DIMOUN ti konmans miltipliye lo later, laplipar zot ti fer bann move keksoz parey Kaen. Me, ti annan en zonm ki pa ti fer parey lezot. I ti apel Enok. I ti en zonm brav. Menm si otour li dimoun ti pe fer bann move keksoz, Enok ti kontinyen servi Zeova.

Eski ou konnen akoz sa bann dimoun ti fer bann move keksoz? Byen, mazinen lekel ki ti fer Adan ek Ev dezobei Bondye e manz sa fri ki Bondye ti dir zot pa bezwen manze? Wi, ti en move lanz. Labib i apel li Satan. I pe esey fer tou dimoun vin move.

En zour, Zeova ti fer Enok anons bann dimoun en keksoz ki zot pa ti anvi tande. Enok ti dir zot: ‘En zour Bondye pou detri tou bann move dimoun.’ Petet bann dimoun ti tre ankoler pour antann sa. Petet zot ti menm esey touy Enok. Alor Enok ti bezwen byen brav pour averti bann dimoun konsernan sa ki Bondye pou fer.

Bondye pa ti permet Enok viv pour bokou letan parmi sa bann move dimoun. I ti viv pour selman 365 an. Akoz nou dir “selman 365 an”? Akoz pandan sa letan dimoun ti bokou pli for ki konmela e zot ti viv pour bokou letan. Metousela, garson Enok, ti viv pour 969 an!

Kan Enok ti mor, bann dimoun ti vin deplizanpli move. Labib i dir ki ‘zot ti touzour pe pans bann keksoz ki mal,’ e ki ‘later ti ranpli avek vyolans.’

Eski ou konn en rezon akoz ti annan sitan bokou vyolans lo later. Akoz Satan ti annan en nouvo fason pour fer dimoun fer bann keksoz mal. Nou pou aprann en pe lo la dan sa lot zistwar ki swiv.