Moiz ti gid nasyon Izrael pour en kantite lannen e la i ti pros pour mor. Zeova ti dir li: ‘Pa ou ki pou anmenn bann Izraelit dan Later Promiz. Me ou pou kapab vwar sa pei.’ Alor, Moiz ti demann Zeova pour swazir en nouvo sef ki ti pou pran swen avek lepep. Zeova ti dir li: ‘Dir Zozye ki i pou vin sa nouvo sef.’

Moiz ti dir nasyon Izrael ki i ti pe al mor e ki Zeova ti’n swazir Zozye pour anmenn zot dan Later Promiz. Alor, Moiz ti dir Zozye: ‘Pa bezwen per. Zeova pou ed ou.’ Apre sa, Moiz ti mont anler lo Montanny Nebo. Se la kot Zeova ti montre li sa pei ki I ti’n promet Abraam, Izaak ek Zakob. Moiz ti annan 120 an ler i ti mor.

Zeova ti dir Zozye: ‘Travers Larivyer Zourden e al Kanaan. Mon pou ed ou zis parey mon ti ed Moiz. Fer sir ki ou lir mon Lalwa toulezour. Pa bezwen per. Pran kouraz. Ale e fer sa ki mon’n demann ou pour fer.’

 Zozye ti anvoy de espyon dan lavil Zeriko. Dan sa lot zistwar nou pou konn plis lo sa ki ti arive. Ler zot ti retournen, zot ti dir ki i ti en bon letan pour antre Kanaan. Son lannmen, Zozye ti demann bann Izraelit pour lev kan. Apre sa, i ti anvoy bann pret ki ti pe anmenn lars lalyans par devan zot. Zot ti bezwen travers Larivyer Zourden, ki sa letan ti pe deborde. Me dek ki lipye bann pret ti tous sa delo, sa delo larivyer ti aret koule e larivyer ti sek. Bann pret ti marse ziska dan milye larivyer e apre zot ti debout lanmenm ziska ler tou bann Izraelit ti’n fini traverse. Ou krwar ki sa mirak ti fer zot mazin sa ki Zeova ti’n fer kot Lanmer Rouz?

Alafendefen, apre tou sa letan, bann Izraelit ti antre dan Later Promiz. Zot ti pou kapab konstri zot lakaz ek lavil. Zot ti pou kapab annan zot prop plantasyon rezen ek fri. I ti en pei kot i ti annan en kantite dile ek dimyel.