1, 2. Ki kestyon nou bezwen demande apre ki nou’n kit fo larelizyon, e akoz ou krwar sa i enportan?

METON ou al dekouver ki en dimoun in kontamin sours delo kot ou reste. Ou lavi i an danze. Ki ou pou fer? Byensir ou pa pou kontinyen servi sa delo. Ou pou fer debrouy pour ganny en lot sours delo. Me apre ki ou’n fer sa, kestyon ki pou fatig ou aprezan se, ‘Eski mon’n ganny kontaminen?’

² Sa sitiasyon i preski parey avek fo larelizyon. Labib i dir ki zot ladorasyon i kontaminen avek bann lansennyman ek pratik sal. (2 Korentyen 6:17) Se pour sa ki i enportan ou sorti dan “Gran Babilonn,” savedir bann fo larelizyon. (Revelasyon 18:2, 4) Eski ou’n fer sa? Si wi, ou’n byen fer. Me i pa fini la. Apre ki ou’n separe oubyen kit fo larelizyon, ou bezwen demann ou lekor, ‘Eski i ankor annan bann latras fo larelizyon dan mwan?’ Annou vwar ennde legzanp.

3. (a) Ki Labib i dir lo servi bann zidol, e akoz serten i kapab vwar li difisil pour aksepte pwennvi Bondye lo la? (b) Ki ou devret fer avek bann keksoz ki ou annan ki annan pour fer avek fo ladorasyon?

³ Petet serten dimoun in annan bann stati oubyen en pti lasapel kot zot pour plizyer lannen. Eski sa i leka avek ou? Si wi, petet ou santi ou drol oubyen santi i mal pour priy Bondye san sa bann keksoz. Menm petet ou atase avek serten sa bann keksoz. Me Bondye ki annan drwa dir ki mannyer nou devret ador li, e Labib i dir i pa oule nou servi sa bann zidol. (Egzod 20:4, 5; Psonm 115:4-8; Izai 42:8; 1 Zan 5:21) Alors ou kapab pran pozisyon pour sa vre ladorasyon par detrir okenn keksoz ki ou annan ki annan pour fer avek fo ladorasyon. Fer ou mye pour vwar sa bann keksoz parey Zeova i vwar zot. Savedir ‘deteste’ zot.—Deterononm 27:15.

4. (a) Ki mannyer nou konnen i initil pour ador nou zanset? (b) Akoz Zeova ti defann son pep servi okenn form grigri?

⁴ Ladorasyon bann zanset i osi en keksoz ki komen  dan bokou fo larelizyon. Avan serten dimoun ti aprann laverite dan Labib, zot ti krwar ki bann mor pe viv dan kek landrwa envizib e ki zot kapab ed nou oubyen fer nou malis. Petet ou ti fer sir ou pa fer okenn keksoz pour ofans ou bann zanset ki’n mor. Me parey ou’n aprann dan Sapit 6 sa liv, bann mor nepli egziste e zot pa pe viv okenn par. Alors initil nou sey kominik avek zot. Bann mesaz ki nou krwar i sorti kot nou bann defen, an realite i sorti kot bann demon. Se pour sa ki Zeova ti defann bann Izraelit sey koz avek bann mor oubyen servi okenn form grigri.—Deterononm 18:10-12.

5. Ki ou kapab fer si ou ti abitye servi zidol oubyen ador ou zanset avan sa?

⁵ Si ou ti abitye servi bann zidol oubyen ador ou zanset avan sa, ki ou kapab fer? Lir bann pasaz Labib ki montre konman Bondye i vwar sa bann keksoz e reflesir lo la. Toulezour priy Zeova e fer li konnen ou anvi pran pozisyon pour sa vre ladorasyon. Demann li pour ed ou annan menm pwennvi avek li.—Izai 55:9.

6, 7. (a) Ki dimoun i fete zour Nwel? Eski bann premye disip Zezi ti fer sa? (b) Avek ki lafet lanniverser nesans ti ganny asosye ler bann disip Zezi ti lo later?

