou apresye sa liberte ki nou annan pour swazir ki kalite dimoun nou anvi vini, ki kalite lavi nou anvi viv, ki kalite zanmi nou  anvi, eksetera. Nou kontan pour annan serten liberte, e Bondye osi i anvi sanmenm pour nou.

20, 21. Ki mannyer nou kapab servi sa kado dan en pli bon fason posib, e akoz nou devret anvi fer sa?

²⁰ Zeova pa oule nou servi li zis akoz nou oblize. (2 Korentyen 9:7) Ki en paran ti pou pli kontan—son zanfan i dir li “Mon kontan ou” akoz i’n ganny demande pour dir oubyen akoz son leker i pous li pour dir? Alor kestyon ki nou kapab demande i, Konman ou pou servi sa liberte ki Zeova in donn ou pour swazir? Satan, Adan, ek Ev in vreman mal servi zot liberte pour swazir. Zot in rezet Zeova. Be ou, ki ou pou fer?

²¹ Ou annan loportinite pour servi sa zoli kado, ou liberte pour swazir, dan en pli bon fason posib. Ou kapab zwenn ansanm avek tou sa dimoun ki’n pran en pozisyon lo kote Zeova. Zot fer Bondye kontan akoz zot pe fer zot par pour prouve ki Satan i en manter e i’n konpletman fel konman en dirizan. (Proverb 27:11) Ou osi ou kapab fer sa par swazir sa bon semen. Nou pou diskit sa dan lot sapit.