TOU bann bon keksoz ki nou annan ozordi i sorti kot Bondye. I’n kree soley pour donn nou lalimyer pandan lazournen, lalin ek bann zetwal pour ekler nou pandan lannwit, e later pour nou kapab viv lo la.

Me soley, lalin, bann zetwal ek later pa ti bann premye keksoz ki Bondye ti kree. Eski ou konnen ki Bondye ti kree premye? I ti kree bann personnaz envizib parey li. Nou pa kapab vwar zot, zis parey nou pa kapab vwar Bondye. Dan Labib sa bann personnaz i ganny apele bann lanz. Bondye ti kree zot pour viv avek li dan lesyel.

Sa premye lanz ki Bondye ti kree ti vreman spesyal. I ti premye Garson Bondye, e i ti travay avek son Papa. I ti ed Bondye pour fer tou lezot keksoz, konman soley, lalin, bann zetwal e osi nou later.

Me ki mannyer later ti ete? Okonmansman, personn pa ti kapab viv lo later akoz delo sale ti kouver later antye. Me Bondye ti oule ki dimoun i viv lo later. Alor i ti konmans prepar bann keksoz pour nou. Ki i ti fer?

Tou dabor, ti bezwen annan lalimyer lo later. Alor Bondye ti fer ki soley i eklere lo later. I ti fer li en fason pour ki i annan lizour ek lannwit. Apre sa, Bondye ti fer later mont parlao delo.

Okonmansman, ti napa nanryen lo later: ni fler, ni pye dibwa, ni zannimo, i ti parey sa portre ki ou vwar la. Ni menm pwason ti napa dan delo sale. Bondye ti annan ankor en kantite travay pour fer avan ki later ti vin en zoli landrwa pour bann zannimo ek dimoun viv lo la.