⁶ Nou ladorasyon i kapab ganny kontaminen avek fo larelizyon dan domenn bann lafet popiler. Annou pran Nwel konman en legzanp. Nwel i swadizan en lafet ki komemor nesans Zezi Kri, e preski tou larelizyon ki dir zot Kretyen i selebre li. Pourtan, napa okenn levidans ki bann premye disip Zezi ti selebre sa lafet. Liv Sacred Origins of Profound Things i dir: “De syek apre nesans Kris, ti napa personn ki ti konnen egzakteman kan i ti ne e ti napa bokou dimoun osi ki ti enterese konnen.”

⁷ Menm si bann disip Zezi ti konnen kan i ti ne, zot  pa ti pou fer sa lafet toudmenm. Akoz? Akoz parey The World Book Encyclopedia i dir, bann premye Kretyen “ti konsider fet lanniverser nesans en dimoun konman en koutim payen.” Labib i mansyonn zis de selebrasyon lanniverser nesans. Zot ti ganny selebre par de dirizan ki pa ti ador Zeova. (Zenez 40:20; Mark 6:21) Dimoun ti osi selebre lanniverser nesans pour onor bann fo bondye. Par egzanp, le 24 Me bann Romen ti fet lanniverser nesans bondye Dayana. Son lannmen zot ti fet lanniverser zot bondye soley, Apolo. Alors, lanniverser nesans ti napa nanryen pour fer avek Kretyen. Plito i ti ganny asosye avek bann payen.

8. Eksplike ki relasyon i annan ant lafet lanniverser nesans ek siperstisyon?

⁸ I annan en lot rezon akoz bann premye Kretyen pa ti pou fet lanniverser nesans Zezi. Son bann disip ti bezwen konnen ki fet lanniverser nesans i annan pour fer avek siperstisyon. Par egzanp, lontan bokou Grek ek Romen ti krwar ki en lespri i asiste nesans sak dimoun e protez li toudilon son lavi. Liv The Lore of Birthdays i dir: “Sa lespri i annan en relasyon misterye avek sa bondye ki son lanniverser nesans i tonm menm zour ki sa dimoun ti ne.” Byensir Zeova pa aksepte okenn lafet ki asosye Zezi avek siperstisyon. (Izai 65:11, 12) Be alors akoz bokou dimoun ozordi i selebre Nwel?

9. Ki mannyer dimoun ti konmans selebre nesans Zezi le 25 Desanm?

⁹ Se anviron 300 zan apre ki Zezi ti viv lo later ki dimoun ti konmans selebre son nesans le 25 Desanm. Me Zezi pa ti ne le 25 Desanm. I evidan ki i ti ne dan mwan Oktob plito. * Be akoz zot in swazir le 25 Desanm konman  zour ki i ti ne? I paret ki plitar serten ki ti dir zot Kretyen ti “anvi sa dat i kwensid avek en lafet payen ki bann Romen ti fete” alokazyon lanniverser nesans soley. (The New Encyclopædia Britannica) Pandan liver, kan soley ti paret afebli, bann payen ti fer bann seremoni pour fer sa sours lasaler ek lalimyer retournen lo sa gran vwayaz ki i ti’n al fer. Le 25 Desanm ti sa zour ki zot zot ti krwar soley ti pe konmans retournen. Pour sey konverti bann payen, bann sef relizye ti adopte sa lafet e sey fer li paret en lafet “Kretyen.” *

10. Akoz serten dimoun pa ti fet Nwel dan lepase?

¹⁰ Depi byen lontan dimoun ti konnen ki Nwel i annan en lorizin payen. Akoz sa, Nwel ti ganny aboli an Langleter e dan serten koloni Ameriken pandan 17 tyenm syek. Tou sa ki ti reste kot zot olye al travay zour Nwel ti ganny pini. Me apre, sa koutim pa ti tarde pour retournen, e bann nouvo osi ti fer zot laparisyon. Nwel ti revin en lafet popiler parey i ete ozordi dan bokou pei. Me akoz sa konneksyon ki Nwel i annan avek fo larelizyon, bann dimoun ki anvi fer plezir Bondye pa selebre li. Zot pa ni selebre okenn lezot lafet ki annan en lorizin payen. *

