Lerwa Siri, Benn-Adad ti kontinyen atak Izrael. Me sak fwa profet Elisa ti averti lerwa Izrael e i ti reisi sove. Alor, Benn-Adad ti anvi fer Elisa prizonnyen. I ti tande ki Elisa ti dan lavil Dotann, alor i ti anvoy larme Siryen pour aret li.

Bann Siryen ti al Dotann aswar. Son lannmen bomaten, serviter Elisa ti al deor e i ti vwar ki lavil ti’n ganny antoure par en gran larme. I ti vreman per e kriye: ‘Elisa, ki nou pou fer?’ Elisa ti dir li: ‘I annan plis avek nou ki avek zot.’ Zeova ti fer serviter Elisa vwar ki partou lo bann montanny otour lavil, i ti annan bann seval ek saret lager ki ti parey dife.

Ler bann solda Siryen ti esey tyonbo Elisa, i ti priye: ‘Zeova, silvouple fer zot pa vwar kler.’ En sel kou, menm si zot ti kapab vwar kler, bann solda pa ti konnen kot zot ti ete. Elisa ti dir bann  solda: ‘Pa dan sa lavil ki zot devret vini. Swiv mwan e mon ava anmenn zot kot sa zonm ki zot pe rode.’ Zot ti swiv Elisa ziska Samari, kot lerwa Izrael ti reste.

Ler bann Siryen ti realize kot zot ti ete, i ti’n fini tro tar. Lerwa Izrael ti demann Elisa: ‘Eski mon touy zot?’ Eski Elisa ti profit sa loportinite pour revanze lo sa bann dimoun ki ti anvi fer li ditor? Non. Elisa ti dir: ‘Pa touy zot. Donn zot manze e apre fer zot ale.’ Alor, lerwa ti fer en gran repa pour zot e apre i ti fer zot retourn se zot.