GETE ki pe arive! Sa se Moiz ki pe avans son baton ver Lanmer Rouz. Sa bann dimoun ki avek li sen e sof lo lot kote i bann Izraelit. Me Faraon ek tou son larme pe noye dan lanmer. Annou vwar konman sa in arive.

Parey nou’n aprann, Faraon ti demann bann Izraelit pour kit Lezip apre ki Bondye ti’n anmenn sa 10 fleo lo bann Ezipsyen. Apepre 600,000 zonm Izraelit ti ale, osi byen ki en kantite madanm ek zanfan. Ti osi annan en kantite lezot dimoun, ki ti’n krwar dan Zeova e ki ti’n al ansanm avek bann Izraelit. Zot tou zot ti’n anmenn zot mouton, kabri ek bef avek zot.

Avan zot ti ale, bann Izraelit ti demann bann Ezipsyen lenz ek bann keksoz ki ti’n fer avek lor ek larzan. Bann Ezipsyen ti vreman per bann Izraelit, akoz sa dernyen fleo lo zot. Alor zot ti donn bann Izraelit tou sa ki zot ti demande.

Enn de zour plitar bann Izraelit ti ariv kot Lanmer Rouz. La zot ti repoze. Pandan sa bann letan, Faraon ek son bann zonm ti konmans regrete ki zot ti’n les bann Izraelit ale. Zot ti dir: ‘Nou’n les nou lesklav ale!’

Alor Faraon ti sanz son lide ankor enn fwa. Vitman i ti met pare son bann saret lager ek son bann larme. Apre i ti konmans swiv bann Izraelit avek 600 saret spesyal, osi byen ki tou lezot saret Lezip.

Kan bann Izraelit ti vwar Faraon ek son bann larme pe vini deryer zot, zot ti vreman per. Napa okenn landrwa pour sove. Lanmer Rouz ti akote zot, e la bann Ezipsyen ti pe vini dan lot direksyon. Me Zeova ti met en nyaz ant son pep ek bann Ezipsyen. Alor bann Ezipsyen pa ti kapab vwar bann Izraelit pour atak zot.

Zeova ti demann Moiz pour avans son baton ver Lanmer Rouz. Kan i ti fer sa, Zeova ti fer en divan les soufle. Delo sale ti ouver, e delo ti tenir lo tou le de kote.

Apre bann Izraelit ti konmans travers lanmer lo later sek. Ti pran plizyer er-d-tan pour sa milyon dimoun ek tou zot zannimo pas atraver lanmer sen e sof pour ariv lo lot kote. Finalman bann Ezipsyen ti kapab vwar bann Izraelit ankor. Zot lesklav ti pe sove! Alor zot ti degaze e swiv zot dan lanmer.

Kan zot ti pe traverse, Bondye ti fer larou zot saret sorti. Bann Ezipsyen ti konmans per e zot ti konmans dir: ‘Zeova pe lager pour bann Izraelit kont nou. Annou sorti isi!’ Me ti’n tro tar.

Se la ki Zeova ti demann Moiz pour avans son baton ver Lanmer Rouz, parey ou vwar dan sa portre. E kan Moiz ti fer sa, bann miray delo ti konmans retournen e kouver bann Ezipsyen ek zot bann saret. Tou larme ti’n swiv bann Izraelit dan lanmer. E ti napa enn bann Ezipsyen ki ti sorti vivan!

Konman ki pep Bondye ti vreman kontan akoz zot sen e sof! Bann zonm ti sant en sanson remersiman pour Zeova, an dizan: ‘Zeova in ranport en laviktwar merveye. I’n zet bann seval ek zot kavalye dan lanmer.’ Ser Moiz Miryam ti pran son tanbouren, e tou bann madanm ti swiv li avek zot tanbouren. Anmezir ki zot ti danse avek lazwa, zot ti sant menm sanson parey bann zonm ti pe sante: ‘Zeova in ranport en laviktwar merveye. I’n zet bann seval ek zot kavalye dan lanmer.’