11. Akoz serten dimoun i selebre sa bann lafet, me ki sa ki devret pli enportan pour nou?

¹¹ Serten dimoun i dakor ki bann lafet parey Nwel i annan en lorizin payen. Me selman zot pa krwar i mal pour selebre zot. Apre tou, laplipar dimoun pa pe mazin fo ladorasyon kan zot pe fet sa bann lafet. Sa bann lokazyon i osi donn loportinite bann fanmiy zwenn ansanm. Eski ou santi koumsa ou osi? Si wi, petet ou vwar li en pe difisil pran pozisyon pour vre ladorasyon akoz ou kontan ou fanmiy, pa akoz ou kontan fo larelizyon. Antouka, asire ki Zeova, ki ti form lafanmiy, i oule ou annan en bon relasyon avek ou fanmiy. (Efezyen 3:14, 15) Ou kapab fortifye ou relasyon avek zot dan bann fason ki Bondye i kontan. Pol ti montre ki sa ki devret pli enportan pour nou, ler i ti ekrir: “Konn disteng sa ki fer plezir Bondye.”—Efezyen 5:10.

12. Donn en legzanp pour montre akoz nou devret rezet bann koutim ek lafet ki annan en move lorizin.

¹² Petet pour ou, ou pa vwar ki mannyer lorizin en lafet i kapab anpes en dimoun fet sa lafet. Eski lorizin i vreman enportan? Be wi! Annou pran en legzanp: Meton ou vwar en lolipop ater dan rigol. Eski ou pou anmas sa lolipop e manz li? Be ditou! Sa lolipop i sal. Zis parey sa lolipop, sa bann lafet i kapab paret atiran, me zot sorti dan bann landrwa sal. Si nou oule pran pozisyon pour vre ladorasyon, nou bezwen annan menm pwennvi avek profet Izai, ki ti dir bann vre adorater Bondye: “Pa tous okenn keksoz sal.”—Izai 52:11.

13. Ki difikilte ou kapab rankontre ler ou pa fet sa bann lafet?

¹³ Ler ou deside pour pa partisip dan serten lafet, parfwa ou kapab vwar ou dan bann sitiasyon difisil. Par  egzanp, ou bann koleg travay i kapab demande akoz ou pa partisip dan bann aktivite ki zot fer dan travay alokazyon sa bann lafet. Si en dimoun i donn ou en kado, ki ou pou fer? Eski i mal pour aksepte? Si ou msye oubyen madanm napa menm krwayans avek ou? Vi ki ou pa fet sa bann lafet, ki ou kapab fer pour fer sir ou zanfan pa santi zot pe mank keksoz?

14, 15. Ki ou kapab fer si en dimoun i swet ou bonn fet oubyen i oule donn ou en kado?

¹⁴ Ou bezwen annan bon zizman pour konnen mannyer ou pou azir dan sak sitiasyon. Par egzanp, si zis en dimoun i swet ou bonn fet pour tel ou tel lokazyon, ou kapab zis dir mersi. Me si ou konn sa dimoun ase byen oubyen ou travay avek li? Dan sa ka, petet ou menm ou kapab deside pour dir plis ki sa. Dan tou le de ka, fer atansyon pour pa ofans sa dimoun. Labib i donn sa konsey: “Ki zot parol i touzour agreab e enteresan, pour zot kapab donn bann repons valab tou dimoun.” (Kolosyen 4:6) Fer sir ou pa montre en mank respe pour lezot. Plito esey eksplik ou pozisyon san ofans lezot. Eksplik zot ki sa pa vedir ou kont donn kado e anmize, me ou prefere fer li en lot moman.

