Ester ti en fiy Zwif ki ti reste dan lavil Siz, Pers. En kantite lannen avan sa, son fanmir ti’n ganny pran Zerizalenm par Neboukadnezar. I ti grandi avek son kouzen Mordekay, en serviter lerwa Pers, Asweris.

Lerwa Asweris ti anvi en nouvo larenn. Son bann serviter ti anmenn bann pli zoli fiy, enkli Ester. Dan tou sa bann zoli fiy, lerwa ti swazir Ester pour vin larenn. Mordekay ti demann Ester pour pa dir si i en Zwif.

En zonm orgeye ki ti apel Amann ti sef tou bann prens. I ti anvi ki tou dimoun i azenou devan li. Mordekay pa ti oule fer sa. Amann ti sitan ankoler ki i ti anvi touy li. Ler Amann ti tande ki Mordekay ti en Zwif, i ti fer en konplo pour touy tou bann Zwif dan sa pei. I ti dir lerwa: ‘Bann Zwif i danzere, ou bezwen fer zot disparet.’ Asweris ti dir li: ‘Fer sa ki ou anvi fer.’ I ti donn li pouvwar pour fer en nouvo lalwa. Amann ti fer en lalwa ki ti demann bann dimoun pour touy tou bann Zwif le 13 Adar. Me Zeova ti pe gete.

Ester pa ti konnen ki i ti annan sa lalwa. Alor, Mordekay ti anvoy li en kopi sa lalwa e dir li: ‘Al koz avek lerwa.’ Ester ti dir: ‘Nenport dimoun ki al kot lerwa san ganny envite i kapab ganny touye. I fer 30 zour depi ki Lerwa pa’n envit mwan. Me mon pou ale. Si i lev son baton lerwa, mon pou viv. Me si non, mon pou mor.’

Ester ti al kot tronn lerwa. Ler lerwa ti vwar li, i ti lev son baton lerwa. I ti al kot lerwa e lerwa ti demann li: ‘Ki mon kapab fer pour ou Ester?’ Ester ti dir li:  ‘Mon anvi envit ou ek Amann pour en repa.’ Pandan repa, Ester ti envit zot pour en dezyenm repa. Pandan sa dezyenm repa, lerwa ti demann li ankor: ‘Ki mon kapab fer pour ou?’ Ester ti dir: ‘En dimoun pe al touy mwan ek mon pep. Silvouple ed nou.’ Lerwa ti demande: ‘Lekel ki anvi touy ou?’ I ti dir: ‘Sa move zonm Amann.’ Asweris ti sitan ankoler ki i ti donn lord pour touy Amann deswit.

Me personn pa ti kapab kennsel lalwa Amann, pa ni menm lerwa. Alor, lerwa ti fer Mordekay sef bann prens e donn li pouvwar pour fer en nouvo lalwa. Mordekay ti fer en lalwa ki ti permet bann Zwif defann zot lekor ler zot ganny atake. Le 13 Adar, bann Zwif ti defet zot lennmi. Depi sa zour, zot ti selebre zot laviktwar tou le lannen.