¹⁵ Me si en dimoun i anvi donn ou en kado? Sa pou depan bokou lo sirkonstans. Petet sa dimoun ki pe ofer ou sa kado i dir: “Mon konnen ou pa selebre sa lafet. Me selman mon anvi donn ou sa.” Dan en ka parey, ou kapab aksepte sa kado akoz petet ou santi i pa konmsi ou pe selebre sa lafet. Si sa dimoun ki pe ofer ou sa kado pa familye avek ou krwayans, ou kapab fer li konnen ou pa fet sa lafet. Koumsa i a konpran akoz ou aksepte sa kado me ou pa pou donn li enn pour sa lokazyon. De lot kote, parler en dimoun i kapab donn ou en kado pour montre ou pa fidel avek ou krwayans oubyen ou fer konpromi pour  ganny plis keksoz materyel. Dan sa ka, plito ou pa aksepte sa kado.

16. Ki mannyer ou kapab evite ofans ou fanmiy an rapor avek bann lafet?

¹⁶ Me si ou bann fanmiy napa menm krwayans avek ou? La osi ou bezwen fer atansyon ki ou pa ofans zot. Pa neseser ou fer en deba lo sak koutim oubyen lafet ki ou fanmiy i deside pour swiv. Respekte zot pwennvi, zis parey ou oule zot respekte pour ou. (Matye 7:12) Evite fer okenn keksoz ki pou fer ou partisip dan sa lafet. Parkont, ou bezwen rezonnab. Pa fer konmsi tou pti keksoz i konmsi ou pe partisip dan sa lafet. Byensir, ou bezwen azir dan en fason ki ou konsyans pa pou fatig ou apre.—1 Timote 1:18, 19.

17. Ki mannyer ou kapab ed ou zanfan pour zot pa santi zot pe mank keksoz ler zot vwar lezot pe fete?

¹⁷ Ki ou kapab fer pour ou zanfan pa santi zot pe mank keksoz akoz zot pa fet sa bann lafet ki pa an akor avek Labib? Be sa pou depan bokou lo sa ki ou fer dan lezot moman pandan lannen. Serten paran i kontan donn zot zanfan kado dan lezot moman. Enn bann pli bon kado ki ou kapab donn ou zanfan se ou letan ek latansyon ranpli avek lanmour.

18. Ki mannyer asiste renyon Kretyen i kapab ed ou pran pozisyon pour vre ladorasyon?

¹⁸ Pour fer plezir Bondye, ou bezwen rezet fo ladorasyon e pran pozisyon pour vre ladorasyon. Ki sa i enkli? Labib i dir: “Annou rode konman pous kanmarad pour annan lanmour e fer sa ki byen. Pa abandonn zot lasanble parey labitid serten parmi zot, me ankouraz  kanmarad sirtou ki la sa Zour Senyer pe aprose.” (Ebre 10:24, 25) Bann renyon Kretyen i bann bon lokazyon pour ou ador Bondye dan en fason akseptab. (Psonm 22:22; 122:1) Dan sa bann renyon, bann Kretyen fidel i “benefisye lankourazman” kanmarad.—Romen 1:12.

19. Akoz i enportan ki ou koz avek lezot lo bann keksoz ki ou’n aprann dan Labib?

¹⁹ En lot fason ki ou kapab pran pozisyon pour vre ladorasyon se ler ou koz avek lezot konsernan bann keksoz ki ou’n aprann dan ou letid Labib avek Temwen Zeova. Bokou dimoun pe vreman “zemir e plennyen” akoz sa bann move keksoz ki annan lo later konmela. (Ezekyel 9:4) Petet ou konn serten dimoun ki santi koumsa. Akoz ou pa koz avek zot lo ou lespwar pour lavenir ki ou’n aprann dan Labib? Letan ou frekant bann vre Kretyen e koz avek lezot lo laverite ki ou’n aprann dan Labib, ou pou remarke ki ptit-a-pti dezir ki ou ti annan pour pratik koutim bann fo larelizyon pou disparet. Asire ki ou pou vreman ere e ou pou ganny bokou benediksyon si ou pran pozisyon pour vre ladorasyon.—Malaki 3:10.